【开心速递】KC心仪靓女Anita兼职做金融　梁茵：𠮶3年系人生谷底

相信大家一定不会对梁茵(Kiko)这个名字有印象，但如果大家前几日有睇《爱·回家之开心速递》，KC在剧集内正追求一个十分漂亮的文员女生，名叫Anita，佢就系梁茵喇！其实Kiko跟《爱·回家》系列十分有缘份，因为佢系做齐四辑，第一辑仲做足七个角色，认真巴闭！不过比较为人留意的却是第二辑做李淇(Kay)这个角色。其实自从2012在TVB拍剧，之后2013年入读第26期无线电视艺员训练班，这五年间她清一色做跑龙套的角色，可能会间中出吓场，但大家都唔会好太记得佢，唔好话真系，甚至令角色名都叫唔出。

入行几年都只是得这些杂碎的机会，正常人都会心灰意冷，Kiko在接受《香港01》访问时说：“紧系气馁喇，但我因为脱离咗新人约，所以我有另一份工做金融嘅，系支援我生活，如果我剩系靠TVB份人工系生活唔到啰。新人约𠮶三年系我人生嘅谷底，每日都唔敢使太多钱，可能只系用五、六十蚊就算。买波仔炉饭当一餐，早餐就食面包，又唔想问屋企人拎钱，可能因为我好细个就有呢个思想，大个咗系唔可以问屋企人拎钱。”其实TVB一向出名人工低，好多人都要靠出show，登台或者兼职生活，而且Kiko并没有家底，所以条路真系好难行。

当年读演艺，明显就系因为喜欢做戏，𠮶阵俾TVB睇中，便毅然加入TVB，不过都要作出一些选择，她说：“𠮶时我考入去去艺训班，但TVB要我签约，但𠮶阵我又未quit演艺，因为𠮶边系degree嚟架嘛，所以会觉得好可惜啰，牺生咁大但结果又未必系自己想像中咁好。不过最终结局系点暂时都未知嘅，好似黎耀祥𠮶啲都挨咗成三、四十年先有咁嘅成就，可能我嘅演技未够炉火纯青。公司入面嘅人缘又未系好好，因为好多人都人缘好好架嘛，加上我又系无背景咁入去，我爸爸妈妈又唔系边个，有时都要讲人事关系嘅。”无论系演技、人缘或者关系都好，好多时都要配合彩数，演员穷一生可能就只等一个机会，不过Kiko只有23岁，实在还有大把时间。

即使在最心灰意冷的时候，Kiko也没有选择放弃，因为有好多朋友支持她，她说：“有个人同我讲，当初由pa做到导演都挨咗好耐嘅时间，每个人都会有呢段时间，不过长短不一，只有挨过咗就会成功。就系呢返说话鼓舞咗我继续行落去，即使TVB人工唔够我生活，咁我咪揾份工一路做一路拍戏啰，我心入面团火仲烧紧架！”除了朋友，连家人都好支持她，即使之前未必可以拎家用返屋企，但Kiko的妈妈都不介意，还说自己可以不做兼职转做全职，不过Kiko婉拒了妈妈的好意，她不想花屋企的钱她说：“我好草根架，我爸爸做地盘，妈妈做家务助理，所以真系好草根。因为想俾细佬一个好嘅居住环境，由公屋转做居屋，所以佢地好俾心机储钱，当时都问咗亲戚朋友借钱，因为以前虽然话上车容易，但揾钱都唔易架嘛。”靠自己的确系有志气，即使在最艰辛的时候也没有因为种种籍口而放弃自己的理想，上天不负有心人，希望第时会有更好的机会给她发挥喇！