罗淑佩局长人生五首歌Ian只占一首　谈面对失恋：唔使太煽情悲壮

讲到文化体育及旅游局局长罗淑佩，众所周知她是陈卓贤（Ian）的歌迷，曾现身Ian演唱会，听他表演时更如痴如醉。近日罗局长现身周国丰主持的港台节目《音乐中年》，分享自己最爱的五首歌，并借此道出自己的人生故事，不过当中只有一首是Ian的作品，局长更解释自己想过会否需要避嫌，不过后来就认为没有必要。

罗局长指自己从小喜欢听歌，因她是家中独女，没有兄弟姊妹，儿时最大娱乐就是听收音机。她第一首推荐的是温拿《好学为福》，认为黄沾将《论语》“好仁不好学，其蔽也愚”等填到歌曲里，用轻松形式将中华文化传开去是很好的事，自己亦曾研习此曲的歌词，认为香港有著能影响全华语地区的流行文化十分幸福。第二首是陈百强的《摘星》，赞这首歌很鼓舞，给人一种动力。问到在谭咏麟与陈百强之间会选谁，局长直言：“咁Danny㖞，Danny唔系依个时候先钟意，系佢《眼泪为你流》已经开始钟意，𠮶啲系所有女仔都觉得好型，有个男仔弹钢琴、自弹自唱又唱得好听。”她又自爆有买陈百强《太阳花》唱片：“佢喺唱片里面张歌词纸另一面有个钢琴谱，系《有了你》嘅钢琴谱，我弹琴唔系好叻，六级咁啦，𠮶时见到个谱咪练吓啰。”

罗局长分享自己童年的“我的志愿”是律师，不过会考后中大开始收“暂取生”，她是第一届，既然不用考A-Level，就顺理成章入读中大的政策与行政系，周国丰问她可有感到后悔，她表示：“又冇得咁样谂嘅，咁或者我未必系一个好成功嘅律师呢，又唔系话而家好成功，但起码做咗30几年，我到而家都可以好起劲，证明系一份啱我做嘅工。”

而分享第三首歌Beyond《真的爱你》前，她说母亲是严母，打到她一身藤条印，但自己能理解，因为她是独女，学坏了、纵坏了就冇：“如果佢唔打我，我谂我变飞女㗎喇。”周国丰问她到底有几曳，她笑说：“反叛又驳嘴，你知反应又快，讲一句顶十句，都几乞人憎！同埋我钟意睇《天若有情》，你都谂到啦，如果你唔管教，会跟咗啲唔知咩人去边度㗎。”不过小学、初中后罗局长已经冇再被打，她解释：“我都系同佢讲你再打我，我打电话报警㗎！”

来到第四只歌，终于轮到Ian，局长选了《留一天与你喘息》，她指自己是在疫情第五波时听到这首歌，回忆当时不能出街、外出吃饭、旅行，没有活动就睇电视和听电台：“我谂系𠮶时咁嘅环境之下，有一种治愈嘅感觉，我亦都觉得我哋呢啲年纪，会想听疗愈啲嘅声音，老实讲时间又唔系咁多，如果听完之后觉得舒服啲或者可以放松啲，或者有些少共鸣，又系嚟得好似啱数啲。”

罗局长认为自己到了这个年纪，说不上是“钟情”Ian，用“欣赏”会较合适，自己会听新一代的歌曲都是被契女所薰陶，对方曾往她家暂住，用其YouTube账户听K-Pop，令她开启了全新的世界；她又透露，自己当时都未睇过Ian、MIRROR等节目，都是之后才重温而已：“我觉得好嘅一样嘢就系，我会同可能叫做后生啲嘅人，或者我少接触嘅乐迷，了解佢哋或者起码认识佢哋，原来仲有呢啲嘢，个世界好似阔咗啲。”

讲到《留一天与你喘息》是Ian作给外婆的歌，表达对她的挂念，而Ian其实也曾受情绪问题困扰，周国丰问罗局长会如何鼓励情绪困扰的人，她说：“《留一天与你喘息》呢首歌入面有一句歌词我系好有共鸣，叫做‘不必太煽情 太过悲壮’，我谂其实我哋好多时，特别大家都年轻过，有啲时候，攞个简单啲嘅例子，失恋，当你第一次失恋系个天冧落嚟，当你人生行得比较长啲，经历过唔同悲欢离合嘅时候，再失恋可能其实都伤心，但系你会知道真系唔使太煽情、太悲壮。我谂年青朋友随住阅历越来越多，系会有机会成熟啲嘅时候，会处理得好啲。”此外，她觉得要懂得找人开解，不要一味觉得自己搞得掂或别人不明白，“呢种嘅同行，呢种令你知道你唔孤单，有人愿意花时间去同你同行，你自己个价值喺𠮶度，每一个人都好有价值，亦都有啲人觉得你好有价值，你唔需要理𠮶啲唔知因为咩原因要去令你觉得自己好冇价值嘅人。”

罗局长认为人要忠于自己，近年公众从访问中对她认识多了，她觉得是好事，形象会变得立体，但同样地有些印象、认识抹不走，因此她亦感谢一些善意的提醒，表示：“的的确确社会上唔少朋友系觉得，公务员转做局长，一言一行更加受人关注，所以应该更加谨慎，我非常多谢，绝对会将呢啲意见摆埋入去我平时考虑自己嘅言行𠮶度。”问到要如何拿捏，局长笑言：“而家都系见步行步啦！譬如今日呢个节目咁，如果我话国丰老师揾我去拣五只歌，我避开啦，唔好拣某一个边个人嘅歌，出面一样有人讲嘅啫，都会问‘咁假嘅？明明又话钟意，咁都数唔出呀？’我又觉得冇需要，所以点解呢一辑里面每只歌，其实都系我有几确实嘅原因点解要拣呢只歌，歌手譬如阿伦、Danny、Beyond、Ian，以前都有喺公众频道、媒体有讲过，我细个钟意呢啲，我后来钟意呢啲，而家钟意呢啲，我都有讲。”

至于最后一首，他本来有犹豫过周深还是周杰伦，因为自己觉得周深的《达拉崩吧》很有特色，不过因为近日周杰伦在启德主场馆开演唱会，因此她选了其《一路向北》，并自爆是《头文字D》超级Fans，翻看了很多次，连配乐也喜欢。她又透露自己喜欢揸车，甚至想过学飘移：“其实我想学㗎，不过后来做咗运输署长，咁更加唔可以学，但系《头文字D》系2005年出，我07年就去做运输及房屋局嘅首席助理秘书长，已经主管运输事务、交通事务，咁都唔系好可以去学飘移，所以冇话特登揾门路去学，都知喺香港呢个地方唔系几合法嘅，所以冇做到，但系好Fascinating（令人著迷），好吸引人。”