汪明荃入行50年喺半岛酒店大搞　唐英年、范徐丽泰都嚟好有Face！

今年系汪明荃入行50周年，大台落重本帮阿姐大搞，Book咗尖沙咀半岛酒店大堂举行《汪明荃50周年世纪盛宴》，听讲系半岛酒店第一次借出大堂被人搞活动，阿姐相当有面子！喺娱乐圈打滚咁多年，阿姐相识满天下，今次邀请咗成120位重量级嘉宾到家，除咗系圈中嘅大哥阿姐级人马之外，好似Do姐、罗兰、胡枫、谢雪心、苗侨伟、夏雨、刘松仁、盖鸣晖等等，仲有嚟自政界同商界嘅朋友，范徐丽泰、周梁淑怡，就连唐英年都嚟埋，真系仲大阵仗过TVB搞台庆！

嘉宾阵容仲劲过台庆：

真系唔系讲笑，大台嘅艺员倾巢出席，王浩信、黄心颖、王君馨、岑丽香、王祖蓝、李亚男、黄智雯、家燕姐、商天娥、宣萱，就连过咗档去Viu嘅陈慧珊都有出现，仲唔止，今晚净系做司仪嘅都有5个，仲揾嚟李克勤、杨千嬅、容祖儿做表演嘉宾，对上一次Joey同千嬅同台都唔知系几时。

今晚咁星光熠熠，原来全靠阿姐亲自出马逐个打电话去邀请，宣萱仲话为咗去阿姐呢边推晒所有工作嚟。阿姐一出场，身边有壳王陈国强同乐易玲一左一右扶住入场，真系冇乜边个咁有面子可以有咁嘅待遇，阿姐一身桃红色长裙进场，珠光宝气，阿姐霸气咁话：“全部真嘢嚟！”，今晚嘅表演内容暂时要保密，未可以出街住，但阿姐透露Joey同千嬅唱佢嘅歌唱得好好，大家记得到时捕实个电视喇！