Nathan魏念恩长文向女友家属致歉　解释借钱一事：已以现金还清

全民造星V》十强之一的Nathan（魏念恩），昨晚（16日）喺比赛前30分钟宣布退赛，并表示“会尽快交代事情”。

今日（17日）黄昏时份，Nathan 以长文表示：

“事情发生到而家，都无同大家交代过。因为事发后透过共同朋友得知对方家属唔想事情再被发大，更加唔想对方被起底，而我都同意（所以接下落嚟我将会用“对方”去称呼佢）。我认为感情问题系属于我哋嘅私隐，所以一直未有向外界交代，选择沉默去面对新闻或外界嘅评论。

5月17号凌晨，系我人生经历过最黑暗嘅日子。

当时我好自责，脑海里面不停出现无数个“如果……可能就唔会……”。期间一直好想同对方屋企人联络，好想亲口向佢地道歉，解释一切来龙去脉。但系我真系好惊，未试过咁惊，毕竟事发之前同对方嘅屋企人并无太多联谊，亦未试过面对咁重大嘅事情，完全唔知道应该点样处理。

喺呢段时间我觉得恐惧、内疚、自责、伤心、甚至失眠，心情好复杂、好混乱。同时，节目就开始播出。从来都唔想身边嘅人担心我，想尽快话俾身边嘅人知“我无事，请放心”。结果我由一个极端跳咗去另一个极端，我以为保持轻松玩乐Chill嘅态度去对面大家，就可以令大家放心。

直到有朋友睇咗我十强之后所做过嘅访问，佢同我讲觉得我好反常，从来未见过咁样嘅我。然后我自己睇返，我自己都觉得好呕心，行为十分轻浮。我喺𠮶一刻先发现，原来我一直都未揾到一个啱嘅方法去面对呢一件事。

我觉得自己有好多做得唔好嘅地方，包括事情发生后冇立即同对方嘅家属沟通，以及喺丧礼上错过咗同对方家属面对面沟通嘅机会。一直未能捉紧机会向对方家属致歉，成为咗我现时最大嘅遗憾。

令到事情发酵至今，好想喺度郑重向对方家属致歉，好对唔住。

而我私底下亦开始尝试同对方家属联络，希望未来可以有机会同你哋好好沟通。

当时决定继续参加总决赛，系希望对作为参赛者呢个身份附上责任，做到有始有终。

但最终决定退出比赛，系因为7月15号嘅报道，令我发现关于呢件重大事情上，仍然仲有好多事情未好好处理。

好想向所有受到影响嘅人，包括所有参赛者、导师、节目制作组，以及原定受安排同我一齐合作嘅表演嘉宾、音乐人、造型团队等，喺度郑重向你地致歉，好对唔住。

而有关7月15号嘅报道，我亦都好想喺度对家属澄清关于“借钱”一事。当时我同佢拍拖期间，我地双方都有稳定嘅工作，但系出粮嘅时间好唔一样，第三者睇到WhatsApp对话可能会对“借钱”一事感到难以接受，但事实呢个就系我地当时资金周转嘅生活模式，甚至持续到去分手之后。但当我发现分手后继续与对方有金钱瓜葛会令关系都完结得唔够干脆，所以喺事发前我已经约对方当面见面并以现金还清。

假若家属再有关于我哋感情问题或者对喺电话上所睇到嘅一切仍然有唔理解嘅地方，我好乐意向你哋逐一交代。

最后，感恩一直支持我嘅人，

令到你地担心对唔住。”