J2女神出动陪你过“恋Love Love”情人节 倪嘉雯爆嗌：傻猪BB

盛产女神嘅J2又有新搞作。天文台预测今日(14/2)情人节气温显著下降，单身嘅网友唔使惊空虚寂寞冻，皆因J2会派出一班女神轮流陪大家过一个“恋Love Love”情人节，包括J2ers倪嘉雯（Carmen）、陈若思（Amber）、胡敏芝（Karen）、林沚羿（Venus）、廖慧仪（Jessica）、陈欣茵（Sonya）、黄嘉雯（Carmaney）、胡美贻（Nicole）、何泳芍（Honey）、叶靖仪（Michelle）、伍韵婷（Juliana）同埋黄紫恩（Jojo），外援方面就有喺《自然系女子旅行》表现亮眼嘅“晖哥”林映晖，同埋喺《冲游泰国》备受关注嘅“叉烧姐”邝玲玲。

J2社交网今日中午12点起、直至晚上10点每小时都会上载由唔同女神录制嘅男友视角片段，一班靓女轮流大讲肉麻情话，兼且各有特色，可爱、娇嗲、活泼、文静样样齐。先说娇嗲可爱派代表Amber、Carmen及Jessica，前者向著镜头撒娇谓：“啲人话情人节会好冻，但我一啲都唔怕，因为今年我有你呀”，Carmen则贯彻甜美女友风说：“我应该点样叫你？傻猪？BB？”至于Jessica则打扮到靓一靓，化身“一日女友”为约会划上完美句号：“我今日同你玩得好开心，好想快啲再见到你呀！”

傻大姐晖哥VS贴心叉烧姐

除了J2ers，两位外援亦各有特色，晖哥贯彻傻大姐本色，跳住出嚟同你讲：“Hey，虽然我成日喺台湾陪唔到你，但我好想同你讲，好挂住你好挂住你呀，你都要挂住我呀！”叉烧姐则化身贴心贤慧另一半谓：“知道你返工辛苦喇，今晚我煮嘢畀你食，好冇？”