全民造星5专访｜Nathan靠自嘲挨过“地狱”时期　KC获安慰变重击

《全民造星5》是非多箩箩，几位风头趸在起跑线上率先感受舆论压力，KC（黄家灏）深明无法扭转局面，唯有时刻谨记自己的价值，以免被动摇；坦言“好地狱”嘅Nathan（魏念恩）以自嘲形式令身边友人不用太担心，不过，当回想3位好友不约而同对自己讲过嘅一番说话，呢位比较感性嘅男子又一次缺堤了……

KC提醒自己唔好中招

今年《造星》是非特别多，面对负评，唔识睇中文嘅Lyman（香胤宅）绝对占最大优势，连佢自己都话：“其实我哋系冇咩时间去睇，因为大家都想有一个超精彩嘅舞台。”唔睇但并不代表唔知，KC（黄家灏）虽然忙于准备总决赛，但不时被update负评：“啲支持者会不停安慰我‘你唔好咁谂’而间接令我知道所有嘢，真系嘢嘢重击我。明白系扭转唔到，而如果因为咁而情绪被影响到系好可惜，所以成提自己唔好中招、知道自己价值，唔好动摇。”

Tsoul好奇网民看法

Tsoul在节目中的形象一直十分正面，直到《柴湾角街》事件及至在特辑中谈及“锋泽”，他坦言比起唔开心，会更好奇大家以甚么角度看待。“我嘅立场系呢个系电视节目，有佢嘅规矩、时间限制等等，令好多嘢都呈现唔到俾大家，而我哋嘅角色系一个参赛者，当中所发生嘅都只系一个节目（效果）。”过去半年，Tsoul收到不少“好欣赏你对跳舞嘅热诚”、“好欣赏你有呢种觉悟同冲劲去达成目标”的私讯，他说。“因为喺香港做明星package系要跳同唱，跳舞嘅人好似只可以做dancers，我好感激有一班观众系认同香港都可以有纯跳舞明星，亦希望呢群观众会愈来愈多。”

黄锋自动过滤负评

黄锋由赛前大热突变成负评王，他表示已经睇到麻痹，但亦会尝试消化背后的意思，希望自己可以从中进化。经历过连串事件后，他感到屋企人、朋友、fans更为凝聚。“佢哋不断俾爱、关怀去令我感觉到仲有佢哋喺度。”

Nathan感激蕾安A组

面对女友轻生，再被指得个样、打鼓、唱歌唔掂，Nathan表示:“其实好地狱，会睇下佢哋帮我改咩名，𠮶排就keep住咁叫自己，用呢个方式去笑自己都系好事。过滤完再转化做正能量，亦都唔想影响到其他人，我知身边嘅人好担心我状态，我都好担心佢哋状况，所以我系用呢个方式去令大家知道我系冇事。”问到最感动嘅一句说话时，Nathan讲出Kim、Hayden以及Tiger Foo三位兄弟名字之后，喊住咁话：“佢哋3个分开同我讲，我唔知佢哋知唔知大家都有讲过，佢哋都系同我讲‘你仲有我’……呢段时间真系好炸……而又系我最需要嘅嘢。”

Lyman迷失初心幸获提醒

同样系听到一句说话而喊晒嘅仲有Lyman！只身由美国来港比赛嘅佢，由于一直唔知自己会走多远，所以妹妹Diamond 5月结婚时，Lyman亦无法确定能否出席婚礼。“佢4月特地嚟香港探我，我当时同佢讲唔知去唔去到，身为哥哥系有少少内疚。佢同我讲‘It’s ok if you don’t want to do it’因为佢好了解我，只要有任务就一定要完成，佢同我讲我哋系一家人，永远都喺背后支持你，𠮶时我听完好想喊，因为我百分百投入去比赛，而佢提醒我边个系你人生最重要。最后好好彩，20强完咗啱啱赶到出席婚礼，所以真系好多谢妹妹。”