【阿爷厨房】李家鼎为颁奖礼整炸鸡手都软：朝早９点开始煮

最近睇《阿爷厨房》，平时充满霸气的李家鼎，一揸住菜刀温柔讲解菜底煮法，证明了“铁汉柔情，真系胜过黎明”的道理。今日鼎爷孖住谭玉瑛拍摄节目最后一集，亲自炮制新年食品芋虾，有得煮嘢食，鼎爷全程笑晒口，就好想叫佢拍返套《深夜食堂》香港版。

鼎爷煮出个名堂，昨日与谭玉瑛联手，由朝早9点开始，落手制作百多人份量的炸子鸡及糯米酿鸡翼，为的是昨晚台庆颁奖礼的食鸡环节，两人整鸡都用了大半天：“整到show前大半个钟先整完，一路拎住个镬铲搅到手攰，好在个人无散晒。”

节目拍到最后一集，说话豪爽的鼎爷就大力拍咗谭玉瑛背脊一下，话要讲对方秘密：“就系谭玉瑛帮我悭咗二千几蚊，我就同工作人员讲，如果佢成日无买过嘢，第二日三餐我包！讲完心谂死啦，真系要打开荷包，好在谭玉瑛最后都有买嘢，真系多谢佢。”谭玉瑛在旁边就话因为自己钟意买香料。