方绍聪与伍富桥参加毅行者　大爆当年由现已发福的前天团成员推荐

“乐施毅行者”将于今年11月24至26日举行，三位无线（TVB）艺人方绍聪（奶仔）、伍富桥（Alvin）和吴业坤更同队出赛，奶仔与Alvin接受访问时指，将毅行的精神放在自己的演艺事业，奶仔更大爆当年的推荐人原来亦是圈中人。

首先谈及两人为何要参力毅行者？Alvin指自己今次是第一次参加，他说：“点解有咁嘅机会呢？都要多得奶仔，因为佢系有一日网上DM我问我有冇兴趣，我都有啲愕然，因为真系冇合作过，有试过喺山上面行过一次。我有问佢点解揾我，因为佢见过我玩山赛。”

奶仔表示：“我哋呢行业行山唔多，钟意跑步多，因为我见过佢行100公里山赛。我今次系第5年行，我就系你（伍富桥）嘅毅行者推荐人，我第一年带我行系张致恒Steven，𠮶阵十几年前，啱啱入TVB，好努力训练。虽然佢叫我行，但佢竟然慢过我，我又慢佢又慢，我哋行咗43个钟，好辛苦。佢𠮶时都Fit架，佢叫我行𠮶时佢已经唔系第一年。”

两位都身处演艺界，算是浮浮沉沉多年时间，近年终于比较有突破性发展，奶仔开始有自己的节目，Alvin除了拍剧之外亦重拾老本行再出歌，毅行与事业原来可以有关联？

奶仔说：“毅行者建立咗我嘅价值观同处事态度，因为好多时行得咁辛苦，好多问题会出现，睇你点睇呢件事，教到我点样做人做事。我哋一齐开工𠮶时，如果要朝早07去外景打仗，行山好热，但如果好似我咁参加毅行者，你会觉得都轻松。点解呢份坚毅同事业可以关联到，我觉得好多时只要你好热爱件事，你就唔会放弃，你唔会觉得过程辛苦。我哋行得完，想出钱出力，有人筹款畀我哋完成目标。同做艺人一样，当初入呢行因为热爱呢个工作，想继续留喺度承诺自己嘅初心。”

Alvin亦指：“好多时唔系咁顺境，当你要等时就系咁嘅意思，我自己玩过一次100公里，原来自己可以挨到咁长时间，玩山赛可以令人生有启发。”

但心态依然是最重要的事，要坚持一件事，自己享受投入也很重要，“一样嘢唔钟意坚毅唔到，你叫我打字或者做PDF我坚毅唔到，所以一个人嘅坚毅系要放喺真心热爱嘅地方，我真心热爱行山。而喺呢行尽管唔系好太多机会都唔会放弃，我谂我哋都真心热爱呢个行业，如果你唔热爱，就会不停想睇几时攞到，几时得到，得到唔到就走，因为根本唔钟意Stay喺度。但当你热爱，过程就变成学习阶段，我暂时做闲角攞经验，到某一日总会攞到个目标。”奶仔充满正面的思想，连Alvin也忍不住大赞：“好欣赏呢个谂法，因为冇呢个谂行真系好难keep住留喺个行业度。”奶仔笑指：“你又唔好咁sad，呢个行业冇事嘅，都揾到食嘅。”

终于挨到出头天，现在算不算是事业的上升期？Alvin说：“我觉得长期都上升紧，冇话低唔低潮，最紧要enjoy。”奶仔亦觉得并没有低潮高潮：“都真系冇话高唔高潮，不过好开心近年有《野外步出》，仲有我监制嘅节目《贫穷限制想像》，可能将自己平时接触嘅嘢呈现畀大家睇。虽然大家睇我节目成日同女仔倾偈，其实系包装要好啲，如果我个节目系奶仔坐喺度同你讲，你即刻熄电视。做节目系要有啲包装，虽然我自己唔系咁钟意睇，但观众钟意睇，同嘉宾倾吓偈，倾倾下就可以带出一啲我自己行山价值、做人态度。我希望可以做多啲，会唔会可以同坤哥、Alvin一齐做，佢哋教人唱歌我系学生，其实都几好呀。我希望呢一啲专访监制可以睇到哈哈。”