【香港01 X ICMA大专联校歌唱比赛】李耀轩：有梦想应该勇敢尝试

【香港01 X ICMA大专联校歌唱比赛】进入复赛阶段，34强参赛单位经已诞生！他们将会与18个大专校园冠军，一起争夺决赛资格，踏上麦花臣的舞台！以下为复赛参赛者【10】李耀轩自我介绍。

李耀轩 Matthew Lee （23岁）
学校： 明爱专上学院 (CIHE)
科目：社会工作
年级：Year 4

如果大家有梦想好想去做，就勇敢啲去试，系会好多挫折，但系你唔试过“梦想”就只会系“梦”入面“想”。

我由小一二嘅时候已经唱歌，𠮶时好钟意听歌，听住自己又唱下。

细个嘅时候会觉得唱歌好有型，到而家大个咗觉得唱歌系同人讲故事，唱歌好似一个说书人，唔同嘅歌有唔同嘅故事，我讲嘢组织成日好差，有时候都会透过唱歌去想讲自己嘅心声。

以前参加比赛系想见识下呢个世界唔同人嘅音乐水平。ICMA一直系我bucket list入面，参加咗三年我都入唔到决赛。今年系我最后一年，希望可以好好珍惜呢个机会，完全我嘅小目标，“讲故事”比大家听。

唱歌令我认识到好多唔同嘅朋友，两年前我有参加过中国好歌声香港区选拔，有幸地见到来自唔同地方热爱唱歌，功力深厚嘅朋友。

另外我觉得唱歌都系一个减压方法，我依家系一位社工学生，有时有压力既时候就会唱下歌抒发下，好似放翻好多谷住嘅气咁。实习嘅时候都会以艺术嘅方式做介入手法，唱歌系其中一个好好连系唔同人嘅方法。

中学嘅时候我参加好多比赛，比赛旺季嘅时候差唔多逢星期六日都去比赛，因为自己真系好钟意唱歌，不过亦都系因为咁我牺牲咗我部份嘅时间读书。记得我喺DSE嘅时候都有玩比赛，当时都有老师话我点解唔好好地读书。最后成绩就当然麻麻啦，但因为我参加咗唔同嘅比赛认识咗唔同嘅朋友。另外，有时候唱歌需要好多时间去排练，可能会牺牲左同屋企人一齐食晚饭去玩嘅时间。

唱歌，音乐，艺术。一直都系我好钟意嘅兴趣，我觉得如果我成长路上冇咗艺术，我个人应该会好苦闷好冇目标。系唱歌令我见识到好多嘢。

今年系我Last year，我想同大家讲，如果大家有梦想好想去做，就勇敢啲去试，系会好多挫折架，但系你唔试过“梦想”就只会系“梦”入面“想”。

其实而家实习紧好忙，但系我都冇放弃过唱歌呢一样野，你呢？你哋又想做啲咩啊？

如果想听我喺麦花臣“讲故事”比大家听，大家就投我一票啦。多谢大家。

【香港01 X ICMA大专联校歌唱比赛2019】 选手简介及最新报道【请按此】

复赛详情
日期：2019年4月27日（星期六）
地点：赤柱广场

决赛详情
日期：2019年6月26日（星期三）
地点：旺角麦花臣场馆
＊密切留意决赛购票详情＊