曾志伟锡大马女模惹全城关注　肥妈：佢好无礼貌

肥妈Maria Cordero今日（4/10）现身将军澳电视城出席无线选秀节目《中年好声音》面试。提到曾志伟献吻大马女模惹全城关注，连累她19年前与曾志伟所合演的电影《大丈夫》激吻片段再被翻Hit，即时成为网上热话。肥妈笑言：“多谢志伟哥啦，唔系佢锡条女，边个知我锡过佢哋两仔爷啫。呢个世界冇啦，连佢老婆都未试过锡过佢哋两仔爷，仲要系同一日呀。佢老婆最多系喺佢个仔细嘅时候锡过，你要记住，我系同一日锡佢哋两仔爷呀。其实我同志伟先系有事，点解你哋唔写我啫。其实我觉得志伟暗恋我，如果唔系仲乜揾我做呢个角色。”

你点睇志伟献吻大马女模？肥妈表示：“不值一提，锡完讲声Happy birthday就走得。大佬好普通啫，咁都要讲咁耐。（会否觉得系个女仔放料博宣传？）我觉得成件系个女仔放出嚟，如果唔系边个知啫，无办法啦志伟哥红嘛，做我哋呢行好嘅又系新闻，唔好嘅又系新闻，如果我系佢我都做呢啲新闻，如果唔系边有人识我。其实我觉得志伟好无奈，借佢过桥，借佢曝光都几廿年啦，都唔系新嘢。（叫阿志伟下次唔好乱锡女！）人哋生日锡啖讲声Happy birthday礼貌嚟嘅，我哋半人半鬼都锡两啖面珠啦，甚至会锡3下。而志伟佢锡得一下，佢好无礼貌啦，应该锡多两下。”