中大学生fb直播竹战　师兄森美力撑：游戏本质冇赌博成分

大学生拉大队捉Pokemon冇问题，一齐去唱K联谊，亦未尝不可，但若然四人围攻四方城，大玩中国传统国粹“麻雀”，却往往被视为“荒废学业”、“沉迷赌博”。其实144只麻将组合有多个变化，又包含了猜测对方叫紧什么糊的心理战，无疑是一门高深的智力游戏。数月前成立的中文大学学生会麻雀研究学会，今日（25日）举行了“雀皇之皇麻雀大赛”，更在Facebook实况直播赛事，大学生竹战联谊究竟对或错，《香港01》访问了中大毕业的圈中艺人，他们也力撑学生，认为不涉及赌钱，纯粹只是游戏。

森美

商台DJ森美承认对打麻将认识不深，只是知道“清一色”、“对对糊”等术语，但他却力撑麻雀学会的大学生，“我赞成㖞，要赌钱任何嘢都可以赌钱啦，包剪揼都可以赌钱㖞，其实𠮶个游戏本质冇赌博成分。(一般人打麻雀普遍都会赌钱？)任何游戏都可以加赌博成分啦，足球都可以有赌博成分，唔通学校冇校队踢足球咩？中文大学里面都有球场畀人踢波啦，两队踢波又唔俾啰㖞？（学生打牌时会计分！）足球都会计分啦，里面冇涉及赌钱成份就应该可以啰。”

不过话分两头，森美表示亦要尊重学校的规则，他表示：“当然亦都有第二啲情况啦，例如宿舍里面唔俾打牌。呢个又另计㖞，我觉得提供一个住宿畀你，订立一啲规矩，亦都系应分嘅，例如喺宿舍里面唔俾踢波，因为有机会踢烂嘢，宿舍里面打牌可能会嘈到其他人，绝对唔系因为博赌成分，所以学校有啲地方唔适合打牌，我可以接受，例如上堂嘅班房，会影响到其他同学。同学要打牌可能要喺多用途室，作为一个game嘅学问去研究，我觉得冇问题嘅。”

高皓正

对于中大学生在学校打麻雀，高皓正认为没有对或错，但最紧要同学校沟通好，“呢个情形比较尴尬，因为好多人用麻雀嚟赌博，其实好多人都用啤牌赌博啦，系咪就唔可以玩啤牌呢？但每个地方都有传统文化，如果学校一直系唔俾打牌，都应该尊重传统嘅。（若在学校范围外，大学生打麻雀有冇问题？）佢哋都系成年人，喺学校范围外，绝对系佢哋自由啦，但所有嘢都唔好沉迷啰。”说到底打麻雀也是传统智力游戏，只要不涉及赌博，打返几圈放松一吓，也无可厚非。