【每逢大事讲故事】老娘就是要放狠招　睇特雷莎·梅如何华丽U-Turn

虽然好老土，但都忍唔住讲句：女人真系好善变。
讲嘅系英国首相特雷莎·梅（介绍番，内地嘅同胞帮佢起了个听起来甜中带酸的名字：特雷莎‧梅），佢上星期三突然系英国政坛投下重量级炸弹：宣布提早大选!
佢自去年脱欧公投之后，已经讲过至少7次话“在2020年之前不会有大选”，成功呃哂所有人，包括在野党。而原来U-Turn May并唔系浪得虚名，佢就系凭呢个技巧上位做到新铁娘子，“家下着黄色衫，又变咗着绿色衫”嘅功能真系唔可以睇小。

刚年届花甲嘅May姐，呢招真系狠。英国要筹备一场大选，通常最少都要花几个月时间。不过，由May姐宣布、国会通过到6月8日举行大选 ，前后只有8星期。难怪其他党派包括工党及自由民主党，听到消息后个样会咁……

宣布提早大选后，虽然要过国会，但下议院大部分议席都系May姐嘅人，好难出现变数。至于在野党，即使摆吓姿态点都好，都要出嚟讲两句批评May姐自私呀搞政治呀咁，估唔到工党党魁科尔宾差不多系第一个跳出来话举脚赞成。

正常人嘅反应，起码要好似下面个婆婆咁啦：

“吓，又嚟过呀？﹗我顶唔顺喇。”

“点解佢要咁做呀？”

事实上，旧年先有脱欧公投，跟手首相都换埋，依家提早大选又要投票，真系听到都觉攰。顺带一提，婆婆对于再次要投票嘅真摰反应，大家都好Like，亦都反映好多人心声，片段系网上疯传，瞬即做咗网红。

面对突如其来的大选，工党班议员除咗学地盘叔叔试著说：“也许我可以加班把事情做完”同埋“我会试著把这件事情插进工作进度中”外，相信最想做嘅就系趁机整走科尔宾。工党积弱，一直被指政治取态“太左胶”嘅科尔宾一早被指舵衰家被党友唾弃，今次May姐放狠招要收工党档，科尔宾天真地赞成，争在无攞两个啦啦球系手。

大选正常都要印单张呀、海报咁，依家党友连科尔宾个样都唔想出，仲话“你唔好同我提起佢个名”（don’t mention the C-word）。阴公猪嘅科尔宾系党友眼中已经做咗佛地魔。更令人惨不忍睹，系科尔宾的左右手根本无人识搞竞选活动，一盘散沙是工党的写照，“唔系时间问题，而系根本我地就唔系坐在同一条船”一名资深党员咁讲。呢个仲唔系May姐最想见到的画面？

May姐呢招叫“趁佢病攞佢命”。事前是咪一点蛛丝马迹都冇？都唔系嘅，同样畀佢吓窒嘅英国媒体，最近谂返，都觉得有古怪。

好似白宫有“滚蛋节”（Easter egg roll）一样，英国唐宁街十号都会系复活节前搞一场类似“捕获野生复活蛋”嘅活动。英国政治版嘅记者都会获邀，带埋小朋友一齐到首相府嘅大草地上，寻找大大小小的朱古力复活蛋。

细嘅当然玩得开心，至于部分心水清嘅记者就问：“蛋就多喇，不过首相去哪儿？”官员惟有打官腔，话首相有其他嘢做，遗憾地未能参与其中。

唔单止咁，本来要提上国会议程讨论嘅事项都不见了，真系耐人寻味。

May姐系呢段时间，原来去咗威尔斯行山洗涤心灵。有内情人透露，关于提早大选，其实特雷莎·梅已经谂咗一段时间，不过仍然未能下决定，直到系四月初同老公去威尔斯度假行山一星期，边行山边同佢嘅私人顾问兼老公讨论提早大选的好坏，最后决定依家正时提早大选的好时刻。不过，其实系佢度假之前几日，即3月30日，May姐透过发言人再一次话“将不会（提早）有大选，不会发生的”，时隔大半个月，却向全世界公布提早大选，今日的我打倒昨日的我。

特雷莎·梅今次已经唔系第一次华丽U-Turn，佢由一个平平无奇、寂寂无名嘅普通精英，突然大茄变主角，化身一国领袖，除咗系好似大部分古装剧主角一样，等，然后等了又等，等到花儿也谢了的时候终。于。机。会。嚟。喇。飞。云。把握机会反转猪肚，然后U-Turn转身射个三家姐，一舖翻身。

细细个已经参与保守党地区组织活动嘅May姐，1992年参选国会议员，真系输咗好几云，到1997年终于胜选，她已经41岁。这自是政治人物黄金年龄，然而当时保守党内有两位来自伊顿公学、风采逼人的政治新星：约翰逊同卡梅伦，一个细佢8年，另一个细佢10年，两人都是未来首相的材料，锋芒将作风平实嘅May姐完全掩盖，就算几打得都无用武之地。

佢国会议员张凳都未坐暖，双子星先后荣升国会议员之列，2002年她成为保守党历来首位女主席，终于争到个第一返嚟，令她信心大增。就系这个时候，原本衣著品味贴近传统女强人、天天黑沉沉行政套装的她，突然U-Turn换上色彩缤纷衣著，形象百变，鞋子日日新款，似有意为相位铺路，常常带工作返屋企OT尽显勤奋一面，可惜著到成只雀咁嘅策略仍然无助仕途。

那边厢，年轻有为的卡梅伦上位快过火箭，成为接近200年来英国最年轻首相。佢好识做咁比咗个第三把交椅嘅内政大臣位比资深过佢嘅May姐坐。不过内政大臣往往是“三煞位”，好难做得长，素有“政治坟墓”称号，但她韧力惊人做足6年几都无事无干，成为英国百多年来任期最长内政大臣。

而被踢出权力核心的约翰逊做咗伦敦市长之后，成绩亮丽，是时候找机会回朝上演一出王子复仇记。去年佢终于揾到大好机会，以为自己胜券在握的卡梅伦，为选举承诺“找数”启动脱欧（Brexit）公投，一路同佢讲支持“留欧”的约翰逊，转个头就做二五变身Brexit大将，博Brexit成功就可以反底当首相。呢个时候May姐做紧乜？

Suppose周围帮手sell留欧，但佢只系hea住做，公开场合少有为留欧护航，私底下被卡梅伦和内阁同事叫佢做“潜水艇May”（Submarine May）。佢咁做，明显系唔想被政府嘅留欧立场捆绑，力保政治筹码。

随脱欧派势头愈来愈旺，约翰逊以为终于可以踢走阻手阻脚嘅师弟卡梅伦，坐上首相宝座，不再是少年嘅佢还是太年轻了。正所谓现眼报来得快，今次轮到他身边嘅Brexit最佳拍档、司法大臣戈夫（Michael Gove）出卖佢，公投由脱欧一方胜出，戈夫快佢一步宣布角逐首相。查实呢啲都系小事，小道消息指，一众卡梅伦亲卫队不值约翰逊所作所为，威胁要“爆大镬”，将手头上有关佢嘅丑闻扬晒出嚟，唔知系咪真系身有屎，谂过度过之后，有丑闻前科嘅约翰逊死死地气宣布放弃角逐相位。

卡梅伦、约翰逊鹬蚌相争斗餐死，二五仔戈夫形象分输晒，成班男人揽炒嘅结果咪就系益咗May姐上位啰！就系咁，实力派嘅佢冷手执个热煎堆，终于一圆首相梦……哇哈哈

U-Turn又来了！

一直以为佢系留欧派，做咗首相后，大家开始估究竟May姐开边瓣。正路谂，作为留欧一员，佢潜极水点都唔会想同欧盟完全割席。就喺呢个时候，爆出一段去年5月佢以嘉宾讲者身分到高盛演讲嘅录音，在公众面前沉默又潜水嘅阿May，对住班iBanker即刻“留欧将军”上身，痛陈脱欧如何大镬，例如企业将撤出英国搬到欧洲大陆云云。哗讲到咁，各路专家梗系言之凿凿话佢会倾向“半脱半留”，让Brexit软着陆啦。点知……

所有人都。估。错。晒。她在毫无预兆下180度U-Turn转钛，讲明“Brexit即系Brexit”，竟与欧盟一刀切，毫无留恋，反面快过翻书。然后发表精彩的Brexit演说，“我们要建立更强大，更公平，更团结，更外向的英国”。啲内容咁熟口面嘅？有啲似特朗普日日噏嘅：“我们要令美国再次强大起来”（We will make America great again）㖞，里面到底有无咩暗示呢？

特朗普当选美国总统后，即刻打电话邀请May姐到白宫。佢肉麻地叫阿May做“我的玛姬”（My Maggie），将两人关系跟前美国总统列根与英国首相戴卓尔夫人嘅深厚情谊相提并论，列根会亲切地叫戴卓尔夫人的小名Maggie，侵侵似乎想有样学样。

一个系出晒名嘅女权分子，一个系不断侮辱女性的女人公敌，两个思想上大缆都扯唔埋嘅两个人，坐埋一台倾生意，识笑真系几好笑。做开生意嘅侵侵，清楚知道阿May需要啲咩，讲明会尽早跟英国签定“又快又公平”嘅贸易协议，自爆阿妈系苏格兰人，非常崇拜英女王，又让阿May成为自己入主白宫后首位到访外国元首，面子里子畀到足。而May姐虽然对特朗普一直都不以为然，但访美期间拖哂手咁，身体真系好诚实。

嗱，睇到呢到，就知道May姐一直系有部署，先系同其他国家打好关系，即使无咗欧盟呢个密友，经济都未至于要死。然后再“肃清异己”，唔撑脱欧的话就来个提早大选，依家估计保守党会系6月嘅大选中大胜，令到May姐拆Brexit呢粒炸弹会更得心应手，完全有铁娘子应有的智慧同手段呀。