【不懂撒娇的女人】少年版Gordon杨潮凯睇透颁奖礼：其他台唔争气

在《不懂撒娇的女人》中饰演林文龙青年版的杨潮凯，原来不经不觉已经在TVB打滚了接近九年的时间。最为人熟知一定是在《天与地》中饰演陈豪年轻版的宋以朗，亦是这部剧令他签约成为TVB的经理人合约艺员。毕业于香港城市大学创意媒体学院的阿凯，读书的时候一直有玩剧团，不过就从没想过做电视或者电影，因为他一直专注的是舞台剧：“当时我系想揾香港话剧团有无请演员，点知艺员训练班请紧人仲会俾钱你读书，我心谂咁好嘅，我就好无聊咁递咗张纸上去，Interview咗两次就入咗TVB。”无心插柳下进入了电视圈，一直浮浮沉沉，说颓不是，因为在之前几年基本上都有十部剧开工，说红不是，因为相信观众们都未必记得他的名字。

拍完《再战明天》，得到了外界不少的回响，很多公司的同事和朋友都走过来赞赏，连监制都奇怪为甚么套戏咁好回响但又好像对阿凯没有带来一点点帮助。不过阿凯都很看得开，他说：“运气喇有时有啲嘢，收视喺观众嘅角度可能唔太重要，因为有时网上口碑好都会有人留意，但公司好著重收视，呢啲大家都知喇，喺我立场唔得咪继续努力啰。TVB有个好处，系黎耀祥祥哥同我讲，一套唔得就等下套，尽力喇，只要你每一个过程都尽力去做就得。出到嚟个收获你系唔会知道，或者根本无收获，但你要只享受咗过程，就够喇。当时拍《巾帼枭雄之义海豪情》，祥哥叫我不妨试多啲喇，作为一个新人要努力啲去试，试吓唔同嘅做法、语气，总之有关表演嘅事就去试，同埋睇多啲好嘅前辈或者好嘅戏，睇完就返嚟试，或者谂吓点样改变人地嘅方法嚟做。”这一番说话以后就陪伴著阿凯的演艺生涯，当他以后每一个演出的时候都会去试著不同的演绎方法，寻求进步。

经常做别人的年青版，亦常常被指样貌十分baby face，好像一个长不大的细路，阿凯表示其实自己没有所谓，只要有戏做，不论年轻版老年版都会去做。不过他都曾经想过自己的脸孔会不会局限了自己的角色，所以拍《纯熟意外》之前，他为了能够更适合地出演一个杀手的角色，便决定留须。结果出来的效果几好，这件事发生之后令他自己也加了一份信心，相信自己是可以做一个比较成熟的角色。到了这个年纪(32岁)，他都希望自己能够转型，因为好难再去扮学生，当然作为演员只要监制叫到学生都会照做，但他自己想做一个成熟版的杨潮凯给观众一些新鲜感。他相信观众会欣赏一些力求改变的演员，因为他有一个信念，就是要从演员和观众两个角度去反省自己的演出，这样会对于自己的演艺事业更加全面。

入行多年，从未试过在《万千星辉颁奖典礼》提名过任何一个奖项，阿凯坦言这件事对自己来说太遥远了，他说：“如果我话无谂过，就一定系呃你喇，奖项有边个会嫌弃呀？你话我老油条又好喇，奖项喺呢一间公司…（无乜公信力？）其实都有一定嘅公信力嘅，每一个颁奖礼都有佢自己嘅制度，亦都有一班钟意佢嘅支持者。但对我嚟讲我嘅立场系呢度嘅奖项唔系单凭你嘅表现俾你，咁仲要啲咩其实大家都知㗎喇。不过上年张颖康攞奖其实对我系一个好大嘅鼓舞，我地呢班一齐训练班出身，一齐努力嘅人，原来努力出嚟嘅表现系有人见到嘅，所以我都同意《飞跃进步奖》系最有公信力。当然喇，呢个喺电视台自己搞嘅颁奖礼，观众好难要求佢好有公信力，因为系自己搞嘛。掉返转讲，其实系其他台唔争气，如果佢地有啲戏可以拎出嚟，可以同TVB去比较，搞一个好似金像奖咁嘅颁奖礼，如果金像奖剩系英皇电影自己搞都无意思喇，我觉得颁奖礼应该系全部一齐砌先啱。”

奖项是一种肯定，亦是一种商业价值，阿凯表示好多时候都是看你的商业价值，他觉得能认真细味演技的人不多，可能十成人当中只有三成人会懂得去分析甚么位是做得好或差，他说：“大家都会觉得好好睇呀，几得意呀，个角色几爆㖞，爆乜嘢呢？其实佢地唔会分析，见到床戏就话有J图，系呢啲啦。不过无办法，作为呢个行业嘅其中一份子，我只可以努力做好自己𠮶部份，到我有能力去改变呢个行业嘅时候，我可以将自己嘅谂法灌输返俾呢个事业，去改变佢，不过而家我都未有咁嘅能力，我只可以喺自己部份做到最好为止。尤其是拍剧拍影，好多时唔系演员可以控制到，我拍十个take有三个系好嘅，佢专做返𠮶七个唔好嘅，有咩办法？咁当然有人会话你劲就十个take都好喇，但系演员好讲状态，同埋我做得好但你个shot俾咗隔离𠮶个，我又可以点？呢个就系我咁耐以嚟明白咗呢个行业系点，有人会问点解呢个机会唔系俾我，我会话因为运气未到，呢个行业唔系净系讲能力。能力系需要，因为能力系当你爆上嚟时候等你可以持久耐啲，唔系一嘢跌返落嚟。就好似祥哥咁，佢都等咗好多呢，呢一行系要储返嚟，观众一开头未必留意到你，但当你爆出嚟𠮶时，观众就会讲返以前你做过嘅戏。咁到时你就会明白原来有啲嘢唔系即刻见到个效果，储返嚟嘅系一个历练，亦都系演员嘅修养。”

演技从来都不是一朝一夕的事，可能当一个演员在演闲角，甚至跑龙套的角色当中，会怨天怨地自己没有机会。但万一真的直接捧上主角，阿凯所说的能力就好重要，没有实力，给你一个好机会也是浪费，他深明这个道理。他肯等，因为他喜欢，有不少人奇怪他为甚么不出去做其他工作，但实在没有办法，他太喜欢做戏，甚至愿意为了去美国进修演技而一个月没粮出，就是为了充实自己的能力，免得他朝真的上位却换来跌得更痛。