李施嬅拒认追袁伟豪：点解唔系佢追我？
撰文： 郭敏玲
出版：更新：
李施嬅今日以台庆剧《天命》一身造型出席TVB 50周年献礼。自李施嬅上次被传力追袁伟豪，今日首次回应绯闻：“点解会话系我力追，而唔系佢追我呢？不过我企喺任何一个男性隔篱都会话我追佢。”之后李施嬅更开玩笑地续道：“好在今次都系传袁伟豪，佢都几靓仔。”
对于今次的绯闻，李施嬅就否认：“其实报导讲我透过胡定欣去识袁伟豪，根本我就一早就识咗佢好耐，大家都系‘Crazy Runner’，都有好多共同朋友，又经常出嚟见面聚下，就好似今晚，我哋同其他朋友都会出嚟。”对方早前亦大赞施嬅是好女仔，施嬅就笑言多谢对方，不过问到有无发展可能，她说：“大家都有事业嘅兼顾，佢又啱啱开始上，我旧年系投资上成绩都好好，所以我都想再focus多啲。”或者两人相识多年太熟，到现在尚未过到电。
另一方面，李施嬅因拍《天命》戴头饰戴到头皮发炎，头上出现两个五圆般大的洞，至今仍未康复，明天更要到北京继续拍摄的李施嬅会否担心恶化？她说：“其实而家仲要揾头发去遮，不过都生紧啲毛仔出嚟，我希望快啲好返啦，都希望有生发公司可以揾我做代言人，顺便sponsor一下我用生发产品，快点康复。”