陈百祥上港台节目讲“瞓街论”惹网友嬲嬲　监制：唔评价嘉宾表现

相信大家都好清楚陈百祥（阿叻）嘅真正嗜好系咩，唔系讲紧赛马同足球㖞，我系讲紧用把口认叻呢样嘢。今日下昼，阿叻喺港台节目《视点31》里面继续发挥牙擦擦本色。喺节目开冇耐，身为职业高尔夫球协会名誉会嘅阿叻，就质疑参与房屋、地政事务多年嘅黄远辉，系咪适合担任土地小组主席：“揸Fit𠮶个叫黄远辉，佢只系做Banker，只系识炒股票、睇外汇，点识土地？”

阿叻又爆惹火言论　“美国人都要瞓街”

之后，阿叻好快就直斥高尔夫球场起住宅系荒谬：“房屋就系房屋，运动就系运动。”但讲完冇耐佢又话部分高球场地改成住宅用途非不可行：“拎少少出嚟绝对唔介意，但最好唔郁，我哋几多小学生学紧波，仲有17万从业员，𠮶啲人咪会失业？”阿叻亦话香港住屋问题一直都存在，自己亦住过㓥房：“你嚟得香港住，就要接受香港从来都系贵嘅地价㗎嘞，而家讲紧西雅图，美国人都要瞓街，而家（香港人）都系瞓细啲嘅房，细啲嘅厅。”讲真，呢句嘢真系几劲，本身就明明讲紧香港嘅土地问题，而佢就拉到去西雅图咁远，听完真系唔知点应好。

网友话阿叻又呃嬲　监制唔评嘉宾表现

睇完节目或者相关报道后，好多网友都话阿叻又喺度“呃嬲嬲”。咁其实港台方面系唔系特登揾阿叻，博佢又讲出位言论呢？《视点31》监制唐敏明接受《香港01》访问时，就话揾阿叻上嚟节目，只系因为阿叻系代表紧高尔夫球爱好者嘅立场：“佢讲嘅嘢，一定会有人同意，同时亦都一定有人唔同意。”咁会唔会觉得阿叻嘅言论太Over？监制就答：“我唔会评价各个嘉宾嘅表现，我只多谢佢哋愿意上嚟讨论。”

曾话黄之锋八大不入　“跪低论”向网民挑机

其实一直以嚟阿叻讲嘅嘢都真系好爆，好似2015年佢上港台节目《我系乜乜乜》时，佢就狠评黄之锋：“八间大学都考唔到，我点话你叻呀？”又话自己如果今日后生啲，就有机会做到facebook创办人；如果自己系90后，更加有机会做到特首呢个位置。搞到黄之锋又忍唔住喺网上回应：“陈百祥冇读大学兼会考得13，咪照样做咗一线艺人。”阿叻嘅威水史虽然不能尽录，但大家最深印象都应该系台庆挑机件事，当时好多人都因为香港电视网络（HKTV）拎唔到牌照，就打算喺TVB台庆当晚发起罢睇行动，而阿叻就公然向网民挑机：“如果熄机可以令TVB只有2、3收视，我就跪低，一路由将军澳跪到返屋企。”