乐坛浪子王杰唔惨情唔唱歌　教识你“哭泣声绝无意义”

有“乐坛浪子”之称的王杰早前上内地节目《金曲捞》，突然自爆迟下会宣布退出乐坛：“我这十几年写了十几二十首歌，都是自己写的。然后我会出一张唱片，是最后一张唱片，出完了，我便会离开。”结果震惊了13亿人。呢番说话，就好似回应紧佢其中一首歌《我会知道几时要退》。要做到呢一步确实唔容易，呢个消息一出，不少人脑海就系浮现王杰出道到现在多首经典嘅情歌。众多情歌，加上王杰沧桑嘅歌声，听到都会掏心掏肺，总有几分沧凉。虽然好惨，但系冇佢嘅歌声陪伴，有时候感情带来嘅伤痛，就好似冇人同你分担咁。所以，为大家介绍几首王杰惨情歌。苦情人，来度过一个无眠夜！

几分伤心几分痴

“哭泣声绝无意义”，分手之后挂住前度，奈何声嘶力竭都冇用，真系需要发泄。虽然“分离从来不易”，不过谂谂下，“若是热烈地爱多一次，放弃原来更易。”就系咁，呢啲想法来来回回系脑海挣扎......唉，鬼叫失恋系咁咩。

谁明浪子心

呢首歌一定唔会陌生喇，实有几个朋友唱K会点呢首，仲要扮王杰嘅哭腔去唱。其实浪子点会唔想拍拖呀？但系“听说太理想的恋爱总不可接触”，花尽时间在人海寻觅.....倒不如其实自己一个更开心。

是否我真的一无所有

失恋之后，其中一个阶段就系质疑自己，一来就系问自己：“系咪真系分开咗？”，第二样就系：“冇咗你，其实我真系根本咩都唔系。”总之就系好痛苦。

酒醉酒醒

相信大家都试过失恋嘅时候，会借酒消愁。不过酒入愁肠愁更愁，酒精上脑个一刹，不其然就会谂起好多往事、美好回忆。半醉人间，就在甜蜜与伤痛之间拉扯，呢首歌大概就系呢种感觉。

不浪漫罪名

有时拍拖，细水长流嘅感觉先系最安稳，但奈何大家追求嘅嘢都唔一样，系要浪漫先至系爱嘅表现......其实我想话你知：“行动系胜过一切㗎！”你感受唔到都冇计。

忘了你忘了我

“别忘了我曾拥有你，你也曾爱过我”，但呢啲完全系空想。或者我哋系两个世界嘅人，分开之后，你就一早将我抛诸脑后。唯一办法就系忘记自己，先可以忘记我曾经爱过你。

伤心1999

只可以话，伤心从来都冇年份之分。要伤心，几时都得。

又爱孤独又爱你

失恋，其实系一个尴尬状态。知道自己要Get Over，但偏偏情绪袭来......“但此刻为何为何特别挂念，是那哀痛污染空气，没法逃避”王杰嘅歌就系咁有层次。