【禁烟】随街吸烟仲未立法？　应该学吓日本、不丹

究竟边个发明了吸烟？究竟点解要一路行一路食烟？我知咁系香港唔系犯法，但真系好无公德心啰，有冇顾及过其他人。吸烟明明系对自己无益，对别人有害，点解仲要周围发放毒气咁无品？

出街最烦恼的事，莫过于在街上行行吓，突然一阵逆风吹来，惨被二手烟喷到一面都系，都唔明点解，烟民唔行埋一边，围炉去食呢？每次遇到咁既情况，我心底里好想问候佢祖宗十八代，可惜我淆底唔敢上前铲佢。

年初肆
世界光怪陆离，无人独善其身。嬉笑怒骂，冷嘲热讽，皆成文章。有人话，边个揸住支笔，边个就是无冕皇帝，就让我做多一回皇帝。

我唔明香港依个咁文明既地方，点解仲容许吸烟这种损人不利己嘅行为。你要慢性自杀我唔阻你，但点解要其他人陪你去死？我知我知，香烟无乜可能全面禁止，吸烟人士有权去吸！政府又要收大量烟草税嘛！结果只有无视不吸烟人士的权益，二手烟民继续受害！

试过好几次，在路上遇到啲人喺我前面吸烟，仲要几秒喷烟一次，你估条路好阔，你行晒咩？你又唔系火车头，系咁喷烟，点解要我跟住你，我要左闪右避，闭气急急步咁走过去。再唔系就要兜路行，买佢怕。我都唔明我做错啲乜，落个街都要好似过街老鼠咁，又跑又避，你班烟民就理直气壮，完全唔理其他人嘅感受，一啲公德心都冇。

不丹：全国公共地方禁烟

如果可以学到不丹咁，实行全国禁烟，咁就perfect。因为不丹全国的公共地方都是禁烟的！

再唔系，学吓日本咁有“路上禁烟”条例，规定烟民要在街道上的指定“吃烟所”吸烟。这些半封闭式的“吃烟所”，既可让烟民有“栖身之所”齐齐打边炉，亦可还非烟民一条无烟街道。听闻新加坡即将会有“路上禁烟”条例，不过暂时只系限果几条大街，但都好过无喇。

超过140个国家　公共、工作场所全面禁烟

再放眼世界，目前全球已有超过140个国家加入“全球烟草控制框架公约”（FCTC）。例如爱尔兰、挪威、纽西兰、乌拉圭、冰岛、美国、加拿大、澳大利亚、英国等，都已实施室内公共场所与工作场所全面禁烟，保障不吸烟者免受二手烟危害。

虽然有人话，香港一直是控烟做得最好的地区之一，更可以话是亚洲的先驱。因为早在2007年时，已有全面禁烟的条例，是继新加坡后，第二个禁止市民在所有食肆室内地方以至室内工作间吸烟的国家（地区）。但由于香港人口实在太密集，在街上吸烟的情况根本没法改善，一条街上几个吸烟者在，已令你觉得活在烟雾的世界中。

我强烈反对边走路边吸烟的行为，但都明白无可能全面禁烟，但唔该都俾条生路我行，你地去吸烟区慢慢打边炉啦。大家又同唔同意我嘅睇法？欢迎留言讨论吓。

你都想成为开笔一份子，稿件可电邮至opener@hk01.com；文章纯属作者意见，不代表开罐立场。