全民造星5｜做工佬Ritchie虽败犹荣　王锋骚肌跳唱冧爆王君馨

《全民造星5》继续20强淘汰战，今晚（26日）终于轮到王锋上场，喺介绍佢出场时，旁白君就咁讲“喺评判眼中，王锋展露锋芒，但喺网民眼中，王锋就系尾后针”并重提临时改舞步事件，之后又播出导师对王锋嘅评价，例如系German指王锋每次都做得好好，但见唔到佢有进展，而呢种平稳甚至系暗下来。

王锋解释系因为想要稳阵，唔想冒任何风险，不过由于佢目标系跳唱歌手，所以今次决定挑战跳唱。而喺王锋正式表演前，旁白君都不忘补一句“话就话系solo，不过王锋都有揾埋一班朋友跳，警告你，今次跟足啲step，咪再临时爆招。”当王锋跳唱《Make a Wish》后，单系王君馨一句“杀伤力好强”、冯颖琪一句“实净、自信”似乎已经知道结局，最后王锋以5比0完胜阿生。

之后轮到做工佬Ritchie以唱功对战Taco嘅Rap。喺唱功方面，做工佬Ritchie其实可以话系十分好，不过评判陈咏谦同Edward Chan就话因为做工佬最后几下打鼓，所以出咗神，认为佢专心唱，会令成件事更好。Taco表演海选时嘅《Peace》，当中提到“20强𠮶19个我冇一个惊”、“上round应该foul我而唔系Mark Chan”Rap足两、三分钟，听得出有少少唔够气，但绝对唔影响评判Edward Chan同冯颖琪对佢嘅评价，最后3比2胜出。

做工佬Ritchie喺发表感言时，话一直觉得自己会入final，仲好感慨唔知自己几时有机会再踏大舞台，不过“都真系无憾”，做工佬最后感谢钊峰时，仲喊咗出嚟。对于做工佬Ritchie出局，唔少网民都感到十分不舍，又指Taco一直都系rap，睇唔到佢有任何突破，反观Ritchie连跳舞都成功克服，大量“我钟意做工佬多过Taco”留言出现，做工佬今次绝对系虽败犹荣。