专访︱陈柏宇望掌握事业主导权　不再被动等公司安排：太冇安全感

曾被喻为“隐世歌王”的陈柏宇（Jason）将于下月再度杀入红馆，举行一连两场的《陈柏宇Fight For ___ Live in Hong Kong Coliseum》，阔别四年再踏上红馆舞台，Jason直言紧张又大压力，全因他深明观众不会如四年前般容许失误，亦自觉大众的焦点已不在自己身上。过去的他总给人“冇所谓”兼“超佛系”的感觉，但原来Jason并非没有所谓，音乐路上的一切名誉，他亦觉得不属于自己。过去两年，Jason重新审视自己的不足，为音乐事业奋斗之余，亦希望可以重新掌握事业上的主导权。
撰文：陈芷颖
摄影：梁碧玲

因疫情开始反思　自觉一切名誉不属于自己

今次的红馆演唱会主题是“Fight For”，宣传海报写上“你为了甚么而奋斗？”对于陈柏宇来说，他所奋斗的是音乐事业，Jason表示过去两年因为疫情开始反思并重新审视自己的不足：“入行因为朋友寄录音去唱片公司而成为歌手，冇作曲、冇填词，冇创作，好似所有嘢都系人哋安排，我嘅参与部份得唱、做访问、拍MV，究竟事业上我有咩可以捉住？有mid-career crisis，就开始学唱歌，希望可以提升做歌手能力。”

过去的他总给人“冇所谓”的感觉，但原来Jason并非没有所谓，只是他愿意配合和执行属于别人的想法：“冇所谓原因系因为我觉得唔重要，本身唔系我Idea嘅时候，我去配合紧要过将本来唔系我嘅事变成属于自己，但其实我唔系冇所谓，主题就系咁嚟，Fighting for事业上嘅主导权。”自认“吹水佬”的他不但参与演唱会的构思，更参与制作宣传短片，由度桥到落手落脚拍摄，Jason开心又有成功感：“唔系等人畀嘢我做，太冇安全感，冇任何办法觉得自己值得现时的名誉，名誉唔系自己建立，好似系公司帮我，唔想有呢个感觉。”

再开红馆紧张大压力　歌曲《结》望抚慰太太流产之痛

阔别四年再开红馆骚，一向给人感觉从容的Jason竟坦言紧张又大压力：“今次冇上次红馆咁Forgiving，第一次红馆大家都会有个气氛去支持你，唔会每一次都发生。加上近两、三年好明显个焦点唔喺自己身上，我（嘅事业发展）靠晒今次演唱会，所以紧张、大压力，但都好兴奋。”为了可以令自己进步，Jason开始学唱歌，唱《别来无恙》时感到很大的变化：“把声厚咗，多经历咗。”

比起从前的大热歌曲《你暪我暪》、《别来无恙》等等，Jason近年推出的作品如《悔过书》和《纯白》，都并非是听后立即琅琅上口的歌曲，不过他却更喜欢以及享受整个制作过程：“参与程度高，过程最重要，成品有信心，对自己同制作团队有信心。”其中一首歌曲《结》是Jason特意送给太太符晓薇（Leanne），望抚慰对方的流产之痛：“好喜欢写出嚟嘅道理，唱呢首歌好多时都想喊。我个结梗系解开咗，我担心我老婆会有个结，同作词人讲我哋发生咗呢件事，好想写首歌去安慰我老婆，好想佢喺呢首歌得到启发，唔好沉喺万劫不复嘅思维。”

近年乐坛起重大变化　深明MIRROR承受巨大压力

近年香港乐坛起了很大的变化，亦有不少人认为MIRROR令大众重新留意香港乐坛，Jason觉得首先要找出问题根源在所并审视自己的不足：“香港乐坛开始走下坡，唔系因为香港人唔留意香港乐坛，系因为香港乐坛少咗一个值得留意嘅原因。系我哋能力唔够高，唱嘅唔够好，我自认，跳嘅唔够好。韩国艺人4、5岁开始训练，我7、8岁开始唱口水歌、卡拉OK，唱到23岁入行，咁我点同人比。唔能够同人比唔紧要，知道自己弊处就去改善。”

MIRROR为香港人争光之余，Jason亦知道他们所承受的巨大压力：“香港最劲嘅歌手市场开始超愈香港，唔再留喺香港做Base，所以会少咗一份吸引力。佢哋（MIRROR）好有偶像条件，香港冇第二队MIRROR，但佢哋嘅责任同压力好大，因为要背负唔单只自己嘅事业，假如有一日要同世界组合企埋一齐，背负嘅就系香港代表。”

Hair: Alex So @ the attic
Make up: Jessica Chan
Wardrobe: Junya Watanabe by ITeSHOP & Levi's

点撃睇更多专访靓相：