【每逢大事讲故事】争夺摩苏尔 由一场纽约炼到巴黎的赛车说起
百几年前嘅欧美，街上行嘅系马车，虽然汽车已经面世，但啲人仲会话，“Oh my god！啲车行得咁快真系好牙烟”，宁愿用一日时间由伦敦坐马车去剑桥，速度都系快行路少少。当时汽车嘅前卫程度，大概就好似而家无人车咁。呢个时候，美国人同法国人决定搞一场大龙凤——由纽约一路揸车到巴黎。
呢个，就标志住摩苏尔噩梦嘅开始。
呢边厢，汽车业等住起飞......
1908年，一战未发生，而中国仲系清朝。喺严冬之中，纽约时代广场有25万人聚集，见证历史时刻。美国、法国、德国同意大利车手已经蒙头入闸……整装待发先啱，准备踏上长征。整个行程用咗169日，当中包括冰天雪地横越西伯利亚嘅荒芜雪地，以果时嚟讲真系玩命之旅嚟。搞咁大阵仗，事关当年汽车业正处于萌芽阶段，一于搞坛嘢旺一旺个场；而同一年，福特亦出产咗第一款大型生产汽车Model T，一场汽车革命蓄势待发。
果边厢，中东掘到石油......
呢个时候，有个英国人George Bernard Reynolds喺遥远嘅中东欢呼：“同我继续掘！”伊朗喺当时仲叫波斯，阿George喺呢度3年又3年，揾石油揾咗足足7年，家吓终于闻到原油阵除喇——无错，原油系有种独有嘅硫味。1908年5月26日，一行人掘到清晨4点，石油突然喷注而出，好似系黎明时分嘅波斯放了一场黑色烟花，油柱足足有成25米高，即系有成8层楼咁高。
喂飞云搞乜讲故仔讲到成套《云图》咁，讲咗咁耐摩苏尔影都唔见……咪先！
......摩苏尔到底喺边？
问得出呢个问题，飞云都要赞吓你——即系你知佢唔系人名，恐怕已经叻过唔少人，如果你仲问得出“系咪即系阿勒颇啲friend”，飞云真系拍晒手掌呀。嗱飞云绝对唔笑人，香港地本身已经日日新鲜镬镬金，打工仔每日有半个钟碌下新闻已经偷笑，何来咁多时间睇中东地图丫。
伊拉克之珠 唔珠好过珠......
摩苏尔而家系伊拉克嘅第二大城市，人哋叫佢做“北伊拉克之珠”，哇叫得乜乜之珠，仲要做过英国殖民地，都唔慌好彩得去边。摩苏尔被ISIS进占近3年，战火蹂躏咁耐，错就错在一样嘢：石油。
是咁的，如果你中一有听书，应该知道有样嘢叫新月沃土，而如果你有听周杰伦，应该都知有样嘢叫美索不达米亚……
......佢呢身造型，真系令人好怀念。
讲返新月沃土，巴比伦你识唔识？
美索不达米亚大概就位于今时今日嘅伊拉克，亦系新月沃土嘅一部份，拥有幼发拉底河同底格里斯河，孕育人类最古老嘅文明。当我哋话中华文明有5000年历史好巴闭，人哋公元前6000年就开始有灌漑系统，前2500年就有燃油灯，仲识焗面包同酿啤酒。巴比伦王国飞云细细个就听过呢个名，佢就正正系呢个地方建国。呢片土地位处平原，四围都无天然屏障，易攻难守，咁大嚿肥猪肉，当然系不断嘅被人入侵啦，政权不断换画。
而摩苏尔呢个地方，位处底格里斯河的两旁，物资丰盛，椰林树影，水清沙幼，系当地嘅文化、工商业重镇。果度有公园、浴场、美食等等，仲聚集一众文人雅士，十世纪果时嘅学者觉得“简直系perfect池”，唯一就系嫌啲风太大声啰。
摩苏尔呢个地方好巴闭，虽然系伊斯兰城市，但喺圣经入面都好有戏份架㖞。佢曾经系亚述帝国嘅古都尼尼微（Nineveh），圣经话尼尼微大到3日3夜先行得完，连先知约拿都要去尼尼微传教，时至今日，当地都仲有唔少亚述人信奉基督教。摩苏尔喺637年被阿拉伯帝国征服，从此被伊斯兰化，直至16世纪被纳入奥斯曼帝国版图。
中东有油 仆倒去掘
咁关阿George兄咩事呢？事关阿George发现嘅油田，系中东地区第一个大型原油矿。19世纪末、20世纪初，醒目嘅英国佬早就估紧石油会取代燃煤成为主要能源，所以先喺中东周围掘。一掘到第一个油矿，简直好似美梦成真，更加成立咗英波石油公司（Anglo-Persian Oil Company），当年喺伦敦IPO时，英波嘅股票喺30分钟内被抢购一空，而呢间公司就系大家熟悉嘅油公司BP前身。加上美国同时又带起汽车革命，又起路又起厂，迟啲仲起埋飞机，无油真系搞唔掂。咁美国人就好彩啦，本地就有石油，而英国果时仲未揾到北海油田，咁点算？英国人最叻系咩呀，自己无咪向外揾啰，好似大英博物馆本来都无木乃伊架。
咁作为生意人，可以平嘅你点会想畀钱。当时嘅英国仲好积极周围发展殖民地，对住中东心思思咗好耐。终于等到1914年机会嚟喇！一战爆发，奥斯曼帝国参战，加入德国同意大利嘅同盟国阵营。哇英国就打得起劲啰，打奥斯曼打咗一年就瓦解咗人哋嘅行政机关，1917年就占领埋伊拉克嘅巴格达同摩苏尔。
既然一战未完就大局已定，列强作为“准战胜国”梗系要争先分吓饼仔啦。当时英、法、俄好早就凑埋一伙喇，但俄国好快就忙紧搞革命唔得闲联络感情，咁英法两个friend子就自己喺凡尔赛宫围埋密倾喇。
当时法国总理Georges Clemenceau同英国首相Lloyd George见面，两个George(s)口味好相同，都“猴”住摩苏尔……啲石油。一开口，法国总理就问：“先生有咩睇啱呀？”英国首相快人快语：“摩苏尔。”当时英国军队手上有伊拉克同叙利亚，法国人谂一谂，无摩苏尔要返个叙利亚都无话唔好，爽快同意，“仲有咩需要？”“耶路撒冷。”简直好似飞云填点心纸咁呀，一盅顶点灌汤饺，一笼大点烧卖，你就食个干烧伊面啦，中东嘅乱局就由此起。
咁伊拉克人梗系好唔满意啦，又起义又盛，搞咗一轮，英国人就揾咗麦加领袖个仔做伊拉克国王，再揾埋啲前奥斯曼逊尼派精英一齐管。新国王费萨尔一世（Faisal I）系候赛因家族成员，声称系先知穆罕默德嘅后人，英国人话九成伊拉克人都buy佢架㖞，系啰，英国人话啰。
伊拉克人好唔“gur”，一直有大大小小嘅反殖民活动，到1958年终于独立到喇，赶走咗英国人，但国家内部依然一直动荡。但你有你嘅生活，欧美都有欧美嘅忙碌，一战完咗，条气都未唞顺，又大萧条又法西斯纳粹又二战又盛……愈多呢啲铁与血嘅事件，对石油嘅需求就愈大。
深度阅读：【专页】伊拉克军队步步进逼摩苏尔 ISIS末日倒数 紧贴最新战况
唔小心使大咗......喂磅住啲石油嚟先
二战当中，石油成为重要资产。战机、坦克、车，全部都要燃料，打起仗嚟与其断你粮，不如炸你油。完咗场仗，欧洲因为用晒啲煤，迎来第一次能源危机。隔住个海嘅美国，净系二战同越战嘅用油量，已经多过成个油田嘅产量喇。美国佬仲有经济活动呢，仲要揸车呢，仲要夜夜笙歌呢，仲要系威系势咁做世界大佬呢，用石油用得愈来愈劲，唔入口就唔够驶，用嘅份量占全世界三分之二咁多！咁点算？又系果句，自己无嘅，人哋会有嘛。
成件事真系好déjà vu，但人哋中东唔似得奥斯曼咁向西方宣战㖞，点先可以借啲意插只脚埋去呀？唔怕㖞，美国好和平好钟意帮人手架嘛，拍晒心口咁，中东咁多战乱，大把机会介入啦，就好似90年代初嘅波斯湾战争咁。同埋㖞，人哋无宣战都系人哋讲姐，美国堂堂大国，屈吓人有大杀伤力武器几咁闲丫，就好似2003年开始、一直打咗8年嘅伊拉克战争咁。
战争就系咁，有人血流成河、家破人亡，有人只系一边打、一边睇住有无肉食，等住几时分猪肉。摩苏尔作为要被分嘅猪肉，系两场战争入面都尚算安全，英美喺2003年前列佢做禁飞区，直至美国直接攻入摩苏尔，但少不免都受到战火摧残。
呢班外国人，喺人哋嘅土地上打自己嘅仗，打完之后拍拍屁股就走，无重整经济，反而建立个会增加宗教种族矛盾嘅政制，仲助长咗恐怖主义，呢个业报嘅故事，相信大家都听过好多次。
人来人往，大家齐来争櫈仔
一班人走，一班带住黑旗嘅人又入嚟。ISIS喺2014年攻入嚟，一夜之间，摩苏尔人生活模式大改。ISIS贪咩，咪又系石油。摩苏尔唔单止喺叙利亚同土耳其边境附近，四围仲有唔少重要油田，仲有条通往土耳其嘅输油管。有油就有资金，成为ISIS嘅重要据点同大水喉。
而家伊拉克政府军同美军一齐收服紧摩苏尔，但讲得系肥猪肉，又点会只得咁少人“捕”紧。摩苏尔一空，各方势力就斗快争櫈仔。美国见俄罗斯系叙利亚打得有声有色，呢个时候唔加力度就实喺中东蚀底；伊拉克北部嘅库尔德人本来有个自治区，趁乱点会唔打劫？嗱嗱声出动霸个靓位，专拣油产丰富嘅地方，例如出名多油嘅基尔库克；仲有就系土耳其，仲记住奥斯曼时期嘅美梦，成日想将摩苏尔纳入势力范围，一路喺摩苏尔20公里外训练民兵。
ISIS喺摩苏尔，如无意外都气数将尽，但收服咗摩苏尔，先系另一场斗争嘅开始。赶走狼群，啲老虎狮子又再嚟争，人道灾难实在难以避免，对呢啲惨绝人寰嘅事，飞云真系笑唔出。
深度阅读：【专页】伊拉克军队步步进逼摩苏尔 ISIS末日倒数 紧贴最新战况