周柏豪回应新春Po简体字帖文遭网民围攻：对我冇乜影响

久未露面的周柏豪（Pakho）今日（22/2）现身新城电台为新歌《小船大海》宣传。对于有传他已离开《星梦》结束宾主关系，周柏豪接受《香港01》访问时亲口证实说：“其实我喺无线都有6年半嘅时间，我系完成晒呢份合约，我都好感恩。因为电视台畀咗好多机会我，令我有好多作品，同时亦令我有更加多人去认识，我系好多谢Tvb。”至于为何不再续约无线，Pakho表示：“其实我想试吓自己做音乐，想喺做音乐嘅过程我自己学到啲乜。”

提到他早前在社交平台发文使用简体字，引起香港网民不满，斥他为何在香港不用繁体字。Pakho表示：“其实我PO文嘅时候，𠮶个系内地一个节目嚟。而你话我Facebook用简体字嘅话，我睇返我Facebook嘅观众层相对多嘅系星马，而星马都系用紧简体字，咁所以会用佢哋睇得舒服啲嘅文字同佢哋沟通。（会否觉得好无辜，经常遭人针对？）咁我又唔会话觉得无辜，因为我身为一个艺人系可以畀人去评论。（网民评击会否为你发文带来压力？）其实对我冇乜大嘅影响，因为好多时都唔系我Po。但有时我Po嘅时候，我系会自我审查Po嘢正唔正确。同时我又唔会话惊怕有好多负面嘅评论，而要拒绝Po一样我觉得啱嘅嘢。”