罗力威专访｜探垂危粉丝见对方痛哭　决心复出：原来我系别人力量

有好几年没有在幕前见过罗力威了，不少人或许以为他已退出，不过近日他决定“复出”，还发布了新歌。罗力威一向是个比较佛系的人，没人叫他出歌，他就觉得没急切性，总是等到有话想表达才推出作品；但暂别舞台这几年间的一次次离别，乃至是探望病重歌迷后，他突然发觉有歌就要尽快出。

消失幕前数年生活充实　因“失去”自觉是时候出歌

罗力威说，其实从来没有真正想退出，虽然消失了在公众视野，但他仍然持续创作，亦深信终有一天，时机适合就会把自己想表达的音乐再奉献给音乐圈，纯粹是他从没有定下一个确实日子而已。罗力威视2019年的《星光》为自己的告别作，虽然2020年都有出过歌，但至今相隔了五年，或者有人觉得五年时间很长，不过他却不那么认为，“因为我觉得我都几充实，我好满足，我嘅生活由自己一个变到形成咗一个家庭，有小朋友，呢个转变，我觉得好充实，所以我唔觉得时间好耐。但我知道四、五年对好多人嚟讲会好耐，我自己都曾经有一两下，会有一个观念，如果我有一只歌，呢一个题材嘅歌系讲离别，或者‘珍惜而家’呢个题材，如果我可以喺早一年出、两年出，可以趁𠮶个人仲听到𠮶首歌嘅时候听到，送咗一份祝福畀佢就好喇。”罗力威以往给人感觉比较寡言、冷漠，不过现在他觉得自己长大了，也变得有温度，希望把这些温度带到作品，当作祝福送给歌迷。

笔者一直都见证罗力威的歌迷何其忠诚和强劲，以往《叱咤》的我最喜爱男歌手五强中，有五年都有罗力威份，歌迷确实功不可没。需知道那个仍然是陈奕迅、古巨基、张敬轩称霸乐坛的年代，能打入五强、跟他们平分秋色，实在非等闲之辈。但毕竟已经不再活跃乐坛，新星又这么多，罗力威难免曾觉得自己或已被歌迷忘记，不过神奇的是，他去年在街头Busking及出了一次活动，粉丝竟然还在。他说：“佢哋真系一班好爱我嘅歌迷，佢哋好可爱呀，从来我一路认识嘅佢哋都系好真挚、好理智嘅歌迷，佢哋就系会支持罗力威嘅音乐，但系佢个电话嘅wallpaper系韩星嚟嘅，哈哈哈哈！佢哋唔介意畀我知道呢样嘢，亦都知道我系唔介意。”他坦言自己以前比较悲观，推出《星光》时已当作最后一首派台歌，“里面都描述系我最后一只为你哋创作嘅歌，从此冇咗我呢一个存在，都得㗎喇，大家从此就喺𠮶度，留住最好最好最好嘅回忆，喺𠮶度Stop啦。”然而粉丝总是不离不弃，亦不会因为他走了而怪责他，反而一直默默支持。

曾探望重病歌迷　遗憾无法在对方离世前出歌

说到这里，罗力威欲言又止，之后分享了一段经历，早段日子，有人搭上搭联络上他的太太雨侨，请她托罗力威录一段音，“佢话‘我有个朋友系你老公阿威嘅Fans，佢好钟意佢，可唔可以录段音俾佢？因为佢病得好紧要。太太同我讲，但我话唔识呢个人，我唔叻讲嘢，你叫我对住空气同一个唔识嘅人讲嘢，咁系点㗎呢？我想像唔到。”于是他索性直接去见这个粉丝，只见对方已经失去活动能力，瘫痪在床上，全身上下只得眼睛能动，即使亲友喂她吃东西都不太成功，罗力威忆起当时的情况：“佢郁唔到，净系得眼神，我一路同佢讲嘢，佢眼神喺度不断郁，不断喺度流泪，佢啲亲友话‘佢好乖呀，你嚟到佢先肯食嘢，平时就唔食。’”

这次见面对罗力威冲击很大，最主要是他从没想过自己可以成为另一个人的力量来源，他以为自己已四、五年冇出歌，大家都差不多忘记他了，谁知原来在远处，有人会视自己为榜样、偶像，每日看著他的照片、听著他的歌，这使他百感交杂，既荣幸，又惭愧，同时也后悔，因为在他探望对方不久后，对方就已离开了这个世界了。他说：“如果可以早啲出歌，就畀佢早啲听到，而家已经太迟。佢一路走我都冇新歌，直到而家先有新歌，我而家开始会觉得，我能够出到歌系一件幸福嘅事，唔好谂太多，如果佢有少少成为人哋嘅祝福，就自然可以成为到人哋嘅祝福，我能够做嘅就系出歌，唔会考虑太多，总之早啲出、早啲出，你唔知佢边一日，又或者喺最后（阶段）之前趁机可以听到你新歌就最好。”

经历离别后　盼新歌能安抚乐迷伤痛

正因为这位粉丝，以及面对猫猫及太太家人的离世，种种情绪驱使罗力威创作了《悠扬一曲》，他希望借此安慰到一些正面对离别伤痛的乐迷：“希望可以将呢一个伤心，变成一个正面嘅力量。”这首歌除了跟儿童合唱团合唱之外，囡囡Harper亦有献声，不过这原来并非最初的安排，他表示：“我录完音返嚟，我话录完喇，畀你听吓，佢听完之后去瞓觉嘛，第二日佢可以唱返出嚟！我觉得好神奇，咁犀利嘅你？咁我就觉得，好啦，你应该可以喺往后多啲参与爸爸嘅音乐创作。”罗力威坦言，他的音乐世界从此不再只得他，可以传承给女儿，感觉十分奇妙；他又大赞Harper音乐天份高、记性好、音准亦好，很轻易就能记低听过的旋律，目前亦有学钢琴：“以前佢未识弹琴嘅时候，我成日同佢玩一个游戏，揿一个音，跟住听，佢竟然可以知道𠮶个系咩音，跟住弹返出嚟，好犀利！”

从新人王至冇歌出　因追求简单令成绩下滑

罗力威参加《亚洲星光大道》夺冠一炮而红，初出道时风头一时无雨，成为大公司英皇力捧新星，更破了不少纪录，例如：横扫新人奖、金唱片销量、未出碟情况下开演唱会且门票火速售罄等等，至几年后声势开始下滑，公司也转捧其他艺人，问到个中过程及原因，他说大概是因为他从来也是追求简简单单，“首先我冇假设自己条直线一定要一直向上，条直线如果要一路向上，系好幸运嘅人，我冇觉得我自己系要咁幸运。其实简简单单我都OK，咁简简单单呢，又唔容易㗎㖞，简简单单就可能系……所谓嘅不思进取啩？咁所以时间慢慢，慢慢，我就会变得……向下咗。”罗力威不止一次提到自己很乐观，所以他不会觉得自己“衰咗”，因为他自觉已走了一条很奇妙、很丰富的路，“我觉得呢一个行业，我需要贡献最重要、最多最多嘅就系时间，我先至可以同呢个职业贴得好实，先至有可能做到一条线向上。我好清楚知道我自己系不能够摆好多时间，去同呢个职业贴得好实，我清楚知道明白，咁，做唔到咪做唔到啰。”

不忍太太结束网店　出心出力助起死回生

消失于镁光灯下这几年间，有报道说罗力威做送货，他亲自解画，这段时间他其实主要帮手打理太太雨侨的网店，因为太太早已想把十多年的网店结业，但罗力威极力阻止：“而家Harper就嚟五岁，有小朋友呢几年里面，太太都有好多次萌生咗一个想法出嚟，就系要Close喇。当初我都一路觉得‘唔使呀，几好呀，你做得好好呀……’我好想畀好多鼓励佢，‘你做得好好，呢间店好好，你嘅风气好好，好正气，好正直，有人信你推荐嘅产品，好好呀成件事！’”不过雨侨也实在分身不瑕，作为老公的他大感可惜，于是自荐接手太太的心血，同时向对方证明不放弃才是对的，“我只不过当时都想挑战吓自己，如果我话唔close，等我帮你，试吓延续佢得唔得呢？又得。我接手嘅时候，我系令佢起死回生，我系令佢做得好好㗎！其实佢当时冇乜点打理㗎喇，好似一个冇乜淋花嘅盆栽，但系我嚟到觉得好可惜，咁我就悉心打理返，所以系一件好温暖嘅事。”

接听客人电话　被误以为是另一男歌手

对于网店，罗力威的参与度很高，大大小小情况都要自己落手落脚，讲到报道所讲的“送货”，他解释其实最主要都是打电话叫客人收货，只不过有时要帮公司找纸箱装住货品：“送货系包含咗喺网店嘅发货，有时会需要出货、需要纸箱，咁我就需要喺附近工厂大厦，睇吓边度有纸箱，我就要自己推架车去𠮶度攞一拃纸箱返嚟，种种唔同嘅嘢都要做。”问到可曾被认得，他说是有的，但自己从不觉得需要所谓“放下身段”去做这份工作，再一次展现自己的乐观：“因为我冇觉得有人会成日得闲咁谂。”之后他更分享了几次搞笑奇遇，试过有客人在电话上说：“咦？早几日，喺TVB见到你啰……而家冇唱歌咩？”他听到一头雾水，辗转一轮才终于得知对方认错他是吴业坤；又试过有人问他是不是留了言给刘马车等等，说起这种种琐碎事，他都忍不住大笑。

感谢雨侨全力盲撑　视对方为榜样

从一个新手开始，到听见客人、朋友跟他说“多谢你介绍嘅产品呀。”每一句话都为罗力威带来莫大满足感；而他也一直本住珍惜、未到最后一刻都别放手的心态去经营网店，就如当初他跟太太说：“顶多阵啦！顶多阵啦！”一样，不过他最近决定：“不如唔顶喇。”问他是因为经济差、生意赚不到钱吗？他雀跃回答：“赚到㗎！”那为何不撑呢？他笑笑说：“因为……最近我开始要出歌喇，哈哈哈，我唔得闲，咁不如唔顶喇。”对于这个决定，雨侨也相当鼓励，不过罗力威说起来就相当害羞，“讲所有嘢都OK，一讲太太我就讲唔到……”话虽如此，他话音未落就开始夸赞太太：“好多谢太太一路以嚟咁支持我，好多谢佢嫁咗畀我，好多谢佢同我生小朋友，佢好伟大，佢好伟大，佢又好牺牲、好付出，佢系一个好好嘅榜样，先会令我想成为一个生性嘅人。”

罗力威说，无论在什么情况底下，太太都会赞他靓仔，哪怕他戴住眼镜、满脸须根，又例如他作了任何一首歌，有时自己都明知不好听，但雨侨也总是会说好听，无条件地去支持他。未来他除了继续照顾家庭外，也会多花时间在音乐创作，出更多作品，他表示：“我话我系一个追求简简单单嘅人，呢几年我完成咗公司歌手份合约，冇人喺我身边话‘你一定要出歌！下个月要派歌！’冇人话畀我听要派歌就唔派，冇人话畀我听要出歌，我就唔出。但系而家嘅我更加知道，当我如果呢啲嘢未做嘅时候系会后悔嘅，有一刻会后悔‘如果我早啲拎啲歌出嚟、畀𠮶个人听到咪好啰。’嘅时候，咁我而家就因为呢样嘢，支撑咗我思想，所以令我觉得我唔会好似之前咁，唔出咪唔出啰，而家我系会有一个冲动，会想啲歌好好咁做起，就快啲发布。”