Gin Lee最艰涩时期每晚天黑喊到天光：瞓一阵起身无限loop｜专访

Gin Lee将在3月19日参加一个名为“若然世界没忽略 2024”的保单捐赠音乐会，你以为又系卖广告？其实别具生命意义。Gin Lee提及到一旦自己有咩三长两短，会将自己人寿保险的1%自动捐去一间她指定的慈善机构。Gin Lee一向关心动物也关注情绪健康，亦正正因为这两个元素都是她切身的经历。

摄影：叶志明

Gin Lee讲到，好多谢主办方邀请她参与一件如此有意义的事，自己也是第一次接触这个想法，亦视为是离开世界前最后一个回馈社会的机会，她说：“可能我哋每一日好忙，有好多嘢你会忽略咗，你好想做，但时间每一日咁过。可能你到咗一个年龄都未做，可能系一啲你好想支持嘅慈善机构，可能系一啲你嘅梦想，就系因为你每一日都应付你嘅生活，你面对嘅生活压力，咁你就可能拖延咗本身想去做嘅一件好事。呢个就好似你离开呢个世界前最后一个机会去回馈呢个社会。”

Gin Lee表示自己会将自己人寿保险的1%自动捐去一间她指定的慈善机构，一向关心动物也关注情绪健康的她，有可能两个机构都会选择。Gin Lee感慨地说：“其实有几方面我系会特别关注，小朋友、流浪动物、情绪病，呢几个我系几有感觉，好多人对动物生命意识好低，导致好多遗弃出现喺我哋社会。情绪方面，尤其近年真系多咗好多，同埋年轻化咗好多，可能生活压力。尤其系我觉得完咗Covid之后会更多有情绪困扰嘅个案会浮现，因为完咗Covid好多真正嘅问题累积咗三四年先浮现。所以我觉得要更加多啲去关心有情绪困扰嘅朋友。我见到好多小学生中学生佢哋都面对好多，来自父母嘅压力，来自学业嘅压力。咁我哋要做多啲嘢去关注吓佢哋。”

提到情绪病的经历，Gin Lee相信每个人或多或少都试过，自己亦不例外，尤其是初初离乡别井来到香港这个全新的地方奋斗，亦曾经有段好迷失的时间，由细到大听过别人说的黑暗期，自己终于感受到。“咁我当时经历𠮶段低潮嘅时候，呢个感觉好陌生，因为从来冇试过，原来我可以去到。我由细到大都系一个好有信心嘅人，我𠮶段时间系完全冇信心。对于自己系完全失去信心，冇勇气做任何嘢，我系觉得点解会咁样嘅？原来𠮶种无力感就系好多有情绪困扰嘅朋友，佢哋成日讲嘅，‘我提唔起劲去做，我返唔到工，好似做乜嘢都冇一个动力’，我经历过呢一段时间嘅，所以我好明白。好好彩我可以自己行返出嚟。”

那段时间，Gin Lee形容自己尤如走入黑洞，不停被一股力量卷入漩涡之中，亦知道自己再沉沦下去，便会开始控制不了，她说：“唔系话做傻事𠮶种，但系我feel到心理状况好强，我再沉沦落去呢我唔知会发生咩事。我𠮶段好沮丧嘅时间都维持咗好多个月，基本上每一日你天黑就会开始喊啦！跟住喊到天光太阳出来啦，跟住就唔得啦，我要瞓觉喇，瞓一阵又起身无限loop。去到有一日，我就问自己，有用咩咁样？唔通我会喊到有个办法可以解决现阶段嘅问题？咁我喊系冇用架嘛，去到一个位抒发完啦，咁你都要揾方法架嘛，唔可以净系惊同埋喊。咁跟住我就鼓气勇气，唔好再不断循环呢个咁嘅层次。”

幸好，Gin Lee找到方法自救，但她也指并不是一朝一夕的事，不会说你睡醒一开眼便若无其事，而是要经过长时间的斗争，与自己的心魔抗衡。“冷静吓，用自己嘅理智谂下我可以点，不如揾下朋友呀，不如试下求救呀，不如试下问下人嘅意见啦，咁可能有办法呢？无办法都唔紧要，至少你同人沟通先，唔好自己谂埋一边先。咁我就慢慢，但唔系一朝一日，唔系话突然间我决定咗就做到。而系你做到啦，跟住第二日，你又会觉得想放弃喇，跟住你又要同自己讲我要再继续，系一个斗争嚟，你要不停去将自己pick up返啰！需要耐性，需要时间，同自己讲唔紧要，你慢慢每一日行一小步，你就会行到。”