【毛孩与我】一个照顾狗狗终老故事　Cherry：唔好轻言放弃

爱护动物无分国界，《香港01》宠物频道及其facebook专页欢迎你投稿。本文由Cherry投稿，她分享了陪著狗狗走最后一般路的经历，希望有同类经历的狗主，千万不要轻言放弃，要一齐加油努力。

大家好，我系Cherry，我养咗好耐（由2个月大养到17岁）嘅狗狗黄宝宝，喺上年年底因肾病离开咗，但我好希望将照顾有病老狗嘅经历，可以与大家一齐分享。记著照顾有病老狗要有耐性，唔好随便放弃，狗狗都会坚强咁撑下去㗎！

黄宝宝已经于24/11/2017去咗彩虹桥了……在远方的你可好吗？

你上次入医院（07-2016），医生同我讲可以救你一次，如果唔救你，你应该好快就会离开，因为你嘅验血指数已经爆晒标，爆到睇唔到读唔到毒素，试下吊盐水几日，睇下有无好转，有就睇你自己命数，无就无法子了，已经尽晒力。

最后，黄宝宝好叻女，喺医院吊咗盐水几日后，毒数已回落，可以出院。医生话，一路食药，Keep住每日打皮下水，隔2-3个月覆诊一次，其实都无咩可再做，一切就靠黄宝宝自己。

一个月又一个月，喺07/2017年开始，黄宝宝身体突然变得差咗，仲喺一星期内，由跌跌碰碰，到完全无办法自己起身，行唔到。但黄宝宝喺呢段时间，接受唔到自己行唔到，不停大叫要起身，叫足全日全晚。见到咁嘅情况，我同老公已经立即订轮椅车车比黄宝宝，但都要点时间，喺𠮶时开始佢无晒信心，无哂意志，不食不喝，情况好差，没有最差只有更差，我见到咁真系好难过，好心痛。

有好几次，我有想过要放弃佢，因为唔想佢咁辛苦，但呢个系我最唔想嘅决定。咁我唯有每日每晚坚持要畀饭畀水，畀补充品佢，食个饭要超过1个钟，饮水饮到四周围都系，但我都要坚持，不放弃。到收到轮椅车车后，黄宝宝终于可以再次自己站起来，之后佢慢慢就无再叫，佢信心意志都慢慢一齐返来了。开始慢慢饮番水同补充品，开始慢慢食番饭，呢刻我真系好感动！

呢个几月来无白费到我嘅心机，到今日佢自己仲可以主动食饭、饮水，我真系觉得系一个奇迹，好感恩。多谢上天畀我再爱黄宝宝多点时间，喺到好想同大家分享下，如果大家嘅家中都有需要特别照顾嘅狗狗，希望大家都努力加油，不要放弃，希望有奇迹会发生喺每一个狗奴才同狗狗身上，希望大家狗狗都要身体健康、快乐。

最后黄宝宝支持左17个月。对，系17个月，系一个奇迹来的。好感恩，谢谢你黄宝宝，我知道你去到最后𠮶个月开始好辛苦，又完全食唔到嘢，因为肚子好痛而大叫，气喘到要氧气机出动，大小便都去唔到。我知道系时候，我心中有数，虽然心里万般不舍得，但我明白离开先系对你最好的。黄宝宝，现在你自由了，无病无痛了，不用再畀我迫你食饭、食药、打针；不用轮椅、不用尿片，你可以再次喺彩虹桥到奔跑，幸福快乐地生活，去到记得揾家姐黄菲菲呀……

最后，黄宝宝多谢你同我们一齐坚持咗咁耐，黄宝宝嘅生命力好横强，就算到最后行唔到，用轮椅都要坚持每日行行行，令我学会做人都要有耐性、耐心、坚持、坚强。

黄宝宝你嘅使命完成了，毕业了‍。再见了黄宝宝，多谢你带畀我同爸爸嘅快乐，最开心嘅回忆，系我们这一家真系去过好多地方，香港、九龙、新界、离岛、大屿山通通都有著我们的脚印。我们的回忆，真系好开心快乐，我会永远记住，黄菲菲、黄宝宝，我爱你们，我相信总有天我们会再聚，现在只是暂时分开的……Love u，再见了～

#轮椅战士黄宝宝
#爱是一辈子
#爱是不离不弃
#我们的脚印，我们的足迹
#黄宝宝使命完成了
#黄宝宝再见了，我爱你