As One跳舞齐MV又好睇　有啲怀念呢队香港难得的女团

说也奇怪，香港啲女子组合近期好似全部失晒踪，无晒消失嘅？定系其实有，不过无咩特别、吸引之处，连讨论都可以悭返？咁样讲其实都几sad，亦更加令人怀念已经解散咗嘅As One！

As One成员青春靓丽，歌曲风格、MV气氛偏向韩风，更难能可贵嘅系做到香港好多女子组合做唔到嘅事，就系舞步画一整齐，跳得相当好睇，而歌唱方面亦都唔差，所以与其听As One嘅歌，不如“欣赏”佢哋MV，某程度嚟讲都系一种享受。未欣赏过？介绍你睇睇《Catch Me Up》、《4EVER》、《Candy Ball》、《Hey Ya》。

可惜，2012年成立嘅As One经历过数次成员变动更替，先有Oli、Elfa、Nata及Shin四位，后来Oli与Elfa因伤病离队，换上Chloe和Kayan。至2017年中、上旬，随著Nata同Shin离开，只剩低Chloe、Kayan二人嘅As One名存实亡，最终喺2017年12月解散，历时5年。

Oli黄佳宜

As One成立前后6位成员中，最早离开嘅一位。据闻佢2013年因子宫生瘤嘅关系而暂时退出休养，并于次年一月正式回归。不过，2014年8月再因身体健康、学业等原因正式退出。

Elfa邱念恩

人称花花，当年一头金发最抢眼，加上身形窈窕却又不失丰满，因此颇得巴打们欢心。喺Oli退出后，As One以包括Elfa在内嘅三人组继续活动，随后先有Chloe和Kayan嘅加入。不过新人加入后两个月，Elfa就因伤患为由退出。而家嘅花花发色无以前咁金，亦多咗一啲可爱嘅baby fat，由以往嘅索女，摇身一变为可爱清纯风格嘅女仔。

Shin吴思佳

中韩混血儿，队长、第一主唱及主Rapper。由于As One单曲《Candy Ball》推出韩文版，As One成为首个喺韩国出道嘅女子组合。而Shin因为韩国血统、识啲韩文，获南韩电视台邀请参与女团育成节目PRODUCE 101后，短暂退团，并喺节目中杀至廿二强才止步，但足以帮佢储落唔少香港以外嘅粉丝，所以作为第4位离队嘅Shin，选择跳槽离开喺内地单飞出道，不无道理。

Nata陈苑澄

Nata只系艺名，离队后嘅佢叫做Tania，据闻当初佢喺自己提出提前同太阳娱乐解约。相比起其他几位As One嘅队友，Tania睇落系变得最少嘅一位，而日前佢亦相约Chloe与Kayan二人聚餐。

Chloe苏皓儿

模特儿出身，曾参演方力申《舍．得》MV，其后亦与男方打篮球而传过绯闻，不过Chloe的绯闻对象很快就转变为王宗尧，因为酷爱打篮球的她，被发现抆住王宗尧衫尾现身足球场，充当男方嘅摄影师，影低王宗尧球场上嘅英姿。Chloe现今工作量较少，传闻因为同王宗尧嘅关系令佢被雪藏，而近日佢亦剪短头发，以新形象示人。

Kayan陈嘉茵

Kayan可说是As One当中，单飞成绩最成功嘅一位，事关佢自发为周董的《告白气球》跳COVER DANCE并上传上网，成为一时热话。其后又转战台湾，参加当地综艺节目《希望之星》，凭扎实唱跳功力最终获得总亚军。不久前Kayan亦有现身《流行经典50年》展现唱、跳以及弹古筝的功架。