碧咸戴米奇头箍卖萌　童心未泯孖仔女游主题乐园劲贪玩

网上成日睇到好多片段，警告世界切勿独留儿童与爸爸单独一齐，小朋友分分钟会成为阿爸玩物令人哭笑不得。凑BB可能妈妈叻啲，但陪小朋友放电就应该系爸爸强项啦。碧咸（David Beckham）与Victoria婚后育有三子一女，爸爸不时抽空陪佢地周围去，呢日杀入主题乐园，不过睇相似乎碧咸先系玩得最开心𠮶个噃。

男人永远系大唔透嘅生物，无论几多岁都要玩玩具，差在D玩具系模型定系实物。廿四孝爸爸碧咸最近同老婆Victoria，带埋小朋友一家大细去主题乐园。睇完佢地分享嘅相片，不禁问句：到底系小朋友想去定碧咸自己想去呢？事关戴老鼠头箍扮可爱嘅系碧咸，玩机动游戏High到举晒手嘅又系碧咸。

Victoria IG仲有一段跟喺碧咸身后一齐行嘅片段，行行下叫声：“David﹗”戴住太阳眼镜嘅万人迷拧转头望老婆，依旧靓仔之余，配上超可爱米老鼠头饰以及充满童真嘅笑容，到底边个玩得最开心睇嚟真系呼至欲出啦。