有种好男人｜李佳芯出场必令人心动　网民睇样唔理剧情：似拍广告

李佳芯（Ali）今日（5/1）现身观塘出席无线热播剧集《有种好男人》宣传造势活动。提到剧集安排在“炮灰档”上映，收视成绩竟然表现不俗，录得最高收视22.6点 (147万观众)，打破低收视宿命，终于吐气扬眉。

有“收视救星”之称的Ali接受《香港01》访问时表示：“我都系啱啱先知道，有咁嘅成绩梗系开心啦，当然唔系我一个人嘅功劳，因为成套戏并唔系我一个人拍，系台前幕后嘅人一齐努力而得出嘅成果嚟，有咁嘅收视当然系开心。”

另外提到有网民指她在剧中每次出场，在任何角度都总会令人心动，并留言笑指：“净系睇靓样就够，剧情系点，都可以唔使理”。Ali笑说：“咁样唔得𠮶㖞，咁嘥咗我啲演技㖞，我系好努力咁去做戏，所以希望大家留意套之余，都要留意埋我哋所有嘅演员嘅演技，同埋演绎我哋都系好用心去做。（每一个镜头都拍得你好靓，其实系咪为你而设？）哎呀，梗系唔系，千祈唔好咁讲。当初真系要多谢监制，佢落咗指令最紧要拍得靓。咁所以拍得靓，唔只我一个人㗎。就好似我同Yoyo拍嘅时候，现场周围摆咗好多白色纸同反光板，围住我哋两个，我哋完全感到好似拍紧广告咁，系好专业，咁所以呢样系监制嘅功劳，令到每个演员都拍得好靓。”