张继聪回忆７年前和谢安琪同抑郁：当时食行药好口干好头晕好攰

张继聪向来都好感性兼又喜欢跟大家分享他的生活点滴与感受，昨晚凌晨时份阿聪就突然有感而发，于facebook写了一段讲述自己七年前患有重抑郁，但仍出席叱咤颁奖礼撑太太谢安琪 (Kay) 获得叱咤乐坛女歌手银奖的事，亦唔介意令人谂返起他曾经有过“废柴老公”这个称号。他透露颁奖礼当晚因为“食行药，所以“好口干，好头晕，好攰”，而他当时的心情除了开心感动之外，其实同时都“好惊好怕，好担心食白果嘅我唔知又会比人点嘲笑，总之九万几个层次又li 又lu .....”当年阿聪的成绩无论在乐坛或影坛都确实平平，太太Kay却正值事业的高峰期，作为男人且是人夫的阿聪所承受的压力，唔使讲都知一定是很大很大。

他又指原来太太Kay当时亦都和他一样“抑郁病都好猛烈，承受好大嘅压力”两公婆可谓同病相怜。他形容自己与太太都是“考紧宇宙俾我 (同佢) 嘅试”Kay当年咁好成绩却竟然并不快乐，这亦令阿聪参透了一个大道理“你话世界系几奥妙？快唔快乐，原来同得到几多无关。 快乐，其实系因，唔系果”“每一个经历其实冇乜意义，意义系由自己去界定，但系一定比你想像中美好同重要，就算当时系几恶啃都好，好好行自己嘅路就掂”而阿聪就是靠住一份毅力和坚持，终于走出了他人生的低谷，无抑郁之余仲好幸福快乐，且在演艺事业上考取到优异的成绩，剧集和电影接唔停，让太太可以安心放下工作全心照顾屋企。

最后阿聪就总结一下自己的心情话“好似我家吓睇番段片，发现原来果日唔系路障，而系加油站，令我选择之后嘅路，决心寻找快乐同自在，亦系果日，令我更有勇气去更多嘅颁奖礼，食更多嘅白果。所以你话，人生几美好，根本就冇衰嘢”睇他现在咁豁达咁积极咁正面兼仲识鼓励其他人，半夜三更都不忘发放正能量，就知他已经完全好返晒啦。

张继聪facebook原文：

长文，随便出入
无意中睇到依段片，好欢乐，唔系讲七年前我个郁同发型带比大家嘅欢乐，而系.....
七年前嘅依一日，当时嘅我可以话系考紧宇宙俾我嘅试....啱啱出世嘅朋友仔可以去历史博物馆查吓我当时嘅外号，就会略知一二，当时我嘅花朵真系好猛
Anyways，当时我嘅抑郁病非常严重，非常想又非常怕去依个Party 。想去，系因为太太当时成绩非常出色，我一定要系现场支持佢同见证佢努力嘅成果，怕去，系因为我当时嘅成绩非常冇乜成绩.....
片中所见嘅我，其实当时食行药，所以好口干，好头晕，好攰，个cam又起势队住队住，同时又好感动，好替太太开心，好想抱住佢，再同时好惊好怕，好担心食白果嘅我唔知又会比人点嘲笑，总之九万几个层次又li 又lu .....
同时台上嘅太太，成晚虽然得到好多个奖，其实当时嘅佢抑郁病都好猛烈，承受好大嘅压力，佢都系考紧宇宙俾佢嘅试....
你话世界系几奥妙？快唔快乐，原来同得到几多无关。 快乐，其实系因，唔系果
如果你咁得闲睇到嚟依到，朋友，我想讲嘅系，每一个经历其实冇乜意义，意义系由自己去界定，但系一定比你想像中美好同重要，就算当时系几恶啃都好，好好行自己嘅路就掂
就好似我家吓睇番段片，发现原来果日唔系路障，而系加油站，令我选择之后嘅路，决心寻找快乐同自在
亦系果日，令我更有勇气去更多嘅颁奖礼，食更多嘅白果
所以你话，人生几美好，根本就冇衰嘢