【疫日揾食】黄婉曼豪宅区开餐厅　生意跌5成：包场兴趣班取消晒

蓝天白云，椰林树影，水清沙幼，坐落于将军澳南的世外桃源……
适合一家人、扶老携幼、沿着海边，吹着海风，散散步、踩踩单车、轻轻松松，享受悠游时光。在新冠肺炎（旧称：武汉肺炎）爆发之后，附近的街坊活动并没受太大影响，然而，无论男女老幼，都一定会戴上口罩。

人口密度较巿区稀少，在疫巿之下，看似没太大分别，但实际上，黄婉曼（Icy）去年在将军澳南区开办的“RISE Kitchen”，受新冠肺炎疫情影响，却实实在在失去了一半的收入来源。“RISE Kitchen”是一间集Café及烘焙学校于一身的面包甜点店，Icy选址较偏远的原因，旨在提供一个舒适的环境令客人纾压：“香港人都好压抑，永远喺闹巿好挤迫，所以我就想有一个空旷啲嘅地方，好舒服，真系可以坐落嚟好放松咁去饮杯咖啡，同朋友倾吓偈，或者一家人聚会嘅地方。其实当时我拣呢度而唔系闹巿，都已经有个心理准备个人流系会少啲，个收益冇嚟得咁快。”

收入减少一半

在疫巿之下，Icy坦言餐厅的部分的生意未受太大影响，虽然店内客人较之前少，但外卖生意却有轻微增加：“有啲街坊就会嚟买完外卖拎返屋企食。不过可能Home Office嘅人多咗，我见到有唔少人都攞埋部电脑落嚟做嘢，同埋又多啲啲区外嘅人过嚟，可能佢哋又想揾个海边，呼吸吓新鲜空气。”然而，约一星期一次的包场生意例如生日派对、公司聚会等，在疫情爆发之下尽数取消，烘焙学校部分的收入亦全数归零：“而家卖包同放包嘅位，原本就系用嚟上堂嘅，我以前有啲面包、甜品兴趣班，亦都会有啲世界级嘅甜品大师过嚟开班授徒，但而家咁取消晒，（课堂很频密？）一个星期会有两、三日，星期六、日就一定爆满，我每两、三个月就会请啲专业嘅大师嚟做培训，但而家啲外国人都唔会嚟喇，所以全部都取消晒，上堂嘅位置我就用埋嚟放台，令个环境宽松啲，客人都坐得舒服啲同埋安心啲。”

老板娘亲身洗厕所

生意减少，工作理论上亦相对减少，但实际上却恰好相反。专访当日，由记者来到餐厅，到专访结束离开的一刻，Icy的工作没有一刻停止，记者感觉似阻碍到Icy的工作，Icy解释谓：“今日咁啱要做一啲摄影嘅工作，所以特别忙碌。我好贪心嘅，好专制，乜都要理。同埋呢段疫情嘅时间，可以畀我哋去思考吓点做得好啲，例如谂吓啲新菜式呀，谂多啲嘢去充实自己。我一路都好钟意影相，咁我而家就多咗时间同空间去做帮我啲面包影靓靓相，例如以前坐满晒人，但而家我就可以喺啲吉位，我就可以善用喇。”Icy平时回到餐厅几乎所有事情都会涉足，但最重视和紧张的是洗手间：“干净，系客人嘅感觉嚟，通常我第一时间就会入洗手间，要执干净佢，垃圾我会执、抹干净唔会湿漉漉，检查洗手液齐唔齐。”

抗疫措施

在疫巿之下，Icy亦有为餐厅积极搜罗抗疫产品，务求令顾客放心消费：“首先要由员工做起，要确保员工健康，冇外游，每日Check住体温，留意有冇病征，全部人做嘢都一定要带口罩，由公司提供。另外喺客人方面，除咗定期会为餐厅消毒之外，客人入到嚟可以用我哋提供嘅消毒搓手液，亦都有啲酒精嘅纸巾可以清洁佢哋嘅用品，例如电话，仲有支益菌消毒喷雾，系可以食用嘅，用嚟清洁吓个台面呀，餐具等等，呢支嘢系我扑返嚟㗎，基本上所有消毒产品都系我扑返嚟。”

睇吓Icy嘅工作：

“好幸运地，疫巿环境之下，反而多咗人嚟一啲偏远、开扬啲嘅地方，所以我觉得都好好彩。”但Icy对于今次在疫情中某程度上的“因祸得福”彻底抗拒，只是庆幸自己仍然能够维持营运，“成件事令到大家好辛苦，大家都要好小心翼翼。令到我好伤心嘅一件事系，就算嚟到空气清新嘅地方，有时星期六、日，见到啲小朋友出嚟踩单车，玩滑板，放狗，啲小朋友全部都戴住口罩，所以我系觉得好伤感，因为喺一个感觉优美、空气清新嘅地方，但大家都要戴住口罩，仿佛好似空气有毒咁，同埋食嘢都要食得小心翼翼……对不起……”说着说着，Icy突然激动，热泪盈眶：“我自己作为妈咪，我个女都好耐冇去过街……所以我觉得，今次呢个疫情，对全香港都绝对唔系一件好事。”

睇埋专访当日，Icy餐厅嘅情况：