十大曾效力TVB男星童年相 黎明惊似小丸子
昨日睇完一众 TVB 现役女星嘅学生相，今日继续同大家睇吓十位曾经效力无线嘅男星的童年照，我哋知好多大家都可能见过，所以尽量揾啲比较少曝光嘅相，睇吓你哋又认到几多个！
古天乐
被同事形容肥到好似林雪咁嘅BB，估佢唔到竟然系影帝古天乐呀！细细个嘅古仔真系好可爱好可爱好可爱，可爱到想搣佢面珠仔，不过如果对住依家嘅古仔，应该未行埋去已经被佢凌厉嘅眼神吓至退避三舍。
陈键锋
大家好耐无见过嘅陈键锋，依家在内地发展得相当唔错，佢于内地古装剧《美人心计》中饰演第一男主角刘恒，被誉为“史上最帅皇帝”。陈键锋五官标致，不时在剧集中以女装示人，而毫无遗和感。细个时嘅陈键锋，虽然五官不及长大之后咁立体，不过都有几分女仔嘅娇气。
郑伊健
郑伊健早年凭《古惑仔》系列，饰演陈浩南一角红遍中港台，长发加带点杀气而深情嘅眼神，掳获不少少女（依家可能已经变成师奶）嘅心，但BB仔时嘅伊健圆碌碌，笑起来人畜无害（虽然个个B仔笑起嚟都系天使一样），同依家嘅伊健真系分别好大啊！
王祖蓝
王祖蓝细细个影相已经招招积积，表情多多，眼大大相当可爱，好似同依家唔系好似样呢！
黎明
其实呢个都易估嘅，小时候嘅黎天王带有几分傻气。再睇真啲，顶住一个冬菇头嘅黎明，其实真系有几分似第一代小丸子真人版演员森迫永依。黎明刚刚荣升爸爸，唔知BB又生得似唔似佢呢？
林峰
林峰贵为厦门李嘉诚个仔，细细个已经一副老板样，面圆圆，额头劲高，听讲额头高嘅人特别聪明，不过可能峰哥演艺歌唱事业特别出色，所以唔系好睇得出佢嘅其他才华。
梁朝伟
影帝朝伟自细就有一双忧郁的眼神，而另一张摆出如来神掌嘅相，细细个就钟意武术，似乎系佢日后成为“一代宗师”嘅伏线。
周星驰
星爷细个都系一个大头仔，笑起上嚟都几可爱吖！
黄宗泽
相信大家都见过黄宗泽17岁选校草𠮶张相，呢两张年代久远啲嘅 BB 相同童年照大家又有无见过呢？ BB 𠮶张相块面圆碌碌好可爱，另一张大约十岁，抱住猫嘅相，轮廓开始明显，果然细细个已经系型仔。
张家辉
细个嘅家辉有点怕丑腼腆，同欠缺一点自信，而依家不只系七料影帝，仲做埋导演，家庭美满事业有成，成个人自信晒！
吴卓羲
吴卓羲细个对眼好大啊！加上头发长过耳仔，有几分似女仔，都几可爱！同依家行型男路线，真系分别好大呢。