姜丽文忽然肚涨似十月怀胎　巨肚剧痛难挡：最糟糕是没有治愈方法

本来上年2月已经同圈外男友拉埋天窗嘅Lesley姜丽文，呢日突然贴出巨肚照，明明早几日佢先著住贴身红裙影贺年照，大肚速度快得惊人，但原来佢并唔系怀孕而系受病患困扰：“返到屋企个肚就胀到咁，非常之痛。”Lesley接受《香港01》访问时表示：“大约3年前知道有麸质敏感。”

好多都市人都有麸质敏感，即存在于小麦、大麦、黑麦，以至麦芽嘅蛋白质，平时要戒食所有麦制食品，如面包、蛋糕、意粉、饼干、薄饼等，Lesley呢日就系误食导致病发：“好多人会问我，如果食咗Gluten会点... 寻日唔小心食咗两粒龙须糖（我以为只系糖同花生！原来有麦！）返到屋企个肚就胀到咁，非常之痛，通常会痛多三四日先好返...两粒龙须糖就变成咁! 有冇人好似我咁要Gluten-Free? 起码有得食饭同米做嘅嘢已经好感恩了#NOTpregnant #唔系有咗 #唔使恭喜我住 #除非系恭喜发财”

留言一出引来唔少网友共鸣，Lesley无奈表示：“最糟糕的是没有治愈方法！！要终身戒麸质。”佢接受《香港01》访问时表示：“因为我本身有Endometriosis（子宫内膜异位症），一直有肚胀肚痛问题，近年愈来愈严重先去睇医生，佢叫我一定要戒麸质，好多女仔有Endometriosis都唔知道其实系唔应该食gluten，我通常食嘢都分得好清楚，但系龙须糖真系唔小心以为系冇gluten。可能因为我嘅麸质敏感源于endometriosis, 唔系因为普通敏感，所以好似好严重反应咁。未婚夫都好照顾我，不过呢个病同遗传无太大关系，唔会因此影响我地生育计划。”