番号 LK-072！玩完 AV 系 trap 歌再 vaporwave 花式致敬梅艳芳

虽然讲马不一定需要懂骑马，但还是练马师出身的董标讲得最好听。身处在这个人人躲于键盘背后，无需为网上发言负责任的风气下，若然你能展示相关技能也就不至于“得个讲字”。近月接连推出两首新作的 LK-072 反别 trap 以及 vaporwave 两种余热未消的音乐类型，根底绝不马虎，但无论 mv 抑或表现形式都露出浓厚的挑衅恶搞意味。到底这个横空出世，以日本成人影片（AV）格式为名的 LK-072 是何许人物呢？

问：扭耳仔 答：Locka（LK-072）

请简单介绍一下 LK-072。

系同 naturehin@话梅鹿（我条仔）嘅日常消闲活动。

第一首歌歌名〈ちんこマンコ〉其实点解？歌曲背后有咩构思？

歌名直译意思系“撚 閪”，因为觉得 trap 呢种风格嘅歌词好垃圾，唔需要有咩意思，可以只系用黎营造个 vibe - 呢部份受火炭丽琪影响 - 所以我哋上网揾左啲日文字句，再套用 trap 的方式去 troll 返呢种音乐。另外想讲点解第一首歌要玩 rap 呢？系因为见到痴脷筋都可以玩 rap，咁我都可以。

可否大约讲下日文歌词嘅内容？

AV 常见句子和日文旅行用语（credit to google translate）。

名字本身借用AV格式，咁 LK-072 喺美学上主要受边个 AV 厂商影响？

无sor

LK-072 有冇特别想做嘅题材／表达嘅讯息？

只要系引起我兴趣嘅题材，我都觉得自己可以做得好过现时市面上8成人。香港人唔应该再接受咁一般嘅音乐，或者咁闷嘅画面。我觉得好多人只系学左个壳，但去得唔够尽，not fun。

咁目前有边一位 local artist 你认为系去得够尽？

QQBBG，难听得好尽，听完觉得自己好似去左地狱，政府应该买返首歌嚟做行刑工具或者播嚟驱散示威者，好用过胡椒喷雾。做得好嘅我觉得系米奇老味，鸠味去得几尽，亦都好放得开，但私底下竟然好有礼貌。另外，东方升都系一个去得好尽嘅 artist，欣赏。

见到另一首新歌〈夏の忧郁˜s a d n e s s˜〉嘅 mv 转玩八十年代日本及香港电视影像风格，音乐上又系向边类 artist 取经呢？

梅艳芳，林志美，松田圣子，中森明菜，而原曲来自山下达郎。（边首？）系〈 Summer Blue 〉，本身只系想做个 vaporwave remix ，但唔小心做多咗，变咗首新歌。

而日文歌词系借用 L'Arc~en~Ciel 首同名歌？

无错， laruku 绝对系我中学时期嘅神 band ，所以想用呢种方式去贴近佢哋，好似同 Hyde 合作咗咁哈哈。

深宵紏缠今晚今晚失眠 痴心太迟想见想见一面 烟𤋏窗前请你请你出现

首歌嘅 Youtube info 有写但都系问多次，中文歌词系你两个自己填？事关无论词意同听上去都真系几似八十年代嘅梅姐／徐小凤（配合 future funk 底电音令我联想起陈年组合 Daft Pink ）。

中文歌词系我哋自己写嘅，呢首歌之前我系完全未写过广东话歌词，觉得揾啱字去押韵好难，今次喺男朋友嘅指导之下，加上用自己听开张国荣梅艳芳果啲去攞个韵味，先写到啲咁老土嘅歌词。

嚟紧会想做咩题材？

七十年代德国电音，或者系韩国 lo-fi hip hop 野，例如 offonoff 果种做少好过做多嘅音乐。

LK-072 目前有冇演出计划？如有，理想中嘅演出场面会系点？

无，但想要一堆m男观众，当然m女都得。