古巨基重做主持访问民间特首　刘德华笑评：你都系做返歌手啦

昨晚食饭时间打开电视，睇住陈贝儿主持紧《东张西望》，但把声……竟然系男人声嚟嘅！搞咩鬼呀？镜头拉返远，原来陈贝儿身边坐住个古巨基，吓得我吖。原来古巨基重返TVB做嘢，系想体验返当年艺训班毕业后做过嘅工作，仲美其名为“初心再体验”添。

古巨基有过唔少主持节目嘅经验，不过昨晚佢嘅表现就有啲......应该系话仲有啲可进步空间，事关有唔少时候都系靠陈贝儿一个一轮嘴咁支撑大局，古Sir好多时都讲唔够几句说话，而且每次开口接话都系几秒上落，特别系准备介绍“自动驾驶车撞死人”𠮶部份。

或者可能系紧张嘅缘故啩，毕竟古巨基初入行时做过无线《娱乐新闻眼》嘅主持，今次要重执《娱乐新闻眼》支咪，再次访问已上神台嘅刘德华，紧张系人之常情，就连接受佢访问嘅刘华都取笑佢：“我check吓你手心先。哗！仍然系咁湿。”

除咗手心湿晒，古巨基讲嘢更周不时口窒窒，问嘅问题亦太正经，唔好怪讲得太诚实，呢段访问有啲啲闷，尤其系同佢以前访问刘华时一见面就冲上去锡一啖相比。好彩，佢最后一个问题够精警，刘华亦答得够抵死：“（你觉得我今天做主持……）比以前差呀！你都系做返歌手啦，哈哈。”

刘华讲得啱，唱歌嘅古巨基系最正嘅，而佢近期频频现身，又上《流行经典50年》、又客串《爱·回家之开心速递》做客串外卖仔，最主要目的都系增加曝光力谷嚟紧红馆演唱会啫。所以，大家应该唔难发觉，踏入2018之后古巨基老是常出现，不单个人社交网络更新得密咗，内容涉及嘅范畴多咗，打机、砌模型、打麻雀等等等等，夸啲讲就系包罗万有，俾人感觉系想尽量接触，甚或满足唔同喜好嘅观众。之后又揾嚟近期人气爆灯嘅子华神同佢一齐孕育《子华说》。男神都为你入录音室揿紧张掣。日前又一身科幻战士look走到街上挑战发呆一分钟，随即又走入人群搭埋巴士，拉近同市民嘅距离，形象十分亲民。咁多谂头咁多搞作，边个够你玩呀古Sir。

顺带一提，昨晚一集《东张》播出两段古Sir青涩年代做主持时，访问刘华时玩咀嘴、访问王菲时中鸟粪、访问林志颖时听唔明对方普通话讲咩嘅经典片段，大家不妨揿开条片睇吓吖。