专访︱柳应廷《砂之器》讲亲情 认愧对妈妈：压力好大语气比较差
“金Jer”柳应廷向来是品质保证，推出的个人单曲，难度一首比一首高，歌词背后意思亦要乐迷花时间去理解和消化。继《狂人日记》后，“重生系列”来到第二部曲《砂之器》，此生的课题是“宿命和原谅”。狂人与太太今生以母子方式重遇，一句“对不起”或许未能修复破坏的关系，但至少令他重新学懂爱。
《砂之器》由歌名、歌词，以至背后的意思、暗藏的细节位等都并非如大路情歌般易入口，正如花姐所讲“下下查字典，你估个个都咁得闲咩？”不过歌曲推出后迅速登上YouTube热门歌曲影片第一位，乐迷仿佛证明了作品只要有质素，还是愿是花时间用心细味当中的一字一句。
撰文：陈芷颖
摄影、短片：陈顺祯
剪接：陈芷颖
新歌《砂之器》以亲情为题 小克、王双骏用心连系两部曲
经历完《狂人日记》，第二部曲《砂之器》以亲情为题。狂人上一生伤害了身边人，今世与太太以母子方式重遇，面对着破坏的关系，阿Jer会选择说一声对不起：“上一世对屋企人做咗好多反叛事情，好多嘢去到佢老婆死𠮶一刻都未解决到。今世面对返同一个课题，破坏咗嘅关系我希望讲一声‘对唔住，请原谅我’，希望对方听完个重担会放轻咗。”
在连系两部曲上，阿Jer与“物语班底”小克及王双骏花了不少功夫：“MV听到个音乐系《狂人日记》Intro嘅纯钢琴版，承接《狂人日记》最尾嘅‘狂’字。上一首歌个尾系下一首歌嘅头，所有嘢变到好连贯，整咗‘狂风起了’。除咗系列、歌名用小说名，仲会有呢啲连系，令人记得之外，一听起呢啲音乐就会谂起我。”
花姐曾指歌曲“唔使写咁难” 阿Jer因而纠结三天
小克在IG透露早在写《狂人日记》时，已经想用“今生情侣，下世母子”为题，可惜当时阿Jer认为歌词太深亦不是他想要的内容，于是再改写成后来的《狂人日记》。直到五月，阿Jer却发短讯给小克指第二部曲要“对不起，请原谅我”，他解释此转变就像是缘份一样：“今年开始接触零极限，母子Topic之前《狂人》时小克已经好想用，但我觉得当时未系时候接触，太深。当时叫佢转咗个Topic唔好用母子，用狂人畀大家见到我狂嘅一面，之后做母子件事就好啱数，好似缘份整定。”
柳应廷的作品需要乐迷花时间了解，亦未必当下就能消化歌词背后的意义，连花姐都说“唔使写咁难，未必个个都Search歌词讲咩”，阿Jer因而纠结了三天，不过他却受上天启发坚持做自己想做的音乐：“出呢首歌之前花姐都话‘好难，唔使写咁难，未必个个都Search歌词讲咩。下下都查字典，你估个个都咁得闲咩？’我当初都质疑自己系咪要咁难，纠结咗三日，小克Send啲词畀我睇，我系冇覆佢。后尾好似有上天启发，我听紧《砂之器》Demo，电台啱啱播紧《狂人日记》，系咪上天畀我启发‘啱呀，呢条路啱呀，你去喇’，之后就坚持住自己做呢个Topic。暂时大家觉得深，但都乐意用时间去Search，Get到首歌背后意义，好开心。”
MV再次“坏过应廷” 阿Jer笑言不似本人
《砂之器》MV中，Jer再次“坏过应廷”，不单只离家出走还疯狂吸烟，他笑言MV的角色有别于他本人：“我都唔系好反叛，个人几Love and Peace。从来冇试过MV咁离家出走、食烟，同屋企人关系好好。唯一感觉大啲系‘望母亲突然白了首’，望到妈妈老咗好多，近年因为工作早出晚归，又唔系成日见到佢哋，唱呢句歌词有种好中嘅感觉，其他位都系靠想像咋。”
谈及亲情的主题总是很容易触动情绪，阿Jer透露录音时并没有哭，不过歌曲的情绪波动却是一大挑战：“冇喊，录音好有感觉，熄晒所有灯去代入，如果我系胚胎嚟到今世会有咩感觉。今次都大挑战，啲歌词无端端劲Sweet，好似情人咁，之后无端端要闹交讲对唔住，情绪波动都大，但好玩。”他续指录《砂之器》用的时间比《狂人日记》短：“录咗3、4个Session，整体都算快，冇《狂人》咁耐，要5、6个Session，因为要录埋啲和音，所以用嘅时间比较多。”
MV引共鸣乐迷睇到喊 “一直以嚟做歌好想做到”
新歌MV出街后，不少乐迷直言“睇到喊”，阿Jer听后非常开心亦达到了他做音乐的目的：“令佢哋谂返同屋企人嘅关系，系我一直以嚟做歌好想做到。有好多人甚至话好多年冇同屋企人讲嘢，透过呢首歌，好想去同佢哋讲返嘢，系我最开心嘅事。对身边朋友，对与错系咪真系咁紧要，有个人踏出第一步讲对唔住系咪真系咁难？虽然好多事未必一句对唔住就解决到，但有呢个Mindset去尝试下，都系一个好好嘅启发。”
MV的最后一幕，阿Jer含泪向妈妈说对不起，他指当时想着家人已经能投入情绪：“谂住以前同佢哋好Sweet嘅场面，去到当佢老咗、老人痴呆，乜都唔记得，仲要拎住啲BB衫、奶樽，行为证明到佢心底里系几咁爱，但有好多嘢错过咗，返唔到转头𠮶下已经投入到情绪，唔需要谂咁多。以前同我阿爸成日落街踢波，到而家好难再一齐落街踢波，要谂方法去珍惜你哋嘅关系。有啲嘢做唔返，就谂第二啲事去取代，去旅行、行山都得。”
压力大语气差对妈妈感愧疚 第三部曲十月推出
现实中的阿Jer很少跟家人说对不起，大多都是说“唔好嬲喇”，问到对妈妈最愧疚的事，他坦承因工作压力大有时语气会比较差：“太大嘅事就冇，屋企人本身好迁就我同好锡我。平时做完嘢返到屋企，压力好大，佢哋再问多几句，我会选择唔答佢哋又或者语气比较差。今次呢首歌对我都有启发，系咪应该Care多啲屋企人，讲多啲嘢畀佢哋听了解你多啲，我本身都系报喜不报忧，唔想将啲唔开心嘅嘢讲佢哋听令佢哋担心埋一份，慢慢调节。”阿Jer亦直言入行后，少了很多跟家人相处的时间：“一个月得三、四日，真系夜晚可以坐底一齐食饭。倾偈都少咗，尽力喇，嚟紧可以去旅行就同佢哋去多啲，散下心倾下偈。”
来到访问的尾声，就当然要问问“重生系列”第三部曲的主题，阿Jer说第三首是关于“我爱你，谢谢”：“十月左右会有下一首，始终要时间消化，起码三个月先可以去到下一阶段。第三部曲系零极限净底嘅两式，今次讲咗‘对不起，请原谅我’，第三首就系‘I Love You, Thank you’，谂咗大方向但主题就构思当中，想有返啲爱同正能量。”
化妆：Giann Cheung @AnnieG. Chan Makeup Centre
发型：Man Chan@CHIC Private I Salon
服装：Celine、Christian Louboutin
造型：PIPA Creative
点撃睇专访靓相：