王贻兴千字文疑闹ViuTV罔顾人命　大爆内幕：用人唯亲，度缩悭皮

MIRROR演唱会第4场发生严重事故，有萤幕跌落舞台压倒两名舞蹈员，事件震惊全城！政府更于凌晨时份叫停，腰斩余下8场的MIRROR演唱会。而曾在ViuTV担任节目《晚吹》以及以导演及编审身份，参与制作 ViuTV 剧集《VR驱魔人》和《黑市》等的王贻兴今日（29日）亦以千字文疑大爆ViuTV内幕，更称它是罔顾人命的公司！

王贻兴担任过多部广播剧、电视剧、电影的编剧和主持多个电视节目，包括无线电视、亚洲电视、商业电台和ViuTV，文中一开首他就称这场意外成为香港人的共同伤口，并透露意外成因：“钱唔系咁赚，骚都唔应该咁做。唔识做就唔该揾返真正专业嘅人去做，而唔系急就章，用人唯亲，私相授受，最后酿成今次不幸意外。”

他更大爆两间电视台根本无分别，甚至比大台更差：“衰啲讲句，大台咁垃圾咁hea，但咁多年嚟，就算当年涉嫌中饱私囊嘅商场骚，搞骚都冇悭皮到会缩减彩排时间、制作求其、乱咁外判，最后有呢啲大型意外发生……今次呢件不幸意外，或者系一吓好un 耳嘅丧钟，提醒我哋，如果继续咁样盲目支持果间电视台，其实系支持紧佢哋继续用呢种模式去扩大，去发展，去榨干榨尽旗下艺人，用最低成本，将艺人用最短视最悭皮嘅方式消费净尽，佢哋系咪挨残，情绪有冇问题，系咪身心疲累，仲会唔会再一次当众晕低，无论系咪佢哋嘅粉丝，都冇人想再见到呢啲咁令人心痛心酸嘅情况发生。”最后，王贻兴称之所有大爆内幕原因是：“有啲嘢呢几年嚟我一直沉默冇出过声，但当关乎人命，我都有啲嘢需要畀大家知道返。”

全文如下：

相信寻晚对好多香港人嚟讲，都系好沉重、好不安嘅一晚 震惊系嚟自香港一直引以为傲嘅舞台制作同安全，一铺清袋，而当中嘅风险，由开骚前Dancer嘅社交平台投诉，到开骚咁多日嚟各种惊险意外，就算作为观众，都睇得出好有问题，已经用尽各种方法向主办单位反映，但除咗啲门面功夫之外，最后，骚都系照做，抱住侥幸心态，得过且过，然后，就系原本可以避免嘅更可怕意外，香港开埠以嚟从未发生过嘅可怕画面，终于，响红馆发生，成为历史画面，成为香港人嘅共同伤口。

钱唔系咁赚，骚都唔应该咁做。唔识做就唔该揾返真正专业嘅人去做，而唔系急就章，用人唯亲，私相授受，最后酿成今次不幸意外。

令我哋彻夜难眠、伤心痛心嘅真正原因，其实，系我哋咁辛苦先至揾到啲值得欣赏支持嘅对象，同投入嘅事物，但点解？点解连最基本嘅享受娱乐都得唔到，香港人，连睇场红馆骚，都担惊受怕过以前睇果啲惊险筹款慈善骚，望住镜仔行嚟行去唱歌跳舞，仲惊过以前睇杨盼盼高空踩钢线，点解？点解观众要做埋主办单位做唔到，或者做唔好嘅嘢？

呢件事，真心荒谬。

我知道咁讲会令好多香港人觉得唔啱听，但实情系，果间大都认为好fresh，同大台好唔同嘅电视台，其实佢哋嘅运作模式同思维，根本就同大台冇分别。

又或者咁讲，最初真系有心唔想一样，亦都畀到我哋希望，但慢慢地，不幸地，由曾经同佢哋合作过嘅人，到街外人，都已经开始闻到果种大台味道，而且越成功，就越大台，点解？因为咁，先可以赚到尽，维持垄断，永保江山。

呢个，就系香港一直以嚟嘅成功方程式。

呢几年嚟，我哋都好唔开心，好迷失，好窒息，并且将太多情感投射咗响果问间电视台上面，正如我哋曾经将同样嘅感情，痴心错付咗响果位叱咤女歌手身上。

有啲嘢呢几年嚟我一直沉默冇出过声，但当关乎人命，我都有啲嘢需要畀大家知道返。由最初合作，感受到老板有心有火，佢哋好想做啲与别不同嘅嘢，到后嚟社会事件，然后公司大咗，揾多咗啲人返嚟话事，一朝天子一朝臣，以至一啲离开咗果度嘅签约艺人，佢哋嘅遭遇，被fade out 或者被雪藏，甚至某啲部门嘅对外态度，都描述紧一个好清晰嘅剧本畀我哋知，我哋，其实系响冇得拣嘅情况下，又或者太一厢情愿嘅想像下，喂饲紧一只，长大咗同大台其实冇分别嘅畸型怪物。一样用人唯亲，一样度缩悭皮，一样私相授受，一样赚到尽，罔顾演艺人员嘅安全同待遇，当能力越大，就越系顺我者昌，逆我者亡，到时，我哋只能嚟多次林X汶2.0，再次响失望中受伤沉沦，然后，同最初一样，响以为有得拣嘅情况下，支持下一个以为与别不同嘅新电视台/歌手/组合，然后一次又一次失望轮回……

衰啲讲句，大台咁垃圾咁hea，但咁多年嚟，就算当年涉嫌中饱私囊嘅商场骚，搞骚都冇悭皮到会缩减彩排时间、制作求其、乱咁外判，最后有呢啲大型意外发生……

今次呢件不幸意外，或者系一吓好un 耳嘅丧钟，提醒我哋，如果继续咁样盲目支持果间电视台，其实系支持紧佢哋继续用呢种模式去扩大，去发展，去榨干榨尽旗下艺人，用最低成本，将艺人用最短视最悭皮嘅方式消费净尽，佢哋系咪挨残，情绪有冇问题，系咪身心疲累，仲会唔会再一次当众晕低，无论系咪佢哋嘅粉丝，都冇人想再见到呢啲咁令人心痛心酸嘅情况发生。

越系喜爱呢一班年轻人，我哋就越应该提供一个安全健康同合理嘅环境，畀佢哋继续发光发热，展现才华，至少，唔需要响表演过程担惊受怕。

又或者我哋又系时候问一问，其实……公司同佢哋签嘅合约，真正有几多系落佢哋袋？会唔会最后得个做字，肥嘅都只系呢间是但求其，罔顾人命嘅公司？

我知道我以上呢番说话，可能会得罪好多人，但既然响当年大台如日中天，当大家仲系好钟意大台嘅十几年前，我明知讲咗出嚟会冇嘢捞，唔啱听，畀人误解扭曲，都仲系够胆死第一个企出嚟闹爆果间电视台，到今时今日，呢间电视台将会好大机会步大台后尘，我又点可能当冇件事唔出声？

香港人，值得拥有更好嘅电视台；香港嘅演艺人员，亦值得拥有更好嘅平台。

至少，唔系罔顾安全、只求赚尽，将香港人当水鱼嘅明日大台。