日日妈妈声｜林盛斌否认追仔爆老婆曾流产　Bob嫂受妊娠糖尿之苦

余安安、陈凯琳及罗敏庄主持嘅节目《日日妈妈声》，每集围绕怀孕到生BB后嘅大小问题，呢日揾嚟多仔公林盛斌（Bob）同太太担任嘉宾，Bob除咗要体验妈妈们紥肚泵奶之苦，更意外爆出Bob嫂原来曾经小产。

Bob系娱乐圈中多仔公，同老婆育有3女一子，虽然系出名嘅好爸爸好老公，但亦有唔少人觉得佢为追仔，要老婆承受一次又一次怀孕之苦。对此Bob喺节目中澄清：“唔系一开始就预咗生四个，点会估到一个男人咁强壮，揩一揩又有咗，同埋两公婆的确都好喜欢小朋友，绝对无追仔呢个问题。同埋生完第三个到细仔中间，其实我地流失咗一个嘅，之后亦谂住再尝试，点知又系揩一揩又有。”Bob嫂随即接口表示的确无追仔：“一直谂住起码两个，好自然有第三个，凑落都觉得应付到。”

Bob嫂一直亲力亲为凑小朋友，几个小朋友亦会互相照顾，其实每次怀孕Bob嫂都相当辛苦，因为佢几胎都患有妊娠糖尿病：“我有糖尿病家族史，第一胎到临界点责界，之后三胎都有妊娠糖尿病，每一餐要打胰岛素针。去到怀第4胎时，3个小朋友已识得帮我递针递药。饮食或者生活方式可以帮助到自己keep fit，咁我就唔使用咁重嘅药。”