独家丨69岁李枫亲谈近况 入住老人院唔觉晚景凄凉：感恩三餐温饱
日前有连登仔开post“寻人”，以一张简单的手绘图寻找TVB一位甘草女演员，当时楼主形容：“把声成只鸭，有粒大粒墨喺嘴角，做开啲野蛮角色。”短短4分钟，已有网民估中是69岁李枫，更有网民透露她的近况：“同我老窦同一间老人院，仲好精神，行得走得，一入门口就见到佢。”
有指李枫晚景凄凉，约10年前不幸发现脑部生水瘤要做手术，但因为付不起私家医院费用就只能去公立医院排期，等做手术的时候更一度痛到要爬地求医。虽然手术成功，但却留下健忘等后遗症。
《香港01》昨日（24日）联络上李枫，她头脑清晰，声线响亮，大方承认已入住老人院近一年，她说：“系，我喺一间之前嚟做过义工嘅老人院，呢度环境算唔错，有分几间房，有啲住床位，我算几好彩，能够分配到间房畀我，独立一间自己嘅房，有私人空间，算好难得……讲电话都唔怕畀人偷听。”
对于被指晚年生活悲惨，李枫表示最坏日子已经过去，现在能有三餐温饱，多次感谢上天眷顾。她说：“我唔觉境况凄凉，我觉得系感恩，有个地方你住仲想点？我识一啲朋友，临终唔系咁开心，我都戚戚然，我希望自己唔系𠮶只。我嚟呢度住咗约一年，好感恩嘞，有个私人房、有三餐温饱，真系好感恩！姑勿论佛祖耶稣，我都多谢个天，我唔敢怨天尤人，唔可以话甚么丰衣足食，但起码两餐温饱，好感恩。”
李枫一生大起大落，年轻嫁给从事制衣生意的丈夫，育有一子一女；本做少奶，可惜丈夫生意失败，她要卖掉嫁妆、珠宝为夫还债。其后丈夫又沉迷炒股输钱，由居于九肚山豪宅沦落至住村屋，家里更曾历两次破产。李枫曾在访问中直认疏忽照顾子女，致关系疏离；直到儿子在婚礼上表达很爱妈妈，著李枫不要再自责，母子解开心结。
现在的李枫，选择入住老人院，她庆幸年纪大有政府资助，儿子亦有分担部份费用，她说：“最重要唔好烦到人，我系好介意烦人哋。”
谈到健康情况，她表示“OK”。身为“御用恶奶奶”的李枫亦希望有机会复出拍剧，她说：“依家叫托赖，𠮶啲艰难时刻，身体嘅疾病，我都尽自己嘅能力克服咗，之前好惨，腰伤咗，脚又跛咗，几坎坷，又冇钱（苦笑），但都叫做艰难时刻都pass away，过咗去！唔系话咒自己，我唔系希望好长命，但生命无常，无得由自己讲，随天钟意几时攞咪几时攞啰，十年前都唔畀我走，我咪继续活下去。感恩仲有生命，仲有呼吸，如果可以嘅话我都希望可以做到少少嘢。”
不过，老人院对院友出入有限制，离开院舍要事先申请，李枫解释：“呢样系最大嘅限制，自由度唔大，因老人院有佢哋规范，又唔可以怪佢哋话严，如果个个自由出入、自由落街，咁佢点管理？好多院友都会自己偷鸡走落街，我好少做呢个动作，我住得呢度就要遵守佢哋规则。如需要出席一啲饮宴，或艺进同学会每年有function，或做慈善探访，我都会事先申请获批准。”
李枫不想被网民胡乱疯传一些负面新闻，扬言做人对得住天地良心，“姑勿论真与假、是与非，最重要自己所作所为对得住自己、天地良心就OK。我唔系话太介意，但如有恶意中伤就会好嬲。只求‘问心无愧’四个字，咁就安乐活下去。”