【任噏影评】春娇大解放吓亲人　恋爱中感性与理性点处理？　

《春娇救志明》作为彭大导手下的第三部志明春娇系列电影，出晒名讲两性关系好鬼到肉，最紧要系够晒贴地。虽然近两集为咗入大陆市场而要加入返一两位大陆演员，不过唔会有合拍片𠮶阵俗味，反而有返一两个女演员仲令成套戏生色不少，始终你只靠千嬅一个，唔系话佢唔好戏，不过争咁啲睇头啰。咁如果你有睇之前𠮶两部前集，咁你一定会捉到彭大导条路。一开头志明同春娇一定系好地地，之后发生咗啲事而分开，最后都系觉得大家最好而喺返埋一齐。你话剧情老土咩？有人入场咪得啰！

讲返个剧情，一开头见到堆小朋友喺山区度玩，点知无喇喇开始制造啲恐怖气氛出嚟，心谂：“我唔会喺入错戏院睇错鬼片吓嘛？”其中有一幕系讲述个小朋友要喺门口𠮶啲放信位度望出去，系要望一个叩门嘅阿婆。𠮶一刻我都已经有个心理准备会吓一吓，但系又无事㖞，又真系影住个阿婆好和蔼可亲咁。点知一开门就见到个怪兽剩系拎住阿婆个头，虽然话头两集都系玩悬疑嘢开头，不过都唔使咁重口味啩？当然一套爱情片系唔会发生啲咁嘅情节喇，打咗个完场之后就开始正式进入故事发展。其实剧情都真系好普通，一开头讲佢两个点相处，又讲吓普遍情侣拍拖嘅问题。志明用成九万蚊买个装饰返嚟俾春娇话唔等使，春娇又偷睇吓志明部手机见到有第二个女仔揾佢又嘈下交咁，这些都是大部份情侣面对过嘅问题，系几贴地同埋能够引起共鸣嘅。

不过套戏有两个位真系有啲顶唔顺，直头系想去个厕所释放吓我嘅尴尬。故事讲到两位主角去咗旅行，春娇就为志明准备咗份惊喜，就系著套护士制服同志明玩制服诱惑。点知佢一换咗套衫出嚟，唔好话志明吓亲，系成场观众都俾佢吓亲，点解彭大导要咁样玩千嬅？讲真，一个中女要佢著制服唔系问题，咪拣件保守少少大方少少嘅，咁睇落都顺眼啲吖。你系都要揾件玩味十足极度Sex嘅出嚟，点解一套爱情戏要咁多重口味位呀？我唔想以后对护士产生恐惧呀！不过剧情需要就无办法喇，另一个剧情需要就系当春娇离开志明𠮶阵心情极度低落，咁佢一班好姐姐就谂计激励吓佢，就决定播返首快歌跳返只劲舞谂住重燃佢嘅心情。睇住佢三位姐妹一路唱歌一路跳舞，𠮶度我谂有成分钟，成分钟我都不停咁打冷震。相信呢度一定系想制造一个笑位，不过望住佢三个系度唔知做乜咁跳来跳去，生硬得嚟又有点儿浮夸，笑就无出到嚟，反而啲鸡皮就出晒嚟。春娇嘅心情当然燃起唔到，仲争啲将我嘅心情打沉。不过讲开唱歌，呢套戏有成几个唱歌位，最好睇嘅紧系最后志明当街唱广东话嘅《春娇与志明》哄春娇，虽然系造作同埋夸张，但观众好受落，歌词够搞笑，又有啲感人位。对比返三位好姐妹𠮶幕，真系差天共地。

套戏其中一个最多人讨论嘅位，就系两位主角喺酒店𠮶阵遇到地震。志明不停叫春娇行去匿去台底，但系春娇惊到坐咗喺度郁都唔郁，咁志明就自己匿埋咗先再叫春娇过去，叫叫吓地震就停咗喇。转过头春娇就发脾气话志明掉低佢自己一个唔理，志明就辩解已经叫咗好多次匿喺台底，如果天花跌落嚟一个人同两个人都系死，仲话自己系从理性角度出发，之后春娇嘅怒火一发不可收拾咁走咗去。事后我同过好多朋友讨论，每一个男人都话啱呀，企埋一齐唔通揽住一齐死浪漫啲呀？女人就会话你哋男人唔明架喇，紧系想自己个男人无论点都留喺自己身边喇。人类有分成男人同女人，明显就话俾你听呢两种人系有分别，除咗身体之外，有唔少人话男人系理性嘅动物，而女人则比较感性。喺呢个例子上佢两个都唔可以话错，套戏当然就系志明搞一场大龙凤出嚟哄返春娇喇，不过一套好嘅电影系可以带出一个议题，甚至令人反思，咁如果情节发生喺你身上，你会变成志明或者春娇，你又会点做？

整体嚟讲套戏都几好睇无闷场，笑位都几足够，贴地得来可以轻松。最后一幕春娇验完孕之后笑笑口咁，好有理由相信佢已经有喜，咁都好有理由估计第四集将会系怀孕之间嘅感情烦恼，唔通会系讲志明忍受唔住春娇大肚其间无得行房而出去偷食？