张慧仪养子被指是哨牙富豪私生子 再嬲爆澄清谣言：大不了验DNA
邓兆尊早前在网台节目《娱乐好好玩》中爆料指，某女星同时与6位富豪交往，后来意外怀孕，但6位富豪都不肯“认头”，只每人丢低100万就走人，惹来外界猜测邓兆尊所说的女星身分。有网民根据线索推测，将矛头直指有一个养子的张慧仪。早前张慧仪接受钟慧冰YouTube频道访问时，片头节录一段张慧仪的回应，但节目中却未有后续。其实因为该集访问是上集，而日前就已播出了下集，张慧仪完整地澄清自己非事主，她说起初听到有人传开这个消息时，都感到惊讶：“首先我想讲我冇咁犀利，如果有咁犀利我就唔使咁样去打拼，但系后尾慢慢越传越深嘅时候，我就有啲觉得，系咪应该比较严肃啲去睇？我觉得呢啲咁嘅嘢唔系攞嚟开玩笑。”
她透露见到国内网上平台有主播去转发报道，甚至用她与儿子的合照，连同过往的访问做几集“故事”，愈来愈夸张，张慧仪表示：“下面好多粉丝喺度评论，甚至乎好夸张，啲人话‘你睇吓佢个仔个样！’香港富豪都系𠮶几个，因为我个仔有少少哨牙，就话同某某富豪一模一样样，哨牙嘅！跟住又话我个仔，因为我个仔讲普通话，佢讲广东话唔系咁标准嘅音，又会讲‘某富豪爸爸佢哋讲潮州话㗎，潮州讲广东话嘅𠮶个口音。’我觉得大家系咪太过想像力丰富呢？”
触发张慧仪激动澄清的，是访问前一日发生的事件，有内地网民在社交平台展示了自己与“邓某某”（邓兆尊）的合照，“开始有啲fans喺度问，‘你同邓某某合照，你同佢好熟㗎 ？’于是粉丝开始问，‘我好想问吓邓某某，究竟攞咗富豪嘅100万𠮶个女星系边个？’呢一个网主，呢一个帐号嘅主人，即系同邓某某合照嘅主人，佢就喺𠮶度写‘张慧仪’。平时啲粉丝喺度估，大家猜测系张慧仪，我都算啦，但呢个有问有答，你问完佢喺度讲张慧仪，𠮶一下我系非常之嬲，愤怒㗎！我即刻喺佢留言𠮶度，即刻严重警告，两个红色感叹号，‘不要再制造谣言！’两个红色感叹号，‘不要再传播谣言！’跟住我见到对方即刻删除咗。我觉得呢啲嘢唔系好玩，首先我想讲，我系好认真澄清呢个绝对唔系我，我一啲都唔惊，大不了验DNA，或者乜都得，我一啲都唔惊！但系我觉得唔好攞呢啲嘢嚟开玩笑，如果真有其人嘅话，俾大家真系发掘到呢个人咁点？大家有冇谂过对𠮶个小朋友系有几大影响？好好玩咩？好好笑咩？我觉得唔好啦，我觉得到此为止，亦都唔需要再去猜测，呢个话题应该到此结束，冇意义㗎讲呢啲嘢，何必做一啲一时口舌之快讲嘅嘢影响到人，唔得㗎我觉得。”
由于她听起来非常劳气，钟慧冰为了缓和气氛，就主动转话题带到她的养子Hanson，问她现时几岁、是否修读神学，张慧仪解释：“又唔系读紧神学，但系同耶稣基督有关，佢由细到大都系读耶稣嘅学校，佢嘅课本全部都系同耶稣基督有关嘅。”她坦承儿子有先天性心脏病，不适合体力劳动工作，但很喜欢返教会，经常在教会帮手，张慧仪认为若儿子喜欢，将来想做牧师或任何工作，只要合理，她都一定会支持。
她又讲到当初收养Hanson的经过，张慧仪与拉丁舞王霍绍裘分手后，决定去北京放一个长假，开始做小生意，她说：“我觉得女人到咗一个年纪，你会有一种母性，我好钟意细路，𠮶时我想去做一啲同细路有关嘅义工，我就去咗孤儿院。”她解释自己没有计划要去收养小朋友，但见到儿子觉得很有缘份，很喜欢他，尤其是对方是有病的孤儿，实在很难有人收养，加上儿子很可爱，于是便产生怜悯之心，她透露：“其实我开始见到佢嘅时候佢系人哋嘅，俾一对美国夫妇收养，但系我好想收养佢，𠮶个院长话唔得，我话唔得，咁嚟我屋企寄养，俾佢学吓英文。跟住𠮶时我已经有个好强烈嘅感觉，呢个系缘份，我同个院长讲‘我觉得个美国夫妇会放弃！’佢话‘你唔好傻啦，冇可能，人哋已经入纸申请紧。’结果佢嚟我屋企唔够两个月，对方真系放弃，咁我就领养。”张慧仪直言自己一向很独立坚强，对人生决定方向清晰，加上她知道问一千、一万个人，都一定是反对她收养儿子，她不想被左右，于是一意孤行，收养后才通知父母。
当钟慧冰问，带住一个小朋友，再邂逅到对象，对方可能会不肯娶她，她霸气表示：“唔娶咪唔娶，冇乜所谓。”她认为Hanson不是负累，反而替她过滤有谁是适合自己的人，“如果𠮶个人都唔接受小朋友，佢唔系我要嘅人，唔使嘥时间。”张慧仪知道很多人觉得Hanson遇上自己很幸运，不过她认为这只是表面，实际上是自己很感恩遇到对方，“佢令我睇到连我自己都唔知道我自己里面有嘅一啲好嘅潜质。”
她指以往大家只知道张慧仪性感，但因为“为母则强”，她发掘出自己硬朗一面，要养大Hanson，医疗和教育负担很大，她才因而有了事业方向，从北京回流南方，在无人无物的地方为生意打拼，放下身段和面子主动去促销自己生意，不论是洗头店的员工，或者邻居，服装店，她逢人就Sell，费尽唇舌主动去洽谈生意揾机会，最终用八个月时间，由推销产品到成功倾成“许留山”在北京、天津、重庆、成都四个城市的总代理！张慧仪说：“如果冇呢个仔，我唔会做呢啲嘢。攞咗呢个项目之后，𠮶八个月，我讲真，我好为我自己骄傲！人哋成日话张慧仪点，我系靠自己，所以有乜嘢叫做唔可以？我好感恩我个仔，俾我睇到原来我自己都唔知我自己有嘅咁嘅潜能、潜质喺里面！”