【任噏影评．拆弹专家】拆弹得啖笑 香港人恐袭要赶返工先系重点
电影《拆弹专家》上映了五日，头三日就录得450万票房，成绩相当之好。一来警匪片从来都是香港人追捧的对象，二来主角刘德华带伤都要为套戏拍段宣传片段，够晒啅头赢足掌声，三来套戏标榜炸红隧㖞，虽然话就话条隧道系搭出嚟，不过都够晒兴奋喇，几多香港人想炸咗佢等佢唔好再咁塞呀？食正咁多条水，呢套戏大卖绝对系好正常，28号就到大陆上，虽然话部戏用咗成1.8亿港币去拍，不过打正刘德华同姜武两个大陆响当当嘅名，翻两三倍不是梦喇。
讲返个剧情，一开头见到刘华系贼𠮶边整炸弹，心谂：“唔系啩？拆弹专家都要做卧底？”做卧底都不要紧，人哋华仔辛辛苦苦做完卧底，你仲要摆佢张相上报纸，惊死人唔知佢系卧底咁，话晒班贼都有几个走甩，使唔使咁自豪先？完全打破晒一般人以为做完卧底系要低调处理，为咩？就系要保护佢人生安全啰。不过都唔紧要，反正帮贼返嚟报仇都系炸佢上司，而唔系炸出卖佢地𠮶个，唔系话唔合理嘅，做戏啰！
讲咗啲剧情，到讲吓演员。作为Chok界嘅始祖，刘华依然维持著佢一贯Chok嘅本色，好正常嘅！发挥都系正正常常无乜特别，不过我就比较挂住《桃姐》入面嘅华仔。至于一年拍足26部戏嘅黑仔姜皓文，作为重案组总督察呢类型嘅警察角色佢已经做到入晒血，仲要系一定系有勇无谋横冲直撞完全唔用脑𠮶类型，不过今次加埋系有心理阴影，大叫大嗌暴走状态都难佢唔到，又确实做得几好。近年开始上位拍戏嘅张继聪，已经开始注入一种“观众见到就笑”嘅形象，的确佢一出场戏院就充满咗笑声，俾班贼胁持，要认真时又交到戏，希望将来都会见到佢多啲演出。老练嘅廖启智智叔要做大奸大恶完全难唔到佢，唔太多讲。两大大陆演员姜武和宋佳系大陆票房嘅强心针，姜武演技无人会质疑，就算系大陆演员相信都无乜人会抗拒。不过女𠮶位我就唔太有好感，唔系话演技乜乜乜，刘华作为我地香港之子，特首（如果选）呼声最高嘅人，我觉得大陆点都要拎范冰冰或者景甜呢啲国宝级嘅演员嚟到衬托，但系宋佳虽然只系得36岁，不过淡妆之下完全暴露出佢年华老去嘅皮肤，难听啲讲真系有啲吓人。
又讲返个剧情，最后打终极大佬就系发生喺𠮶条搭出嚟嘅红隧，几廿个贼，胁持住四百几个人质，好明显就系极恐怖嘅恐怖袭击。作为其余两条过海嘅东、西隧，要封闭都好正常呀，点知班贼会唔会炸埋呢两条呀？点知由事发开始，只系封咗几个钟，就话要开返，咩原因？系要俾香港人返工呀！香港呢班奴材即使俾人恐袭都要返工呀！唔怪得啲人话香港系奴性最重嘅地方喇，比著其他国家早就红色警戒叫人匿喺屋企唔好蒲头喇。香港人点解奴性咁重？套戏好有心机俾咗个呼应，话说石修系警务处高级助理处长，呢次恐袭由佢指挥，咁大单嘢都唔派个局长指挥下出嚟都唔紧要，我当佢好似我地个教育局长咁成日去旅行。但系佢好少研究点样去解救啲人质，反而有一幕系同红隧个设计师研究万一条隧道真系炸咗会点，会几耐先起得返一条，会点样影响香港经济。作为警方代表，反恐嘅最大实力，竟然唔快啲谂吓点去解决件事，而系去谂真系爆咗点算？都唔知话佢有远见好，定有几手准备好。
至于另一幕场面，讲述由BabyJohn黄天诺主演嘅人质，被个贼发现佢原来系警察，就要由佢绑住啲炸弹行出嚟。咁套戏叫《拆弹专家》呀嘛，咁紧系满心期待睇刘华点样拆个炸弹喇。点知佢居然话拆唔到，仲不停咁同BabyJohn洗脑话“你系差人，你嘅责任要离开人群，离开啲车，将啲伤亡减到最少”，OK，正所谓道高一尺魔高一丈，你拆唔到唔紧要，你要感人位都无所谓，但你又要玩洗脑对白，不停咁重复又重复，BabyJohn明知自己就嚟死都要大声话我系差人，大佬我真系听到起晒鸡皮。呢个时候戏院内传来一声唔小心嘅笑声，结果搞到全院都唔忍喇，尽情咁笑。最后BabyJohn紧系炸到碎晒，感动壮烈位眼高手低都算，原来呢一幕仲要照抄美国电影《The Hurt Locker》，剧情仲要系一模一样，不过人地个拆弹专家见到有炸弹都著返套保护衣先，你刘华就咁冲埋去，系咪拍赵子龙拍上瘾呀？正当以为刘华系不死身应该最后都唔使死，点知结局系两个超巨型兼复杂嘅C4炸弹，咁根据上个炸弹嘅经验，拆弹专家紧系拆唔到弹喇，结果又玩返究竟剪红线定黄线呢个游戏。最后刘华同另一个拆弹专家吴卓羲讲，如果佢剪完黄线唔爆就再剪，如果爆咗就即刻剪红线。刘华本著大无畏嘅精神，应用佢“用生命救生命”呢个伟大嘅理念，剪爆咗个炸弹，但问题又出现啦，刘华点解咁肯定两个炸弹个setting系一样呢？即系如果另一个系剪红线会爆点算先，咁成件事咪好无聊？虽然明明条隧道除咗佢两个就已经无生命，其实今次系“用生命救金钱”，保住条红隧，等啲人可以继续塞红隧返工。
整体来说，其实呢部戏都成功做到紧张感，始终套戏玩炸弹，你都唔知几时会有嘢爆出嚟。不过剧情方便就真系有啲出事，《拆弹专家》全程只系拆到一个已经封尘好耐嘅战时炸弹，有两个爆咗，另一个要掉落海爆，四个拆得一个，啲炸弹咁劲咁高科技，不如都系叫《炸弹专家》算喇。