【宠物纹身】舍不得兔兔离世　怕痛主人用纹身纪念一辈子

爱护动物无分国界，《香港01》宠物频道及其facebook专页欢迎你投稿。来自香港兔主Olle，早前养了一只兔子“皮皮”，可惜近月皮皮身体情况转差，持续治疗亦无法改善情况，最终离开了Olle。为纪念皮皮，她更在手臂上刻上皮皮的纹身，让皮皮分秒陪伴在身边。

皮皮，是我2013年喺兔协领养，原本我上网睇系打算领养另一只兔兔。去兔协做清笼义工学习养兔仔时，当我一去到，见到皮皮，我就知道系佢。佢望住我，好似叫我做佢主人咁样，眼神好渴望我带佢走，所以我就决定咗。
  
我同皮皮有好多开心同唔开心嘅经历，面对过良性同恶性嘅肿瘤，做手术食药，一关一关咁闯过。每次手术完，都会令我更加珍惜呢只小兔兔，我知道佢承受咗好大嘅痛苦，亦好怕会失去佢。

▼▼▼主人Olle与皮皮经历无数喜与乐！点撃图片看故事▼▼▼

为兔兔学焗草饼

直到2018年10月，发现佢行路异常，会缩起左手行，我好担心，因为之前个恶性瘤就喺左手膊头位置。带咗佢睇医生之后，发现系腰椎有椎间盘突出，医生话食药打骨针，应该几个星期会好返，我松咗一口气。但系第二个星期复诊嘅时候就已经发现椎间盘压住神经线，皮皮已经冇能力自己去小便，需要每日人手排尿，而且脚仔亦都未必可以行得返，建议去揾医生帮佢针灸做laser舒缓病情。即时转介咗去另一个医生，开始咗针灸laser嘅疗程，并且每日食药。由𠮶日起我同先生就开始每日帮佢人手排尿，早晚亦要食十几只药，一星期复诊2-3次针灸，做laser，打皮下水。

由于皮皮唔系好愿意食药，我去学焗草饼俾佢食，亦自己喺屋企种小麦草，每次食完药就有得食。皮皮就好乖好听话，每日期待着食药嘅环节，知我去准备药，佢就好期待咁望住我，喂完就四围望，等食草饼，皮皮真系好叻好努力。

只可惜，针灸咗一段时间再照X光时，发现颈椎嘅椎间盘都有突出嘅情况，我心情好低落，但系皮皮唔放弃，我都绝对唔会放弃。𠮶日开始，就开始针灸埋颈部嘅部份。我好珍惜我们一齐嘅时间，会带佢去草地，带佢出街，平日推bb车咁样出去。因为要返工，装咗个闭路电视二十四小时望住佢，亦都会播卡通片俾佢睇。仲记得有人送货上嚟，仲讲咗句“哇，你只兔仔睇紧幼稚园教材㖞！”哈哈。我买咗张床仔放喺床头，每晚同佢倾完计就一齐瞓觉。

感谢兔兔在生命中出现过

皮皮体重一路下降，医生帮佢抽血亦发现唔到原因，只有一直加药。我请假陪住佢，抱住佢睇电视。以前佢可以自己喺呢个屋企无拘束咁四围走，而家由我做佢只脚仔，抱住佢走遍屋企每一个角落 。我会同佢倾计，唱歌，讲佢知我有几锡佢，亦好多谢佢喺我生命中出现，为我带嚟无尽嘅欢乐。

皮皮喺27/03/2019晚上7:10 离开咗啦，其实真系接受唔到，咁耐以来每日都喺身边，每日见住佢同佢玩，出咗街又会挂住佢，知道佢每日喺屋企期待我返嚟陪佢，所有所有已经成为咗个习惯，系生活嘅一个重要部分。

皮皮，你好叻猪仔呀，主人返咗工，你都顶住等到我返咗嚟揽住你先走🐰😘你而家扎扎跳喺彩虹桥一定好开心啦，有冇遇到好多兔仔朋友？ 🌈 终于都唔洗再每日食药打针睇医生啦，仲可以好似以前咁行得跑得跳得！皮皮，无论你喺唔喺我身边，我永远都会咁爱锡你！你会系我唯一一只，最乖最可爱最叻仔嘅小兔🐰

皮皮离开之后，我每日都会帮佢执笼执床仔加食物，每日都对住床仔同佢倾计，播Peppa Pig俾佢睇直至丧礼完成为止，有师傅话过唔好令佢太留恋呢个地方，佢会唔愿意去投胎，所以几唔舍得，为佢好都要放佢走。我问过好多唔同嘅人，如何帮皮皮超渡，带佢去极乐世界。亦有去黄大仙拜神，保佑皮皮唔会受到痛苦，可以去投胎，过佢开心幸福嘅下一世。我知道皮皮呢世咁乖，为主人带嚟咁多欢乐，积咗咁多功徳，下世一定会做到最幸福快乐嘅小朋友。

喺皮皮嘅七七，我将佢部分嘅骨灰、毛毛、指甲，用uv滴胶整成咗一只小兔兔，埋咗喺日本嘅兔仔岛。佢净返嘅零食，带咗过去兔兔岛俾兔仔，每喂一只兔仔都会叮嘱佢哋好好照顾皮皮。皮皮剩返嘅其他物品，除咗几样好有纪念价值之外，都捐咗俾兔协，希望帮助其他每一只兔仔，亦希望为佢积功徳。另外，有部分嘅骨灰做成咗颈链，等我可以每日带住佢喺身边。我亦成立咗网店，为其他主人用宠物毛毛等做成饰物带喺身边，仿佛小宠物一直陪伴主人。

我系一个好怕痛的人，从来都没有谂过要去纹身。有人可能觉得纹身只系一个点缀，但对我来说，是一个纪念。宠物只系你嘅部分，但你就系佢嘅一辈子。皮皮，用佢一生嘅精力，希望为我带来无尽嘅欢乐。纹身期间好惊险，我觉得好痛，好惊，对纹身针发出嘅声音好恐惧，晕低过又醒过。系皮皮赐我勇气，我成功咗喇！其他人话纹手唔痛，我觉得好痛，但系无论点痛，都冇皮皮离开我咁痛.....我永远都会记住我最爱嘅小皮兔！
  
好开心好开心，以后一照镜就可以见到我嘅小兔兔啦！只要见到皮皮，所有唔开心嘅事、烦恼嘅事亦可以抛诸脑后，好似皮皮在生时，我每次喊，佢都会围住跳，用手仔搭住我。