Ian陈卓贤吸500粉丝逼爆商场　深明姜涛面对的压力：有种默契

MIRROR成员陈卓贤（Ian）今日（21日）现身铜锣湾商场出席饮品品牌宣传活动，吸引近500名“Hellosss”企满商场四层。他们举起手牌不时高呼偶像名字，又全场大合唱《正式开始》，场面非常墟冚。见到大量粉丝到场支持，Ian表示会笑多一点来报答大家，活动中，Ian更与幸运粉丝大玩游戏兼合照。

Ian接受访问时表示得知有粉丝昨晚便到场排队，既开心又担心：“好多谢佢哋，出道几年佢哋嘅支持唔系必然，同埋系无条件咁付出。但又好担心通宵佢哋有冇食嘢、会唔会冻，希望佢哋下次唔好通宵，休息够、最多可能早几个钟嚟，好开心同到大家见面。”相信大家都会留意到，最近电视上有很多Ian的广告，他说十分感恩：“早几日同屋企人食饭都连续见到自己，Daddy妈咪见到都开心，多谢大家畀工作机会我。”

谈到近日与狗仔拍摄的广告，有粉丝疑问为什么不找鸡髀（Ian爱犬）合作，Ian笑言：“身为鸡髀嘅主人以及经理人，我𠮶日要参与拍摄，惊照顾唔到佢，控制佢会用咗九成精力，佢都比较活泼，𠮶日拍𠮶只狗仔同鸡髀好似样，好乖好配合。”

活动中Ian讲到会笑多一点，被问到近日是否较从前开心时，他说自己的情绪较容易有上落：“有时遇到自己烦恼系会易钻牛角尖，当谂通咗就会冇事，希望大家会对待自己情绪，唔开心系好正常，揾个方法令自己开心返就OK。”姜涛亦有透露出活动时感到大压力，Ian说有跟对方倾偈：“我哋好似好明白大家，可能我哋系头两个出Solo嘅成员，面对嘅压力，处境都好相似，好明白大家就会有默契。佢会sense到我唔开心，会埋嚟拍下我膊头，见到佢唔开心又会安慰下佢，大家有种情义喺度。”

而今日同一时间，队友Anson Lo亦会于元朗出席电影首映，当被问到是否打对台时，Ian说不会有此感觉：“恭喜佢第一部作品，戥佢开心。唔觉得系打对台，反而系感恩好开心，大家都Keep住忙，呢样嘢最开心。（够唔够胆好似佢咁着女装？）如果拍摄要配合角色都会，系专业一部分。”乐坛颁奖礼将至，Ian多谢粉丝为自己拉票同时希望大家可以投MIRROR一票：“希望可以集大家力量令多啲人认识MIRROR，听到MIRROR嘅作品，投各自Solo嘅成员之外都投MIRROR。”他直言不会浪费投票机会，自己亦会投下一票：“个人就唔投，组合会投MIRROR。”