大刘刘銮雄记者会全纪录(上) 自爆福临门塞春卷故事最爆笑

大刘刘銮雄今日在澄清记者会上讲足一个半小时。一开始，完全不用在场传媒提问，已讲超过半小时，除了解释商场闹“踎柱男”事件，还提及萧若元借他名气揾钱，以及他多年来所受委屈，主动提到“塞乒乓球”、“用支票掟人面”、“逃犯、通缉犯”等敏感话题，指自己透露多年来只低调行善，每月以现金资助逾千孩童。

足版全文如下：

咁多位记者你哋有问题问我先，抑或你想我想讲嘅嘢先呢？

首先我想讲由皇室大厦𠮶日，有个男人𠮶度开始，我都想澄清吓，𠮶日可能我哋公司处理得唔好，𠮶日畀个男人踎咗喺𠮶条柱𠮶树，咁我行过时冇位过，点解冇位过呢？因为咁啱𠮶时5点半，过时过节好多人，我唯一要过得一个方法过，就系hi住人个身过，咁我想讲你哋听呢，我平时喺屋企行路或者出街，小则有个保安畀我扶住只手，多则有两个，我行行吓会休克嘅，呢啲系事实唔系作出嚟，或者同自己解释。

咁𠮶条友我细细声叫佢“唔该你起身啦，唔好阻住人过”，佢答我唔系话“好”，而系话“我好攰，想坐喺度休息一下”，我争啲未同佢讲，我介绍香港最臭嘅公厕畀佢休息，再唔系介绍特首屋企门口畀佢休息，咁我当然冇讲呢两句说话啦，但叫极佢都唔肯起身，自私自利。咁𠮶时我又过唔到，咁过到一个方法就系hi住人身过，但有几个问题出现，第一人哋一转身，一kick kick到我会跌落地下，少则断一两条骨，重则后脑跌落地下会死，呢个系其中一个问题。

第二个问题，我见商场啲人大部份人都系戴住口罩，少部份冇戴口罩，最大镬呢样嘢呀，万一我经过hi到佢哋，万一佢哋中咗招传咗畀我，我就九死一生。我早几日先睇到电视个阿伯60几岁，喺无线新闻话“我就嚟癫架嘞，我老婆唔畀我去街”，话一去街中招就冇得医死梗，因为我哋呢啲要食抗排斥药，代表乜嘢呢？就系我打几多支针，个效果都系得四成左右，一中招我哋就好危险嘅，同埋年纪我哋都唔细，何况又器官移植，食过抗排斥药，所以我哋系高危。呢啲你哋咁后生一定冇试过器官移植吖，你冇谂到我哋现在讲呢啲嘢。

仲有一样仲恐布，我惊万一畀个阿伯认到我，唔系攞综缓、唔系住㓥房𠮶个大刘就嗌非礼，个阿婆又系见到唔使攞综缓、唔使住㓥房又话我想非礼或者强奸佢，你唔好以为我讲笑呀！系四五年前定五六年前，唔知边年，有个女人带住个女上嚟，上嚟我公司，喺下面话要上嚟见我，啲security唔畀佢上嚟佢又扮走，啲security系树就上嚟26楼写字楼，话带个女嚟要我照顾佢，一世照顾佢，又话个女依家肥咗嘞，由以前唔知34乜，去到依家34E，咁我梗系唔啋佢，梗系唔会出嚟见佢啦，我喺写字楼喺办公室入面，你出去做嘢呢？其实系刑事恐吓，如果我唔见佢呢，佢就即刻call记者嚟开记者招待会。

后尾好彩我律师话佢咁讲就得嘞，系刑事恐吓嚟架，就即刻同佢讲唔走我哋就报警系刑事恐吓。哦，原来我唔见你就开记者招待会，当你见到呢啲咁嘅嘢，你惊唔惊吖？我会惊。

好似今日有报纸话有呢个狂燥症，我讲句说话你哋听，你写低：狂燥症，我就一定冇嘞，创伤后遗症我就有好多嘞。你知唔知咩叫创伤后遗整呀？即系撞咗车死唔去，咁就好惊，例如呢啲话要我照顾，唔照顾又咩呀，有一样我唔怕讲，有个呃咗伦敦金2亿几银，好识推销，口又发炎，又识坤人嘅人，唔识佢架，又上嚟我公司，又话识我阿妈，识我阿妹，又点点点，上嚟讲三讲四，但当佢送盒茶叶上嚟讲咩，我又唔识你，已经有古怪，我唔使一分钟就嚟谂咩事，因为我廿几年识个女律师，佢有个男朋友，又系姓萧嘅，又喺𠮶间律师楼做，𠮶个律师楼喺佢打嚟畀我之前嘅三日，我就喺𠮶间律师楼分咗身家畀我哋仔女，咁𠮶个律师呢，睇到哗原来咁发架，唔使做伦敦金嘞，成世做伦敦金都唔会咁发，所以就送呢个茶叶畀我。当然我唔会啋佢啦，但我想讲畀你哋听，当你系唔知道你分咗身家，畀人知道你个数有几大，伦敦金弹咗2亿几银，警察都冇佢乎呀，你睇番新闻就知边单嘢边个。我睇新闻佢就讲，“间公司系我架，不过我已经喺边个时间边个时间转咗个伙记啦，但伙记转咗一个月之后先呃人伦敦金之嘛，边关我事呀”我唔知你哋明唔明白吖，你哋娱乐版，即系佢用时间去证明唔关我事，我转咗畀你，你呃人你嘅事，你呃人两亿几伦敦金就飞去台湾嘞，就拉你唔到，你明唔明呀，但佢个马仔就系佢个马仔，间公司就系佢公司，但佢转咗畀佢𠮶时就未犯案，到犯案𠮶时已经唔关我事，原来已经走咗人去台湾，呢啲嘢呢唔系需要讲畀你听，但讲咗畀你听就知我有创伤后遗症架。

日日都有人打嚟打我主意，呃咗伦敦金2亿几银成功，走甩咗㖞，警察又冇佢乎㖞，佢都够胆打嚟话送盒茶叶畀我，又话识我阿妈识我阿妹，但我唔识佢㖞。不如话识我祖先，汉高祖刘邦啦！即系我讲呢啲嘢畀你听呢，其实有啲嘢好简单，其实唔需要解释，但我今次好多嘢想讲，即系你哋明白到日日都有人想揾我笨，有啲又话识咗3、4十年呀，有啲又话喺福临门介绍某个巨富个仔呀，X，同人做成单生意呀，争佢几亿银又冇畀到呀。

好多人以为我喺福临门食饭，但𠮶次啱啱呢就从来冇同某个人喺福临门度食，佢就作错咗啲资料，谂住我成日喺福临门食饭就介绍咗你畀阿边个做生意，约埋喺福临门见面，但我从来冇同某个人喺福临门见，同食饭，但资料作错。仲send埋佢医院张相呀，话帮帮手，同我找咗医院条数，我话我唔识佢架㖞。大把人，我就有啲相同证据！

（现场叫助手整理资料畀记者）一人整一份佢哋睇。

佢最好笑呀，唔怕讲，其实佢冇任何证据，自己噏架咋㖞，佢话佢揾《苹果日报》哗呢次发达啰，x你老味，如果呢单嘢系真嘅，全世界攞奖呀，我已经同𠮶时鲁味讲，完全冇咁嘅事，但佢老细话你快啲做呀，如果得嘅话，X你老味全球攞奖架嘞，结果咩证据都攞唔到，最后你知唔知我点呀，揾个律师同佢讲，呢啲系诈骗、勒索嘅，佢先识收山。KK 陆，应该有人识佢嘅，但当你唔使攞综缓、唔使住㓥房，畀人知道有少少食两碗白粥，两碗鸡粥，人哋就打你主义嘅，所以我同你哋讲咁多唔系废话，系创伤后遗症呀！我谂平均每一个月，打嚟我公司运吉、白撞，打嚟要见我同我倾电话，少则十几个，多则2、3十个，以前就女人多，依家就男人多，唉！

我依家咁讲，唔系要你哋同情我，而系要解释点解，𠮶时我好惊呢，我hi到人惊kick一kick我跌落地下会死，唔hi到人，人哋冇戴口罩又传染畀我，我中咗招我又高危，你哋都知我移植个肾，全世界都知，我𠮶日先见到我喺电话，你上网睇或问医生都知，当你移植器官一定要食抗排斥药，即代表你身体抵抗力系禁住咗，即系你正常人打三针、四针、五针，你中一招都冇事，我打咗五针嘞，但医生都叫我小心，万一中咗你抵抗力得普通人三、四成，所以我好惊架。我唔系惊怕死呀，我最细个女仲系得4岁，个仔得10岁，个女得14岁，我都要留长多几年睇住佢大，我唔系怕死，所以我好惊同人hi住呀，呢样𠮶样架，好多人话我有咩洁癖呀，黏咗啲财，呢啲全部bull shxt，所以我𠮶日我系唔敢过，所以我𠮶日系惊中招，又惊畀人kick落地下，又惊畀人撞到我，哗，你x味又畀人话非礼，又想强奸佢，又屈我畀钱啦畀钱啦，大把人上嚟，我秘书有记录架，又话认识咗40几年，话一定有嘢同我讲，话唔得，有嘢一定要同我讲，男又有女又有，我以前有冇同你哋讲过呢啲说话丫，冇呀，但我今日一定要同你哋讲。

爆萧若元30年前月薪近30万

好似我今朝早睇到萧若元喺youtube讲关于我嘅影片仲好笑，阿萧公子喺佢自己𠮶个台湾youtube，喺佢平台做咩呢，佢讲到话同我好熟，食过十几次饭，单独都食过两、三次饭，佢讲呀吓，你哋录低我讲啦，我剩系见过一次，就系同佢老细黄玉郎一齐见过面，喺我公司，一次咁多，但佢又话见过面，单独见都两三次，见咗十几次，点解呀，我都同情佢可怜佢啰，如果我要出呢啲网站我都发达啦，好在我依家唔需要咁啰，你明唔明我讲咩呀，佢只系想多人睇多人听，有广告佢就赚到钱，点赚钱架？即系佢想讲嘢多人听吖嘛（飊高音）但我同佢唔熟嘅，我剩系记得一样嘢，我唔怕讲出嚟，当时我问阿黄玉郎，你请呢条友呀，我第一次见呀，我话你请呢条友呀，几钱人工呀？佢话廿几万，36、7年前嘅事，我话点解咁贵呀，你知唔知佢点答我呀，佢话佢好叻呀，佢英文乐乐声架，我话英国扫垃圾、派牛奶、派报纸𠮶啲人都英文乐乐声啦！

当然，你有权，你请条女，你畀一千万一个月，或者一分钟都得，系你自己决定。萧若元系叻嘅，但叻喺佢自己嘅层次啰，佢成都觉得好叻架，佢曾经系佢个平台话我反应快如闪电，佢讲嘢唔够贴切啰，系比光速仲要快几百倍呀，但我唔通教精佢咩，你了解我话快如闪电。Anyway,我唔系想讲佢呀，佢系叻人，但叻有咩用呢，呢个世界专收叻人架，唔系佢家姐间上市公司又畀佢搞到破产呀，佢个仔又做生意失败破产呀，佢自己又争人钱走咗去台湾呀。我依家照样讲，在坐各位照样录，我唔会惊架，我依家讲事实吖嘛，我依家唔系奸淫掳掠，专搞未成年少女，玩细路哥吖嘛，你咁钟意讲嘢吖嘛，我依家就喺树同你哋讲，唔系剩系记者，任何人（突然大声）我有讲错随时欢迎你上嚟同我挑战，我冇带稿呀，我冇纸架，唯一有呢张嘢（揈来揈去）咁啱今日人哋畀。

Anyway，咁讲完萧若元，讲完皇室大厦，所以你哋明白点解我咁惊。仲有𠮶条友赖死唔走，我开始发火，因为赶佢唔走，我最发火系点呢？就系唔想畀人见到我同吕小姐喺埋一齐，结果你哋有冇睇《爱回家》呀，咁多位记者朋友，有冇呀？你哋冇睇《爱回家》呀，你哋有少少失败呀，我晚晚食饭都睇《爱回家》，里面有个角色叫“食屎陈师奶”，有人点头，我唔知𠮶个有冇食屎，系咪陈师奶，定系八师奶，抑或诸事嘅猪师奶，就揾电话影紧我相，我唔系嬲佢，啲人嘅层次系咁架啦，我真系唔会嬲佢。但我见到佢影相影到吕丽君，即系吕姵霖，我就好嬲，因为我唔想畀人见到，话我哋行商场复合。

你哋听唔听得明呀，呢个系重点呀（长叹一声）唉....即系𠮶日由皇室堡之后我都未最嬲，点知唔知隔一两日啲网上打手，阿边个边个大镬大全胜呀，全家搬返嚟我屋企呀，系咪呀？（问助手）我真系唔识上网架，真系失礼，唔识用智能电话，新闻都系公司print畀我架，但我同你讲吖，呢啲网上造谣，唔系皇室堡𠮶日先开始架，已开始咗8年嘞。

为“塞春卷”委屈逾20年

8年来点解我唔出声呢，我系for 某人呀吓，唔怕讲，我见你哋啲记者都好后生，边个做多过20年架，举手我睇吓。（突然问现场一位做超过25年记者小文）有？Good，我想问你有冇听过我以前喺福临门塞春卷嘅故事呀？（有听过）我同你讲吖，我想澄清，唔系话做，谂过都绝子绝孙呀！但啲人要讲，迟啲就塞春卷、迟啲就网球，再迟啲又塞榄球，再迟啲话我钟意畀人塞添！（情绪有点激动）把口喺人哋𠮶树，要屈你有咩咁难啫，（咁你当时唔澄清？ ）哈，你问得好呀，我都有谂过澄清架，但如果有一百个嚟，一个唔澄清，又话𠮶个唔澄清，𠮶个仲唔系真嘅？你蚁多搂死象，（唔好咁劳气）阿文姐，我唔系劳气，你唔使担心我，（见你瘦咗）喂，身体好咗好多，阿文姐，我唔系劳气呀，识得我嘅人呀，知我讲嘢系咁大声，但唔系劳气，你唔使吖，我同公司律师讨论生意嘅嘢都系咁大声，我唔系劳气呀，唔好搞错呀，呢个系我性格。

你问得好，点解我唔澄清，你澄清得几多呀，仲有𠮶日唔知睇边套电视剧，影射我，又话唔知喺边架飞机闹咗人几句，人哋喊，我就掟张支票落人哋块面树，有冇听过呢个谣传呀，文姐？（冇）咁你啫系唔够耐呀，即系话我呀，同某人去旅行呀，喺飞机唔知做错咩事，就闹到佢喊，即刻喺袋攞张支票出嚟签个名然后掟落佢块面树，识我嘅人知我从来唔带支票喺袋嘅，我觉得咁签个名好核突嘅，唔怕讲，但有人咁作嘅。

乜嘢嘢我都见过，阿文姐我同你讲吖，因为你做得耐，有25年，我𠮶种痛苦唔系你哋在坐人会明白架。衰衰在乜嘢呀？我唔系核突佬，多几个女朋友，唔使攞综缓、唔使住㓥房，啲人就唔妥你架嘞。我讲真架，你唔好以为乱噏廿四呀，以前几多系我老友，背后呀呀呀好多。

有次仲好笑，我老婆，佢叫甘比，全名陈凯韵，有个香港都好成功嘅乜乜商人，突然间同我讲句说话，呢期最叠囡（钱）边个呀？陈乜乜呀，我听完，哦哦哦，我老婆仲叻，然后喺度偷笑，因为佢做咗某个机构嘅主席，又食又拎，呀，大陆嚟嘅，唔系大陆嚟嘅，香港嚟嘅，食就知咩意思啦，嗒嘢啦，拎系拎咩呀，拎佢啲钱啰，介绍佢买啲垃圾股，包你赚，结局蚀到要出嚟做鸡！你哋唔知呢啲秘密架。

你听我讲，我现在讲嘢系千真万确，我冇开名，但千真万确，我香港大，香港出世，十岁仲瞓地下冇床瞓嘅，我成日教我依家老婆，我从来唔会睇唔起男人做黑社会，女人做鸡。佢问我点解，因为男人点解做黑社会？环境穷先做黑社会啫，女人环境穷先做鸡啫，啱唔啱呀，你试吓个男人系有钱仔使唔使做黑社会吖，个女人就算几核突最多都系叫鸭，唔使做鸡吖。我有冇讲错呀？

我系讲事实讲道理，我想讲事实，畀在坐各位记者朋友、摄影师听，我呢30几年我忍得好辛苦，我唔系话忍唔到，而系有啲重要忍都要忍落去。

点解话8年前突然间话有人突然间话喺网上攻击我，点样攻击我呀。同我个仔个女讲，你呀边个边个系逃犯、通缉犯呀！𠮶啲嘢都唔怕讲出嚟，如果假设𠮶啲人系边个边个，受害者系边个边个，我想问吓你我痛唔痛苦吖？

你明唔明我讲呀？我现在讲嘅嘢唔系好清楚，但有少少智慧就明我讲咩嘢。好似唔刻你哋有人识呀萧若元嘅，同佢讲声，求求你让我躲开，你有唔掂嘅，我帮过咁多贫苦人家，我唔怕帮埋你，但你要揾食，借第二个人个朵，借呀蔡英文个名呀，喺台湾呀，就唔好借我个朵，bull shxt，talk three talk four，又话我咩呀，有狂燥症㖞，我见过一次面（再次有啲激动），仲要同黄玉郎一齐，从未试过私人见面，佢喺个网上话x见咗我十几廿次，私人都两三次，噏得就噏，我理解同情佢，佢都系为揾两餐，最好有人听佢啲嘢，增加佢bull shxt，有人听佢啲嘢有广告咪值钱啰，我有冇形容错呀？！

我都系同情佢，佢掂嘅都唔使走去台湾啦，欠人周身债，个仔又....睇报纸都睇到，个仔又破产，又揾个女出嚟买乜餐厅，揾个女出嚟做呢啲白手套。如果你掂呀，都唔会揾个仔揾个女嚟做白手套啦，即系如果你要斩人，你都唔会揾自己个仔个女嚟帮你攞住把刀去斩人啦，明唔明我意思呀，我比喻呀。

但有时你冇办法，人穷。我以前有个前辈，佢好有钱嘞已经，食完饭大家倾，话我哋男人老狗要养妻活儿，冇钱开饭，打劫都要，其实佢有钱架。跟住第二句，我哋依家揾到嘅钱，揾啲钱就要问心无愧，穷时冇钱开饭打劫都要，但唔系话佢依家要，而系我哋依家揾到嘅钱，唔需要再做呢啲嘢，或者被逼做呢啲嘢，就一定要问心无愧，赚呢啲钱，但呢个社会，好多人唔系咁嘅。你睇吓萧若元，阿萧公子，我都好同情佢真系读历史，喺呢方面有料架，佢有啲电影有份拍有份度桥，呢方面有啲天份，但高估自己能力做大咗。

做人金句：做人自卑感唔应该有，但自量心一定要有！

我有句说话送畀在坐咁多位兄弟姊妹，我读form 1.𠮶阵时，我呢句说话记到依家，所以我唔使死住，我读书时form 1.，𠮶间野鸡学校，位老师好正气，文质彬彬，后尾我先知原来系国民党陆军嘅师长，陆军师长好高级带兵架，咁当然佢嚟到香港唔得啦，有人请佢，唯有喺学校教中文啦。佢𠮶日第一当同我哋成班讲，今日第一堂，你哋记住呀，“做人自卑感唔应该有，但自量心一定要有”！

我绝对冇自卑，但我好自量。自己知自己能力点，做自己能力上嘅嘢，但呢个世界上无论男又好女又好，或者做生意。明明有资格做细细地、中中地生意，又做到大大，我见好多好多，女人又系。我就凭住呢两句说话，挨到今日，touch wood讲句就唔使仆街住，我仲帮紧好多人。

我顺便喺度提一提呀，我喺全香港，细路哥呀吓，男仔女仔，may be 一个from一个家庭，两个三个from一个家庭，我谂点都接近一千个细路哥。个个月供紧佢哋呀！（好大声）有冇错呀？（又问助手）我有冇出过声呀，我又唔出得声，全部畀现金呀，我出得声畀现金，佢又可能攞唔到综缓呀，你哋听唔听到呀。

我做完呢啲你哋又唔知又唔讲，我唔系𠮶啲做完喺电视影番张相先，x𠮶啲，呢啲咁嘅屎忽嘢我哋唔系唔识谂，唔系唔识做，不过，我好彩过佢哋少少啰，我唔需要做啰。你哋明唔明我意思呀。我哋有个部门专接触呢啲咁嘅人架，有个咩建筑地盘有人死咗，司机撞车死咗，我睇电视《 东张西望》睇见报纸，即刻揾佢哋部问跟进。

有啲好惨，喺电视见到个的士司机，60几岁，有个杂种仔痴线，上到的士即刻揾把刀拮死咗个的士司机，唔知你哋记唔记得呢单案，你哋善忙呀。后尾畀警察喺离岛拉咗啦，我睇电视见到好惨，有个妈，大个女喺中文大学读紧会计，一个细女13岁，仔9定10岁，肥肥地，我见佢手好紧张，明知老窦啱啱死咗，记者招待会，知死咗老窦，我见到即刻飊眼泪。

我唔知我哋一个月畀佢哋几钱呢？（万几至2万蚊）应该唔知呀嘛，（因为佢哋暂时有啲保险claim住）哦，唔系作，我哋仲成间屋同佢装修过，换晒冷气雪柜，全部换好晒。咁我有冇同佢哋讲呀，要供到个细嘅读到去大学，佢唔读为止呀，佢钟意读硕士硕士、博士就博士。仲有呀，佢钟意食日本放题，我叫啲同事耐唔耐叫啲好嘢餐厅，畀佢食放提呀，我系咪要讲呢啲嚟博同情呀？！

我一次都未见过呢班人一次面架，我剩系见人惨我就帮，唔通我要攞呢啲嘢要博你哋在坐，或者其他仆街、PK仔、PK女去同情我？你哋未够班啰。