Netflix《Verónica》玩西式碟仙　背后真人真事仲恐怖过电影

Netflix真系好多嘢睇，最近就有一套西班牙恐怖片《Verónica》新鲜上架，喺烂蕃茄上面仲拎到88%高分，为电影执导嘅更系拍过《80分钟死亡直播》嘅Paco Plaza，似乎值得一睇。不过，睇之前见到套戏中文名译做《灵蚀》时，就觉得成件事打咗折扣。

都要讲一讲套戏系个故事系点先，套戏就讲述一个马德里15岁少女叫Verónica，有一日就趁住日蚀同班朋友喺学校地下室搞降神会（类似中国嘅碟仙），打算招死咗一排嘅老窦个魂魄倾两句，点知就中哂大伏惹咗邪灵返嚟。之后佢就经历一连串嘅灵异事件，包括无啦啦个身多咗好多抓痕、帮细佬冲凉啲水无啦啦变得劲热，同埋发梦见到鬼手。

学校个盲眼修女就话佢玩命，叫佢好好揾方法保护好佢细佬妹，之后佢就发现原来个降神会系要讲拜拜先完到，所以佢就揾佢细佬妹（佢啲朋友睬佢都傻）再“开会”，只可惜只邪灵Say No，仲用块烂玻璃割佢颈。虽然Verónica一早报警，但到警察入屋时，佢哋只能眼白白睇住Verónica凌空尖叫，就算急急送院最后都宣告不治。

其实套戏真系同《80分钟死亡直播》比争少少，因为《80分钟》系以纪录片方式去拍摄，好容易令观众以第一身嘅角度陪住女主角感受到𠮶份无助感。你问《Verónica》恐唔恐怖？不过不失嘅，虽然故事好简单，但胜在特技、配乐同音效都做得好好。不过，就算套戏几恐怖都好，都远远唔够背后嘅故事恐怖，因为成套戏都系真人真事改篇。

同样系1991年嘅马德里，一个叫Estefania Gutierrez Lazaro嘅少女喺学校玩完通灵后，就连续几个月都出现癫痫症症状同睇到幻觉，仲话有好多黑影经常喺佢身边周围转，最后佢喺医院死咗。之后，Estefania嘅父母（真人真事里面佢老窦冇死）就不时喺屋企见到啲异像，例如无啦啦有啲耳语声出现、啲熄咗嘅电器无啦啦开著等。隔咗成年，佢父母终于顶唔住打电话报警，探长José Negri就以为佢哋间屋有人潜入，所以就带咗成Team人到场。

好快佢父母就讲咗个情况畀探长知，佢哋话屋企度门𠮶日成日都系咁嘭埋，又话经常有个黑影穿过道门，之前个黑影仲企图勒死瞓紧觉嘅Estefania妈妈。之后，一班警察就亲眼目睹到呢啲怪事，不断间屋听到嘭嘭声，其中有两个探员就突然觉得好想呕、头晕同埋成身震哂，搞到即刻要离开大楼，仲因此而请咗两个礼拜病假，而探长亦喺事件发生后申请调职。喺José Negri写嘅调查报告里面，佢就写咗“无法解释”嚟概括成件案件，而呢件事亦系西班牙首次有警员亲身经历兼纪录在案嘅灵异事件。真系信不信由你呀！