方东升烂Gag导航《长命百二岁》　探讨沉重老人问题仍然好幽默

无线记者方东升以幽默方式，声音导航《世界零距离》系列，带大家认识世界之余，亦令大家认识佢嘅烂Gag，诸如：“今日玉树临风，明日可能弱不禁风”、“人在跌倒中成长，跌跌下你就会发现，岁月不挠人，起身见头晕”。

佢呢啲同老人相关嘅烂gag，当时以为只系随口噏当秘笈，真系估唔到佢真系走咗去探讨老人问题，节目名叫《长命百二岁》。

以方东升嘅说话去简单介绍下个节目：“呢个世界愈嚟愈化，全球化、数码化，仲有呢个节目最关心嘅人口老化。‘长命百岁’已经过时，活到百二岁系迟早嘅事，但究竟系祝福定系诅咒？我哋走访两岸四地，零距离接触各路耆英，包括直击日本美魔女大赛、解构南韩仔女带父母一齐去孝道整容现象。”

各位，方东升上述几句说话，系咪斋睇字都觉得好有趣，好想睇呢？但其实一个咁沉重嘅话题，方东升声音导航得最funny都好，最后都会令观众睇到有啲心噏，试谂谂香港部分老人家咩境况：住笼屋、独居无人理、喺安老院“安享”晚年，定系仲执紧纸皮，经过垃圾桶顺便睇睇仲有咩食得？节目话俾我哋知，有啲问题更加系我哋谂都未谂过，包括每日最少冲一次凉咁简单嘅事，对老人家嚟讲，特别系长期病患需要卧床𠮶啲，冲凉原来可以好难得。

节目提到：“有啲人情愿使钱俾宠物出去冲凉，都唔愿使钱俾长期病患需要卧床嘅父母享受洗澡车服务。或者我哋一日最少冲一次，无咩特别，但对卧床长者嚟讲，半年甚至一年先可以享受一次冲凉服务。难怪台湾当局有咁嘅宣传口号：‘澡’到幸福，‘浴’见爱。”真系幽默之中又令人反思，方东升真系好高质呀！