【早霸王】女听众太心急表白　快过男方打俾森美获赞：呢啲好女仔

又有听众要求心仪对象喺《早霸王》表白，之不过，今集嘅“剧情”有少少反串同惊喜。女听众冯小姐表示因为呢排闷闷哋，于是开始玩交友apps，就系咁俾佢识到沈先生，仲约埋出嚟见面。“出嚟食饭有倾偈，因为自己比较感性而佢好理性，所以好多新观点。”单凭呢一句，森美已经认定系有爱。

冯小姐表示第二次见面食饭后，二人一齐散步。“佢有问我开唔开心，我话开心之后，佢话咁不如一齐，𠮶时太突然，唔知一齐系咩意思，一齐搭车定一齐食饭？所以无好直接咁回应佢，返屋企之后我有同佢讲如果打去《早霸王》表白的话就当系真。”冯小姐表示对方自从收到order之后，开始表现得啰啰挛，又话对方比较内敛，要佢喺空气电波中表白可能有一定难度。“但我叫佢有认真考虑过已经好感动，其实我都可以同佢讲返（表白）。”

听到女听众肯反客为主，森美连声大赞“好女仔”。电话接通后，一听到系来至《早霸王》的电话，沈先生都已经大概明白系咩一回事，森美于是就问佢做咩唔做主动，并质疑佢系唔够爱同玩玩下，仲话：“怕羞又走去识女仔？人哋女仔就唔怕嘅？”沈先生连声否认，并指同朋友商量过之后，觉得自己讲故仔平铺直叙，加上唔想俾人知，所以迟迟未出手。森美决定接通双方电话后，要由沈先生表白。或者系因为太心急，冯小姐一听到沈先生把声后，即时将心底话讲出，虽然表白成功，但森美依然坚持要沈先生表白，并谓“唔好以为追到手就唔使负责”，最后，呢一集嘅“你知道唔知道有人挂住你”变成有两次表白，真系好浪漫。