马国明收封口令淆底唔敢讲婚事　汤洛雯：唔想我哋嘅婚礼好似活动

马国明昨日出席剧集宣传造势活动，受访期间被追问婚期，大爆遭汤洛雯诈型，不满他经常向外透露太多婚礼的细节，勒令他封口。今日（26/9）汤洛雯现身上环出席品牌活动，就事件接受《香港01》访问时表示：“其实我谂住静悄悄咁影婚纱相，唔想畀人知，但佢就一嘢就讲咗出去话会出埠影，𠮶吓我都好愕然。然之后我都有同佢讲，唔好讲得太多，始终都想保留返一啲惊喜畀自己，唔想搞到我哋嘅婚礼好似活动咁，咩都话晒畀人知。”

汤洛雯续说：“其实佢份人就系好随和，明白佢倾倾吓偈嘅时候，就无意咁讲咗出嚟，咁所以第时唯有提醒返啲佢啰，就好似佢将我同佢啲情话，就咪鬼同人讲。讲完之后，佢又怕麻烦㖞。于是我就同佢讲要攞个平衡，唔系咩都同人讲。（马明好听你话！）哈哈，佢都听嘅。其实我都好听佢话，而佢私底下都有严格嘅一面，佢份人都好有原则，有时都好硬颈，不过我系金牛座都硬颈嘅。佢对工作方面系好硬颈嘅，例如佢开工，佢一定要比准时早到场，我试过叫佢唔使畀自己咁大压力，准时到咪得啰，但佢唔会听，系要咁就系咁。不过佢呢个早到嘅态度系值得我学习。”