蔡颖恩结束8年爱情长跑与摄影师结婚　老公感动哽咽三度深情亲吻

模特儿Evelyn与摄影师谭运佳昨日（28日）在双方父母和亲友见证下注册成为合法夫妇，结束8年爱情长跑，携手步入幸福新生活。好友陈嘉宝（Anjaylia）见证仪式，表示好感动，她对Evelyn笑言：“欢迎加入人妻俱乐部！”腹大便便的Anjaylia捉住Evelyn的手摸自己的肚皮，祝福她不停生B。

婚礼昨日于金钟的酒店户外花园举行，双方家长和亲友约50人出席，Anjaylia囡囡担任小花女。穿上白色婚纱的Evelyn由爸爸陪同进场，一对新人互相宣读誓词及交换BVLGARI结婚戒指，Evelyn全程笑得甜丝丝，老公却一度感动哽咽，非常感性。而在亲友热情的掌声和欢呼声下，他们三度深情亲吻，恩爱甜蜜。Evelyn大赞老公好靓仔：“我好惊喜佢今日呢个Look，平时好少Gel起晒啲头发，今日真系好有型，我唔会再畀佢Gel起啲头发，咁靓仔，畀其他女仔见到点算呀？！”氹得老公笑逐颜开。

接受访问时，新郎透露筹备婚礼期间离港工作超过8个月，只可越洋筹备，Evelyn说：“大部份时间都由我张罗，佢负责落决定。好开心，我哋都系幸运嘅人，有好多专业嘅朋友、公司同事、同学和家人帮忙，仲有品牌赞助，好多谢大家咁爱锡我哋。”新郎说：“筹备过程轻松，我哋追求简单和自然。（生B计划呢？）都系追求自然，我哋都好钟意小朋友，一切顺其自然。”他被问到婚礼上哽咽，他说：“平时好少对住屋企讲深情说话，感觉特别大。”Evelyn说：“反差有啲大，平时都系新娘喊，估唔到今日调返转。”

而Anjaylia追问Evelyn成为谭太心情，Evelyn说：“今日个个都嚟问我‘紧唔紧张？’我完全冇紧张嘅感觉，因为太多嘢要处理，无时间紧张。”对于老公感性哽咽，她说：“午餐时我哋对屋企人讲咗一啲深情嘅说话，佢喊，连佢好熟嘅朋友都话估唔到。其实我好少见佢喊，就算睇好伤感或煽情嘅电影，佢都好少喊，今日见到佢呢一面，重新认识佢。”Evelyn透露婚后只休息一天：“大家都好锡我，希望我放一日假才开工，工作一直排到明年。今日个个都叫我年生贵子，唔知有无时间生BB。”Anjaylia立即捉住她的手摸自己肚皮，Evelyn笑说：“可以，我可以带你大女返屋企。”Anjaylia祝福她：“期待你除咗幕前工作，仲要摄时间不停生B啦！我识佢𠮶阵已经好贤淑，会煮好多嘢食和持家有道。”Evelyn赞Anjaylia婚前只懂造一款最简单的甜品，婚后竟变成大厨，经常为囡囡亲手造面包和曲奇，进步神速。