张宝儿零孕味现身　爆袁伟豪睇超声波眼湿湿：听到BB个心跳

袁伟豪与张宝儿（Bowie）2020年正式拉埋天窗，结婚3年，昨日Bowie在IG贴上BB超声波照宣布有喜，获不少圈中好友留言祝贺。今日（2/6）Bowie现身将军澳出席无线《2023香港小姐竞选》“全球招募 最后召集”记者会。

Bowie受访时表示：“其实而家我系意识到身体有分别，胃口上唔同咗，以前会唔拣饮择食，但而家有啲嘢食咗落去会有反胃嘅感觉，但喺呢个阶段我就未感受到个BB。而最震撼系我同阿Ben第一次睇超声波嘅时候，我哋系听到心跳，同埋见到个BB真系会郁，我哋系静晒，而阿Ben都感动到眼湿湿。”

被问到工作上安排？Bowie表示：“工作上一定会有调整，但实质会系点，都需要公司去安排。（开始睇婴儿用品未？）自己系会开始去睇相关嘅用品，但而家我会处理好自己身体先，因为而家我要学习要食啲乜嘢去调理好身体，睇吓有乜嘢营养补充品有食。”