瞩目配角｜黎彼得不演悲剧源于人生：有几悲啫，我自细冇好过
人们常说：“才子多情”，但对黎彼得（Peter哥）来说，就应该说成是才子“重”情。7，80年代他与许冠杰合作，填写了多首流行曲歌词，内容贴地又搞笑，故有“鬼马填词人”的称号。有人会问：“才就有啦，咁情呢？佢结婚三年就离婚，点会算重情？”
39岁患肝病冒起闪婚念头
80年代黎彼得与“歌神”许冠杰合作填写的歌曲爆红，一瞬间他就成为名人，节目、做骚、填词工作多的不得了，但正因如此，他在39岁就患上了肝病，还被医生劝戒要停工。说也奇怪，这个时候他竟然会想起“结婚”两个字，他说：“失业吖嘛，冇乜聊赖，年龄又差唔多，咁啱又有位女士喺附近撞到，又几啱倾㖞，就搞结婚。”个个都怕寂寞，也会想有人陪住终老，所以一直是单身一人的他就突然间结婚了：“好多人都唔相信，因为我从来冇女朋友拍拖，所以好多人都冇嚟，以为系愚人节玩嘢，哈哈哈。”
结婚三年即离婚：开心嚟就开心走，唔好拖泥带水
好景不常，黎彼得与太太的婚姻关系只维持了短短三年。“结咗婚三年，生咗个仔就Sayonara（日文“长时间不会再见”的意思），𠮶三年都好阴公架，啲人觉得个男人又失业，又要靠个女人养，我事实又系冇收入，变咗我系咪要食拖鞋饭？又唔系，但事实我又身体唔好，呢个女人肯同我挨系好难得，我好感恩㗎。无奈长贫难顾，佢要走，我咪畀佢走啰，就系咁简单，哈哈。”
离婚后直到今日为止，黎彼得的太太与他或者儿子都再没有联络，他经常将“冇所谓”三个字挂在嘴边，但又是否真的“冇所谓”呢？“冇所谓㗎，离离合合，人生就系冇拖冇欠，开心嚟就开心走。唔好拖泥带水，唔好藕断丝连。冇嘢㗎，冇事㗎㖞。”
“01最赏睇娱乐大奖”即日起至12月23日接受投票喇，答埋简单问题，随时赢最新5G手机12 Pro！
此时记者的脸上一面错愕，大概黎彼得都意识到，似是安慰记者又安慰着自己，说：“要走人咪走人啰，冇乜所谓㗎，Who Care？我带子雄狼凑大个仔又好开心，而家佢都卅岁。几过瘾吖，佢而家读紧大学，不知几开心。”
父子关系形同陌路人：我喺厅佢就入房
“冇仇不成父子，冇怨不成夫妇”这句说话，就正好形容黎彼得人生中感情事，他形容，自己与儿子关系为“孤臣孽子”。离婚后为生计而开工，没日没夜的工作也令两父子关系逐渐疏离：“我𠮶时要揾食，有一次拍大唐双龙传，林峰𠮶套，一返大陆就系４，5个月，咪放低啲钱畀个宾妹凑佢啰。我谂佢绝对系唔开心，唔见咗个老豆，但系要揾食吖嘛，冇办法。”
现时因为疫情关系，黎彼得的儿子不能到国内读书，说到这里，黎彼得又笑了笑说：“佢而家返唔到去，咪留低喺度陪我啰。”他们在家中的相处，就似是两个活在平行时空的人，明明是住在同一个空间，但又没有交杂。他说：“我喺厅佢就喺房，佢出咗厅我又入返房，冇乜偈倾咁济。佢日日对住个手机，唔系对住我，呢种系一种报应，你曾经唔take care佢，佢咪唔踩你啰。”两仔爷在这个平行时空的生活，两个人的交流就止于“食乜嘢，叫卖啰”这些基本对白，看得出，黎彼得还是十分紧张儿子的事情，只是收在了心底。
黎彼得儿时10岁的时候与母亲在中环卖报纸谋生，他提及自己从小就是一个人长大，所以造就了自己“淡情”的性格：“大时大节我都系一个人，从来都系。我觉得有咩咁大镬啫，点会怀念一家团聚？”有其父必有其子，所以黎彼得的儿子长大也“遗传”了这种特质：“佢冇呢种情怀，好悲情。唔系𠮶种念情嘅人，冇伦理𠮶种，包括我自己都系，我唔系叫冇情冇义，而系好冷，好平淡。”他说，其实不止是自己，相信很多家庭的关系都是如此，好正常。
不想再婚怕累人：照吓块镜啦，样又衰，又唔系有钱
黎彼得于39岁成家立室，42岁离婚，但离婚的他未曾想过要再婚，说是不想再累人：“老实讲，凭咩要人跟你啫，照吓块镜啦，样又衰，又唔系有钱，女仔咁多地方去，入你个门口做咩啫？爱过方知情浓，醉过方知情重，曾经过就算罢啦，几廿岁仲搞咁多嘢，宝福山见㗎啦。”
最后，记者随口问了一句：“点解你净系做喜剧角色？”他十分豁然的回答：“我都唔识喊嘅，唔系挤啲眼药水就得，我同余诗曼做过《洗冤录》啦，场戏话个女要行刑，我唔跟剧本，我都唔喊嘅，晕咗落地就算。我个世界唔会有悲剧，有几悲啫，我自细就悲㗎啦，冇好过，唔紧要。因为我嘅人生就自得其乐，我死老豆都唔喊，有咩好喊啫，已臻化境，唔会好感触，生离死别，湿湿碎。”
经常强调自己是个淡情的人，但依记者来看，黎彼得其实是一个重情的人，只是“男人大丈夫，有泪不轻弹”罢了。
采访：林迅景 拍摄：吕荣栋 剪接：赵锦添 摄影：陈顺祯
场地：Hippie Party@观塘